المساعد الشخصي الرقمي

مشاهدة النسخة كاملة : محمد الحسن سالم حميد


ناصرعبدالله
04-22-2010, 07:42 PM
http://mosawiland.com/upload/humeed.jpg



خوفي من تلحق رفيقك
http://mosawiland.com/upload/khofi.mp3


للتحميل :
http://mosawiland.com/upload/khofi.mp3


ملحوظة : للتحميل اضغط كلك يمين ثم اختر ...save target as

ود العم
04-22-2010, 11:13 PM
خوفي من تلحق رفيقك (1)
يا بريق نجم الحياري
وانت لا نور طريقك
لا شرق فجر السهاري
من زمن يا صحوة طلعك
غصة في حلقة الصحاري
حتى شال النم فرعك
دودى زي وهج البشارة
قلنا يا سعد المواسم
عودك المليان جسارة
عودك الفجر المصادم
بالبصيرات و البصارة
يستحيل يرضخ يساوم
مهما كان الريح حصارا
يفضل النخل البقاوم
في السقوط نخل الفقارى
يا اندلاع صوت الغفاري
في حلق دغش الغلابة
لو خريفك تاني يطرح
آه يا آخر سحابة
لما يا شرف المواكب
يبقي هم الناس امارة
تندحر كل المناصب
ينكسر كرسي الوزارة
كنتوا وين . . وين انتو كنتوا
لما الشوارع ما ثبت قداما مرتق
نفض الصمت المسافة
مدت الشوق المضارع
للصباحات التجرتق
كف شهيداً بق مارق
من فرقة الظلمة فجراً
تم بي دمو الشرافه
وضم حضن الأرض عاشق
كنتوا وين . . وين انتو كنتوا
لما كان في سجنو ثائر
بي جلابة السونكي نومتو
ويصحي بي امر العساكر
قومتو في الزنزانة يمحي
و يفتح الاف الحناجر
تجدب الاطفال ويكتب
انبل الاشعار لباكر
تشطب السجان وصوتو
ويبقي فنانا البساسق
كنتوا وين وين انتو كنت
لما فضل الدين عباية تدبي
فوق كتف الغنايا
تنصب في الجو طوابق
تنقلب في التو بنوكا
للبداهن و البنافق و البوافق
ولما كان نفس العباية
تتمسخ بي قدره حبلا
لي قصار عمر الكحايا
من جنب تنسل سيفا

ود العم
04-22-2010, 11:15 PM
خوفي من تلحق رفيقك (2)
لي قصار عمر الكحايا
من جنب تنسل سيفا
عبّر السواهو سارق
شدة الفقر الخرافي
حدة الشغل اللمافي
رغم الاف المتاجر
و الخوازيق و المرافق
كنتوا وين . . وين انتو كنتو
لما البيوت في الشمال قامت خنادق
للكتابات البتنزل فوق ضهاريهم مطارق
لما طلاب الحقيقة كانو بختارو المشانق
و لما لسة الله بموت في الجنوب بين البنادق
كنتوا وين وين انتو كنت
آه يا وطني المستف في المطارات القصية
اه يا كفني المنتف في مدرات القضية
اه يا صمتي المكتف في العبارات الندية
اه يا نفسي الملطف بالنهارات الصدية
اه من رفع المصاحف بالرماح الاجنبية
المعاطف ... أجنبية
العواطف ... أجنبية
الجلابيب ... أجنبية
الدواليب ... أجنبية
الدهاليز ... أجنبية
السراير ... أجنبية
المساير ... أجنبية
صبة الكاس ... أجنبية
ختة الراس ... أجنبية
رشة الدلكة ... أجنبية
رعشة الفركة ... أجنبية
طفية النور ... أجنبية
والخوازيق عربية .. عربية
فضي نارك يا محار ب ولا هات البندقية
غني عشقك يا صبية نحن قدامك مدارك
غني للوطن المفارق
عشت يا وطني المبرق بالندى ولون المشارق
يا محرق .. يا مجرب
عشت بشرف البنادق
ويسقط العفن البتلب فوقنا من شرف الفنادق

نبيل عبدالباقى
04-23-2010, 08:52 PM
الله عليكم الله

روائع ودرر


حا تواصلوا ولا؟؟؟؟

نبيل عبدالباقى
04-23-2010, 08:53 PM
بينى وبينك "كل ما تباعد بينا عوارض" تموها وأنا أنزلها ليكم فيديو على اليوتيوب

نبيل عبدالباقى
04-23-2010, 09:05 PM
عمنا الحاج ود عجبنا



عمنا الحـاج ود عجبنـا فـى الفريـق ياهـو الركيـزة
هو البشيل حمل الرباعة وعنـدو كلمـة علـى الجماعـة
فـى الفريـق باقيلنـا تايـة وكـل طيـب ليهـو غايـة
للضعيـف تلقاهـو سانـد ويقهـر الكـعـب المعـانـد
للضيـوف ديوانـو فاتـح ديـل يقومـوا وديـل ينزلـوا
يـا ولـد جيبـو الرتايـن جيهـو الـديـوان فـراشـو
والأباريـق والتباريـق وأفرشـوا الفـرشـة الكبـيـرة
وأضـبــحــوا الــحــمــل الــمــدعــول
عمنا الحاج ود عجبنا من سنين أيـام جهلتـو ديمـه فـى
دعوات صلاتو يسأل المولـى السلامـة وستـرة الحـال
والــــــــكــــــــرامـــــــــة .
عمنا الحاج ود عجبنا فى ليلـة مـن زات الليالـى وفـى
زمن حظر التجول جاهـو ضيـف فـوق راس حداشـر
رحب الحاج بيهو جدا فرشولو نزلوهو وكاسـو للعشـاء
ما أتلقالوا الرغيف ممحـوق مقصـر والبلـد فـى حـال
تعسر عمنا الحاج فى مبادؤ وجبة الضيـف زى فريضـة
وهسه ضاقت بيه العريضه وضيفوا كيف يترك عشاهو ..؟
ومـــــن دى زايـــــد اخـتـشــاهــو ...
وجــــاتــــو فــــكـــــرة ............!
يمشـى للفـرن المجـاور وللجـان العـيـش يـشـاور
بـــس عـشــاء الـضـيـف ياجـمـاعـة ......!
ضـيـفـى نـــازل لـيـهـو ســاعــة ........!
شـاكـلــوهــو ..نـهـروهـو....دفـروهــو ..
وجاتـو دوريـة الطـوارى وامـسـى بـايـت فــى
الحراسة وناسـو جنـو وللصبـاح مـا عرفـوا حاجـة
ويـــــــــــــــــــن ده روح........؟
وجاهـم الخبـر المأكـد ود عجبنـا فــى الحـراسـة
مـــاشـــى مـحـكــمــة الـــطـــوارى
ناسـو اولادو وبناتـو عرفـو حالـو وبــدرى فـاتـو
راحـو محكمـة الطـوارى فيهـا فـى نـص الخلايـق
شافـو حـالاً ماهـو لايــق عمـنـا الـحـاج بــى
جلالـو فيـه حـس الصـوت يولـول فـوق قفـاهـو
فـوق زنـودو وفـوق رجولـو ومـره فـوق فجـجـاً
حشاهن أصلـو مـا قايـل بطولـن حتـى كـان نزلـن
هجاين الا لكن الليالـى يـوم بترخـص كـل غالـى ...
حاكمـوا الولـد المنصـب كتفـوا بالدبـور مقـصـب
أنت ياحاج يا مخالف .....زول مخـرف وعقلـو تالـف
أنت يا زول مـاك دارى زلـة النـاس فـى الطـوارى
أجلدوهـو ...غرموهو...نفـذوا الحكـم البهينـو شـان
يــفــتــح تـــانـــى عــيــنـــو .....
تسمع الصوت ليهو خاويه وفـوق قفـا الحـاج صيحتـو
داوية كل جلدة جبل مزلة فـوق ضميـر الحـاج وقلبـه
كل كربـاج الـف علـه فجـأة رفـع الحـاج عينـوا...
شـاف بنـات ولـدوا وبناتـو كلهـن واقفـات يعايـنـن
دمعتن فى العين ترقرق وجعتـن فـى الجـوف تحـرق
والحـزن ليهـن مغـرق .. ده النجـوم الفـى سماهـن
ده الزمان الكـان حماهـن كـل صـوت نـازل عليهـو
مـن شعـاع الضـوء عماهـن عمـك الحـاج دمـعـو
زرف وسيلو فـوق أشنابـو سـرب تـم حكمـوا وراح
بـيـوتـو نـفـسـه مـكـســورة وزلـيـلــة ...
وكـــيـــف مـــلاقـــاة الـحـلـيـلــه ..؟
وصــحـــوة الـــــروح الـعـلـيـلــه...؟
فــــى الـبـيــوت الــجــوه غـــــااااادى
عــمــك الــحــاج مـــــا اعـتــيــادى
وفـــوقـــوا مـتـلـمـيــن جـمــاعــتــو
والـثـكـيـلــى ضــــــرب حــزايــنــى
قـــالـــوا نـــاداهــــوا الــمــنـــادى
فـــــــارق الــدنــيـــا الـمـهـيــنــه
يــقــطــع الـــزلــــه وسـنـيـنــهــا
فــــوق فــــراش حــــاج ود عـجـبـنــا
تــســمــع الــــــزول الــبــوصـــى
أقـفـلــوا الــحــوش يـــــا جـمــاعــة
وطـــفـــوا انـــــــوار الــرتــايـــن
داك حـــــرس حـــظـــر الــتــجــول
مـــــن بـعــيــد لـيــكــم يــعــايــن
يــــا زمـــــن حــظـــر الـتــجــول
يـــــــــــــا زمــــــــــــــن
حــــــــــــــظــــــــــــــر
الـــــــتـــــــجـــــــول

نبيل عبدالباقى
04-23-2010, 09:08 PM
حَق الغُنى

ومن حقي أغني العالم .. إبداع وعلم حرية
إنساني شعوب تنسالم .. تنسالم بي حنية
على نخب الود نتنادم .. لا جنس ولا لونية
لا عِرق لا آه نتقادم .. سكتنا بياض النية
مش كلنا جينا من آدم .. مش آدم ابو البشرية
السجن إذاً يترايم .. نبنيها قلاع ثورية
عقبال الخير يترادم .. والدنيا تمش دغرية
مد كفك يا بني آدم .. حرية سلام حرية"


من حقي أغني .. أغني لشعبي .. ومن حق الشعب عليّ
لا بي إيدك تمنع قلبي .. ولا قلبي كما بايديا
علمني أغني .. الطين .. المخرطه .. والطورية
الناس الصابرة .. سنين بالحالة .. الما دغرية
القابضة الجمرة في إيدا .. والجمرة تلهلب حية
لا قادرة الجمرة تقيدا .. لا قادرة تولع هيّ
يا قلبي بلاش نستعجل .. في الدرب شوية شوية
واصلين الما بتأجل .. لليوم الشمشو قوية
علمني الشوق نترجل .. نستحمل وجع الجية
لا القش بيهاب المنجل .. لاطب .. النار .. الكيه
يا صقر الآه يا ريح .. لا تنفض عش قمرية
من حقو يغني صريح .. ذرية ورا ذرية
ومن حقي أغني العالم .. إبداع وعلم حرية
إنساني شعوب تنسالم .. تنسالم بي حنية
على نخب الود نتنادم .. لا جنس ولا لونية
لا عِرق لا آه نتقادم .. سكتنا بياض النية
مش كلنا جينا من آدم .. مش آدم ابو البشرية
السجن إذاً يترايم .. نبنيها قلاع ثورية
عقبال الخير يترادم .. والدنيا تمش دغرية
مد كفك يا بني آدم .. حرية سلام حرية
__________________

نبيل عبدالباقى
04-23-2010, 09:13 PM
محمد الحسن سالم حميد
سيرة ذاتية

محمد الحسن سالم حميد شاعر سودانى مميز بابداعه الداوى وفنه الراقى ويتميز حميد بوطنيته الخالدة وحبه الذائد للمواطن السودانى ويتألم كثيرا للمواطن السودانى الذى يعانى من الفقر والجوع وعبر عن ذلك بقصائده ذات الصوت الداوى والحس العالى ولحميد مكانة كبيرة جدا فى المجتمعات السودانية مليئة بالعشق والارتياح لكلماته وتغنى له العديد من الفنانين السودانيين نذكر منهم على سبيل المثال الراحل المقيم الأستاذ مصطفى سيد أحمد

نبيل عبدالباقى
04-23-2010, 09:14 PM
قصائد الشاعر محمد الحسن سالم حميد متداولة كما العملة، ونبرات صوته وهي تتلي القصيدة تخرج من أجهزة التسجيل في القرى والحضر.. والشاعر الرائع تسابق معجبوه من كل مكان للقائه بدار «المشاهد» فكان تأخر الطائرة عن موعدها سبباً في عدم اللقاء وقرار آخر حرم معجبيه من معانقته بنادي الزومة.. وكان لا بد أن يتم هذا اللقاء على صفحات شاهد العصر والتي جلس فيها شاعركم الكبير لساعات طوال وهو يشد محاوريه الاساتذة ازهري محمد علي ـ عبد المنعم شجرابي ـ الهادي أحمد هارون ومحجوب محمد أحمد بحديث رائع وطويل..

ناصرعبدالله
04-23-2010, 11:48 PM
لكم الشكر ود العم ونبيل

وليكم دي :

بيني وبينك (طيبه)
محمد الحسن حسن سالم (حميد)

كل ما تباعد بيننا عوارض .. كل ما هواك يا طيبة مكنّي
تلد الغربة القرب الواحد .. وبيكي أسمي الشوق وأكنّي
لما أفوتك من دون خاتر .. أو دون خاتر مني تفوتي
بلقى حبايب في كل حتة .. وكل بيوت الفقرا بيوتي
لا غيرت وراكي الجتة .. ولا بدلت ملامح صوتي
لا غفلني وهادن فني .. غامل المدن الما عرفتني
وتبن الصبر الشوقو مصوبر .. في الأرياف الكم وفّني
وبالإحساس الجاك مستعجل .. جيت متأنّي
للأطفال الناشفة ضلوعا ..
ونازفة .. بغني ..
أهدي دموعا .. وأطمّن روعا ..
ببسمة بكرة الماها تمني .. ولا مصنوعة
بتمرق منها .. تدخل مني .. شديرا فروعا .. تميد متّنّي
تكوفت فيها نسيمة حنّي
تلاقي طيورا الما ممنوعة .. تجول وتغنّي
عديل لا راجفة ولا مفزوعة .. خطاها نبياً داخل الجنّي
أغني لشعبي ومين يمنعني ..
أغني لقلبي إذا لوعني
مخير دربي الما رجعني
إذا طلعني نخلة القرب .. واللا الغربة الكدرومية
بتنـزل غنوتي بي قمرية
أو وقعني في بطن الجب .. بطلع يوسف بالأغنية
أغني .. أغني
أغني الناس الما بتسمعني
المني بعيد المبعد عني
الإيدي في إيدا .. وإيدا بتبني
في دنيا جديدة .. اليوم راح تدني
وأريت غنواتي في ناس شغالة
تكون سندالة وعود طورية
ضراع رجالة .. كتاب أطفالا ..
وجملة بالا الما مقرية
سدة مالا وبقة فالا
في ليلة الدخلة على اسمى قضية
حبيبة قلبي يا سودانية
يا أسمى معاني .. في زول بعاني
يا ود ضكران .. يا بت دغرية
وانا إن سامعاني .. فضلت أغاني غبش فقرية
حويتك منك .. يا دافعاني براحة إيديا
كما الأشواق .. ويا جابداني .. برفق عليّ
ما بتحير بين الفوق وبين الناس التحتانية
إلا مغير .. واللا عقوق .. واللا كفيف الإنسانية
ومنك وين يا كاشفة عينيّ
بنور الإلفة .. ضيا الحنية
وحلم العالم ناس تنسالم .. والبني آدم صافي النية
والأطفال الناشفة ضلوعا
إنمرتق روعا .. وجاتنا تغني
غناوي البكرة الكم مسموعة
سماع بلاّل .. في الدنيا الصنّي
حسيس طمبارة مع نقارة
صفقةّ حارة ودارة تهنّي
زفاف اغرودة .. نهار العودة .. أو زغرودة في ليلة الحنّي
فيا حلتنا عليك ترابك
وإنت شبابك زينة الجنّي
أحلى عروس البلد اللتنا .. واللا الغبش الرابة تهنّي
واللا هدير المدن التصحى وتمحى ضلام الحاصل عنّي.

ناصرعبدالله
04-24-2010, 12:07 AM
السرة بت عوض الكريم

جات داخلة .. زي مرقة غضب من جوف حليم .. في زمن صعب
رمت السلام .. زي شنطة من كتف المسافر .. بي تعب
زي رُدخة رب .. الله يا رب
قعدت على طرف العنيقريب المحازي الواطة ..
ضايرت التراب ، كسر العويش الفوقو .. شالت باصبعا وشختت شخيت
الله يا رب
عايننا فيها نكوس سبب .. للكفرنة وفورة الزهج .. من دروة البال الوهيط
ما عودتنا تدس عوج .. تكتم فرح .. زي حالة الزول البسيط
صنقعنا في قعدتنا .. راجعت الوشوش ..
دنقرنا عن رفعة وشيها المتعب الجاد الرحيم
الطيب السمح المعافى .. رهاب رهاب ينشاف وسيم
إنوهطت فوق العنيقريب القديم
من تاني ضايرت التراب ، كسر العويش الفوقو شالت باصبعا وشختت شخيت
وقالت : تصدقو آ ولادي بقيت
أبيت الليل أفكر في التميرات القدر فوق راسا ما خمّت صبيط
غلبا الجرورة الفوق ضهرنا تنزلا ..
تطلق وشينا مع الجماعة ..
شن دهانا دي كم سنين والحال وقف قطّ وحلف ما فيهو لو نقاط بسيط
كان بوشنا في حش التمور .. الليلي دوشنا مع اللقيط
أي لا حكت دي ولا بقت .. ما كنا قايلين في حياتنا يجينا أقسى من المضى
ساعة مروق الإنجليز قلنا الظلم فات وانقضى
تاريهو كمتر .. وقام دقون .. حلفا وعشر .. معيوقة نال
دمسيس ... ضريسا .... وشوك جمال
الله يا رب كربك كرب
عاولى التمور .. الواطة بور .. الناس حطب
بابور شهور غلبان يدور .. مافيش مطور .. ويجيك بعد ده علم طلب
الله يا رب العالمين
الما جحدنا نعمتو في الشوف والسمع راحة الولادة ولا قلوبنا قسن ولا غيرنا دين
في الجابو ما قصر حمد .. في الشالو ما قلنالو وين ماشيبو وين
عدلت نعال مقلوبة في الجيهة اليمين .. حدرت شمال
زمناً مو دا الحيكومة كانت بت حلال
بي حالا .. بي حرب الجنوب ..
بي قلة المال في الجيوب
كانت رخية العيشي .. إلا ترا العوين الكبرو .. كبرو مليسين
علمن يطير .. إن كان هو ما فدّر عوج ..
ما فادنا شيء ومحق القبيل لمينا هين .. في هين .. في هين
يا حليل رجالاً سكتن غدراً غشاهن بالقفا .. ولي الليلة سيفن في الجراب يهرج سنين
دا زمن قواسي .. زمن ضلالة .. اوانطجية .. زمن حقارة .... زمن مهين
لاقين هواكن ضروا .. ضر .. يا عسكرياً ما انتعظ .. كتل الرقاب بيودي وين
ضر .. يا جلاليباً رهاف .. ذمماً خفاف .. ضر يا ضرر .. ضر .. يا دقين
منصلبطين عرق النبي .. وبالنار بتلعبوا يا عوين
لي الحول قريب .. درب السلامة .. تخوجوا بي درب الحرب
غتي قلب واللا الحرب .. بقرة حلب .. والأرض صين
ما كان عمل .. ما كان دا دين
يا أرزقية تخمجوا دم .. والدم مو موية .. ومانا طين
منصلطين في الناس دحين .. لامن يجي اليوم الفصل والحق يبين
وين تمشوا وين تنسلوا .. وين
كان طال وكان قصر الزمان .. الحين بحين
كب يا رجالاً سكتن غدراً غشاهن بالقفا .. ولي الليلة سيفن في الجراب يهرج سنين
وإنأوهت .. وحسيت بأعماق الشوارع والتواريخ المجيدة إنأوهت .. وأدتني عين
صنت شويتين .. كوركت .. هيى يا بنيه وكتنا راح .. يا بت شمشنا إدهدهت ..
شوفيلي شافع ود فطين جاء من الطحين
الله فترنا من الطحين
وكان الوقت زالف عصر .. عين الشمش مشغوله بي دوشة سحاب
عرق المراكبية البعاد راحل مع ريحة التساب
ما تدري مارقي من البيوت الحلة .. واللا من التراب
الناس تقول مدقوقة طالعة على الحقاب
مفلوقة بي حجر الصعاب المرة .. نازلة على البحر مشروقة بي موية السراب
الفرة .. مشنوقة عقاب .. بالمرة من كتر العذاب
الحرة في طايوقه داب
يا المرة كيف بقت الرقاب مسيوقة بي قيد السلاب
منشرة من نشر الحجاب في عروقا .. وإشتد الخراب
من بعدما انبلج الفرج من ضيقا .. خدعوها بي حيلة كتاب
رفعوه فوق سن الحراب
ودهت الهزائم خلقتا
فالناس بدل عن نقتا
التلقى فكة ريقتا
وبدل القصور الفي خيال .. التبقى ماهلة كريقتا
وما جاتا راحة طلقتا .. إلا التعمر طلقتا
بي بندقيتاً حقتا .. بي ها الشوارع وبقتا
تنسدا منك دقتا .. ودم فلقتا .. ومر شرقتا .. ونار شنقتا
يا دقن دينك سرقتا
قطعت وضوها انشرقت .. مسحت وشيها إنشهقت
قال نست ما تاكت العوضة التحت .. عن مرقتا
دارت تقوم .. مسك العنيقريب الحنين طرقتا
رجفت بشيش عن نتقتا
رجفت بشيش من الغضب واللا التعب .. فتر السنين ..
واللا الكبر دا الما قدر يمسح سماحة خلقتا
زي نيتا البيضة الشعر .. وزي موج بحر كان الجبين
مديت يميني أساعدا ..
ردت يسارا تباعدا
وقالت لي : أبوي وفر ضراعك للبلد
وادخر مروتك آ ولد
لي يوم بحين
احفض كرامتك تحفضك .. الموت ولا العيش المهين
الموت نفاد الما نفد .. الموت حياة الميتين
أختاها جنة مع الفقر .. وادخل جحيم المتعبين
وإن ما قدرت على دا أبوي .. رب لك دقين
وصنت .. رب لك دقين
وضحكت .. حمدنا الله الحنون .. جيداً خلقنا بلا دقون
وضحكنا زين
ساقت حديثا .. على الخراب الشوفتو ما دايرالا عين عقب متاقانا الرياح
رفعت قران شوك الصنط .. ساسوية جاية من المراح ..
يا خيري ودي المستراح
والشوكة تحت الدوكة .. يا داك الركين
الشوك بمرق الشوك .. شوكاً فينا شين
مراقو رب العزة .. شعباً ما بيلين
الجاي حيكومتنا .. لكن الزمن دبوية .. داير النهمة .. وينكم يا الخزين
ما قلّ حاشى صبرنا .. لكن لا متين
دعكت عيونا وصنقعت .. كان الغيوم إنجمعت تقلت على الريح النصيح
كان المطور شو ترعت .. زي باكي فوق دم الحسين
لكن ده وين .. والتاني وين
وإنلوعت .. معقول في ناساً ما وعت لي الليلي بالم .. بين بين
وكيف وإنتو نوحنا من الدعت .. مومنا من جحر الدقون الكاكي يلدغ مرتين
والتالتة قرصة أبو الحصين
حسيت بأنها دمعت .. وشهقت عيونا الدمعتين
حسيت بأني متل حجر .. جدعوهو في نص البحر .. قام البحر بنى فوقو طين
حسيت بأعماق الشوارع .. التواريخ البعيدة إنأوهت .. وأدتني عين
الجاي حيكزمتنا .. كيف .. ومتين .. ووين ؟
ومرقت متل دخلة غضب .. صدر المسامح والحليم
في أيام عجاف
دي السرة بت عوض الكريم
مرة ما بتلاوز .. لا بتخاف .. زي الضفاف
الما بتهاب ضنب التماسيح والكلاب .. قومة البحر واللا الجفاف
مرة من قديم .. مرة بت قبائل .. قالوا لا .. وإختارو في الحق الجحيم
من رفقة الفسل الخلا .. وكانت نعم تدي النعيم
مرة من صميم ضهر الغلابة الما بتنكس راسا .. غير ساعة الصلا
أو ترمي تيراب في التراب .. أو تستشف وجه السديم
السرة بت عوض الكريم
ما فيها من عادة الحريم .. غير السماحة القدمت قدم الضهب حافضنو في حقاً قديم
في أقصي كيم
ما فيها من طبع الرجال .. غير الأيادي الخشنة زي قولة النصيحة وقت يكدب في الصميم
ساعة يكون الحكم ضيم
تسعين سنة .. ويا السرة بت عوض الكريم
بصرك بصير .. سمعك سميع .. نضمك نضيم
بالك محلو صبي وسليم
تسعين سنة .. عودك أمداً ما انحنى .. شامخ بلا البان القديم
تسعين سنة .. ومن فتنتك .. استغفر الله العظيم
جوك الرجال يا السرة بت عوض الكريم من وين وين
لا الكلو طين أغراك .. لا السمح الوسيم
آ السرة صددتي المشايخ والعمد .. مرسالا ليك ..
ضيعت بي أنفه البشارة عليهو ... كيف قلبك صمد يا بت قصاد المغريات ..
الجان يجن والهام يهيم
والبشروك بالجنة من فقرا البلد .. أسقوك بالغفلة المحايات .. ما نفع
رتباً كبار .. قلتيلا .. لا
شعراء ومغنين .. خت فيك دوداي غناهو .. ما شفع
الجان يجن والهام يهيم
والإنجليزي أسلم في شان خاطر هواك .. ساعة طلعتي تجيبي عود السيسبان
إتصيدك آ السرة بت عوض الكريم ... مرقنو كرعين الحصان
والجاكي ناط .. كتفتي بالليل في اللمين .. مع الفجر طلبك عفو وسترة
وعفيت وسترتي .. يا السرة القوية .. بقتلو توبة سوية من هتك العرض
يا بت ها كيف بعد الحسن .. ما تاورك قلبك على زول في الأرض... (يتبــــــــــــــع)

ناصرعبدالله
04-24-2010, 12:08 AM
ستين سنة ..
ويا بت بلا النيل وحدك واقفاها .. و النيل إنحنى
ستين سنة
ما جهجك فقد الحسن .. لا يفقهك فجع الجنا
فجع الجنا الويحيد تحت خيل ميجر السجم الرماد
الإنجليزي وقت مرورو على العباد
وجناكي ناش عين الحصان بالنبلة .. ناش طربوشو
قيح العسكري إنحم .. وحم بالسوط جناك في إطن المسيمح ما اتلفت
والهاشم الواقف وقع .. والدم هدر ..
وكان زي محمر في الكجر
بي إيدو قابض نبلتو .. وفي التانية غامت للحجر
صرخت صليحة وشكعت فوق قيحة .. كلْبينا الزرق ومن يوما داك ما شافتن
صيحة البطان قيح البقل .. نهمت غنا غضب البنات عن زفتن
فس .. يا كديس الإنجليز .. كلب الترك يطفر من الفارة وينيص
يا مكري .. صبرك .. يا رخيص
الفافنوس .. البوص .. لحاية الهردبيس
تمر البلد شال شيلا جد إلا الحصا تبل مارقة صيص
كوسلك بلد .. بلدك واباك .. رفسك رفيس
نفضك نفض .. بلدك تضادي .. ولا مغيث
قلبت عليك بطن الرجال .. شقيش تقبل .. يا خسيس
يا قيحة .. حظك في الحياة وفي الميتة مافي .. وموت تعيس
عفنت كرشتك دون ترب .. منفوخة للغربان فطيس
وفوق سكة الماظ الصعب .. هاشم - حلالي - قدل عريس
هيلة آ رجالاً عرستن .. شمش المشارق ليها ميس
هيلة آ رجال .. هتفت نفيسة وحرّقت توبا الوحيد
عقدت شديد .. قرقابا حافيي ودون قميص
جرت الكرارق زي برق .. لفحت من السحارة لي هاشم حريرة وقرمصيص
وكان الفريق إنخم ما فضل بشر ..
ما هزا زلزال الفجيعة المرة .. والدماع طفر
دايرات يولولن الحريم .. صنت وقت صوتك نهر
وكيفن زفتي وشيي ونعلت قفاهو .. شيخ الحلة عن قال لك قدر
ولميتي هاشمك ونبلتو .. وفي إيدو الحجر
صبغ الحريرة .. القرمصيص .. الدم ملاك ..
لميتي زي لمة ملاك ..
آخر عمل خير في البشر
جاك الصبر من وين .. ولا قلبك رجف .. لا آهة .. لا دمعاً طفر
رشرشتي بي إبريق أبو .. وبي دمو نبلتو والحجر
خيط الحريرة القرمصيص .. كفنتي بي رفت القماش ..
الساكوبيس الخاتا لي يوم الطهورة ..
مرقتي لاقوكي الرجال بين الغلب إنقلبو
ومتحزمين زي يوم أبو
دمع الرجال هزاكي
آه خارت قواكي
طفرت دموعك والحريم كسرن عليك
قلدوك رجالات الفريق فوقك ضي الشمش إتكا
وبعض المراضى المقرفين قلدوكي لي شي بلا البكا
وكانت دي أول مرة يتبكي في الفريق ..
وبي حرقة زي كل الرجال الخيرين ..
درفون ضرب بالنبلة طربوش إنجليز ..
عور حصان الإنجليز ..
لا انزح لا زاغ لا جرى
وكانت دي أول مرة شافع في الفريق بي حرقة .. ذي كل الرجال
الناس تشقلو ود لحد في مقبرة
سبلتي ما انقطع الدرب .. دفقتي بي قرعو الطشت .. فنيتي في البير النحاس
جا طشت جديد .. وقرع جديد .. ونحاس جديد .. وما انترو ناس
ناساً تقلب الدنيا.. لو لاقية راس
دور والمعاك ما انفرقو ..
وين وشك الصعب الصلب .. إن صر في الريح بعذقو
وإن صر في الموج غرقو
يا بت كضب ..
معروفة ما من قوة تحمي الفرح واللا الترح حين إندلاقو على القلب
لي دور حديث المنغلين ما إندل من فورتو وهبد
دماً صعد من ها الترب .. لا بد من ينزل مطر .. رحمة وسعد
ما بروح سراب .. هاشم نجمة الفنجرة .. نشهد على إنك ولد
طمنت بي فعلك بلد .. من إولها ولي آخرها
رجعت أبوك من القبر .. قصرت لسنات الكتر .. سكت خشم المسخرة
هزيت رجال جوغة غريق ..
بس كيف نضيق ضيقاً عميق
يبقى الحجر فلخة جبل .. والنبلة تصبح منجنيق
أو بندقية معمرة
ساق نخلة في الطين الطري نازف تشق المقبرة
وقصب التواريخ ينبري ودمك عمار المحبرة
نشهد على إنك ولد .. بركان جسارة وفنجرة
زي ما شهدنا على أبوك .. فرسان قبيلتك من ورا
ويا السرة بت عوض الكريم .. إنك مره
ولدك جدع ما بندبوا ..
حي في وليداتنا .. الدشر لعبن .. طعيم النوم أبو
ولدك بخيت .. ما دام رقد في صدر أبو
ولدك شفيعنا مع النبي .. ولدك يمين يكفينا كلنا مغفرة
وهنا دا الدرب .. حرة قلب.. صرة وشي
ولدك وعدنا بكل شي
وما في إيدنا حاجة نخسرا
يا السرة بت عوض الكريم ..
مع إنو كم سنوات ولا بحراً طمح .. لا سمانا كانت ممطرة
كان كل ما نحفر .. يلاقينا الترا
عن جينا لي دفن الترب .. حسينا كم ملك إندفن
جات غيمة من دون الوقت .. جات نسمة هبهبت الكفن
بي دمو نبلتو والحجر .. خيط الحريرة .. القرمصيص
دخرينا نام آ السرة .. في صدر الحسن
فاتونا بي قدم الصلاح .. سبقوك على جنة عدن
وسابوكي نخلة وسط رياح .. بين الزمن
لكن ضراعك هو الضراع .. على رغم أقداراً قسن
ماسكي الشباطين في الصراع .. لا بودة لا سوس لا وهن
تعبر قليبك زي شعاع .. ما غيرت لونو المحن
ضلك متل بالك وهيط ..
عبرت مراكبك بي شراع صبر إحتمالك كم محيط
ورونا في الزمن العبيط .. يا تربة .. يا كل الوطن
مافيش وسيط إلا الصراط المستقيم
السرة بت عوض الكريم
الله .. أيا مره من قديم
سلطان وعن ساعة الفزع مملوك نشيط
عادية زي قولة سلام .. حلوة لسان .. لكن إذا تغضب سليط
مره ما بتفرط في الزمن .. وفيها الزمن لحظاتو أبن
ساعة مروق الإنجليز .. ضبحت غنيماية اللبن
طلعت على ناس القبور ..
كشحت ورا طرف القبب عيشا المجودا للطيور ..
ومن زمزميتا والدموع .. رشت قبر هاشم عقب قبر الحسن
والباقي لي كل القبور
في توبا صرت هين من القبرين بعد ما انبركت ..
بركة عشق .. بركة شكر .. بركة وفا
غيبة الشمش جبرت خطاها على الرجوع .. والقلب من شوق ما اكتفى
ولسع في غيمة من الدموع تبراها لي طرف الفريق ..
شيلة نفس تطلع مطر .. ختة نفس تطفي الحريق
آ السرة يا دوب يندمل بين الضلوع جرحاً غريق
فاتو إنجليز فوق دمها .. وعين إنجليز
مبروك وحمديل السلامة يذكرك ليلة الحسن سار لك عريس
أو من ضراوتو يذكرك كتل المنيحيس التعيس
ناس تملا في الأزيار .. وناس في كل كيم واقدالا نار
ناس نازلة في الحيشان تقش ..
ناساً ترجع في المضى .. والجايي سودانية مش
السرة ليلها قلب نهار .. الواطة غبشة الناس غبش
والروح خدار من حلتها .. النوم فر طار
باكر دغش شدت على ضنب الحمار
حموها للميجر تخش
عقبت على بيتو العصر .. قصرت مع بتو الحديث
دهت المشايخ والعمد .. سفهت عمايل الإنجليز
ظلم الحكم ياهو الحكم .. كان من جوامع كان كنيس
يبرا السما ..وتبرا آمحمد سيدي .. ويبرا المسيح
ورجعت بلا الموية الروت .. حيضانها لي جدول فسيح
لي دور معلقة للبخور في بيتها عامر بالمديح
لي دور تزغرد ما انقرش يا السرة .. حسها كيف نصيح
لي دور مع الشاي والزلابية مع الضبيح ..
الجوكي بالخرفان سمان .. والجار له تور
لي دور كوبيقاتك تدور
ما قصر الطمباري .. جاك ملك الدليب
رحلت بروش الزاوية عندك في الفريق
آ السرة ما فضى عنقريب
آ السرة بينات الخلوق .. مراتاً الليل آ بحوق
لي دور علي كتف الفرح .. تتعب عيونك وتستريح
لي دور تكلك قاح تكية .. آ السرة دارك ماج ضريح
ويومين بعد سقت الخدار بي إيدا .. جيهت العقاب
قامت معاها تسع رجال .. بي نوبة فوق ضهر البخار
قالت عليها نذر قديم .. واقع عليها نذر عزيز
إن حية في الدنيا ونصيحي .. إن كان تشوف بي عينا فوت الإنجليز
إن كان تطق زغرودة في ضل العلم ..
خلوها تدخل للختم .. حرموها يكفيها الضريح
شوف عين تشوف الأزهري .. وبي ما يكون .. صح النذر .. ما راح وهم
دماعا رقرق في العيون .. عن ساعة المحجوب نضم
وإنشر عِن زروق بزم
ما كان تكون آ قيحي حي .. وأنا أفش مغستي وأصفي دم
من تاني يا رخم الوخم
ما دام حرتناها الأرض .. سندنا .. تيربنا .. بوغنا .. ومسحنا قمحنا .. هسع في وحم
هاشم ولا أسفاً عليك .. وعلي رفاقتك لا ندم
ما دام بقينا أسياد بلد .. ما فتو يوم أبداً قسم
والفوتك يا الإنجليز .. يعقب علي باقي السجم
آفاتن أولاد الحرام .. أكبر من آفات العجم
دي السرة بت عوض الكريم .. سرة عقاب
سرة تواصل بيننا بين رحم التراب
والجاية في الزمن الرحيم
مره من قديم
ما فيها علقنة الرجال .. ما فيها دلقنة الحريم
مره بت قبائل .. قالوا لا .. واختاروا في الحق الجحيم
ومن رفقة الفسل الخلا .. وكانت نعم تدي النعيم
مره من صميم ضهر الغلابة الما بتنكس راسا غير ساعة الصلا
أو ترمي تيراب في التراب .. أو تستشف وجه السديم
جات داخلي زي مرقة غضب من جوف حليم .. في زمن صعب
ومرقت متل دخلة غضب ..
يا السرة ليم ..
آ السرة ليم
آ السرة ليم

ناصرعبدالله
04-24-2010, 12:10 AM
http://mosawiland.com/upload/homed.avi


للتحميل :

1ـ بصيغة mp4

http://mosawiland.com/upload/homed.mp4


2ـ بصيغة avi

http://mosawiland.com/upload/homed.avi

الطير المهاجر
04-30-2010, 09:46 PM
الله يحفظ لينا الحميد فقد قدم ماعجزت عنه وسائل الاعلام كافة خاصة لاهلنا الشايقيه

ناصرعبدالله
05-01-2010, 11:12 AM
هي .. أقيفن .. نورة فيكن
نورة نقاحة الجروف ..
نورة حلابة اللبيني .. للصغيرين والضيوف
نورة ساعة الحر يولع .. تنقلب نسمة وتطوف
تدي للجيعان لقيمة .. وتدي للعطشان جغيمة
والمخلي الحال مصنقر ..
في تقاة الليل تندقر .. تدي لي باكر بسيمة
تكسي للماشين عرايا وفوقا إنقطع هديما
ما عرفتن نورة إنتن .. قولن إنتن شن عرفتن
نورة بت الواطة أخيتي .. نورة اخت كل الغلابة
نورة حاحاية الشقاوة .. نورة هداية الضهابة
الاراضي الياما أدت .. نورة بقت من ترابا
وماشي في الأعماق سحابا
مشتهنها .. والله جابا
للجنوب طبلاً يهدهد .. لي مشاعر ناس تعابة
وللشمال طنبور يسكت .. دمعة الميتين كآبة
ما عرفتن نورة إنتن .. قولن إنتن شن عرفتن
نورة عايز تقرأ قالت .. فوقا حيطة الدنيا مالت
ختت الكراس وشالت .. منجلاً صالت به جالت
لامن إنجرحت به شالت .. للتراب فوق إيدا كالت
ومرة يوم في الدونكا لدغت .. جاء الفقير بالليل حواها
ويوم ملاها الهم قطايع .. جاء البصير بالنار كواها
ونورة ما قدرت تمانع .. تقنع الناس المعاها
ومرة شافت في رؤاها طيرة تاكل في جناها
حيطة تنمغى وتفلع .. في قفا الزول البناها
في جنينة سيدي سمعت .. تمرة تصقع للوراها
الأرض لابد ترجع للتعب فوقا ورعاها
شافت النيل موجو لاها
الخليقة بقت إلاها
الشمس طبقت ضحاها
نار عقاب إنساب مكسر .. فوق تكليات متاهة
وضو من الله .. رهاب مكتف في وتيد الليل معاها
بين حضر بلدا وخلاها
فسرت للناس رؤاها .. وقالوا جنت ومو براها .. ونورة زادت فوق شقاها
وصدت الأيام تخش .. تبني لي عصفورة عش
في السواقي تشوف عزاها .. لما شوقا يسوي .. وش
تسقي تزرع .. تسعى تصنع .. للنهار في الليل تخش
عرفت الشقا والشقاوة إلا ما عرفت تغش
شايلة طولة البال من الله .. ومن أراضينا الإثارة
وماشي تكدح طول نهارا
وترجى لما الليل يفلل .. تسرق ألمي عشان خدارا .. عشان صغارا
ولما ترجع لي ديارا .. تنزف أحلام الفقارى
من عويناتا الحيارى
لي غبار الحال تقش .. فوقو للآمال ترش
نورة تقعد صاحي تحلم .. بي بيوت بي نور ودش
وبالمحبة تشق دروبا .. ولي قلوب الكل تخش
نورة تحلم بي وجود .. ما مشت بينو القيود
أفضل أفضل بي كتير .. بي وطن من غير حدود
نورة تحلم بي عوالم .. زي رؤى الأطفال حوالم
لا درادر .. لا عساكر .. لا مظاليم لا مظالم
نورة تحلم .. ولما تحلم نورة ترجف
ولما ترجف نورة تحلم ..
ولما ريح الواقع المر .. لي عشيش أحلاما ينسف .. نورة تنزف
ولما تنزف بالا يهتف .. يوم حا تنصف يوم حاتنصف
وتبدأ تحلم .. ولما تحلم نورة ترجف
ولما ترجف نورة تحلم
صاحي تحلم.. وصاح بتحلم .. صاح بتحلم


تمت

ناصرعبدالله
05-01-2010, 11:16 AM
وريني شن طعم الدروس
ما دام بكانا مشي قطر
وكيف ذاتا ترتاح النفوس
تقبل قرايتاً في سفر
يا يمة حان الامتحان
من وقتو بس فاضل شهر
ما اظنِي من جور الزمان
انجح واجيب ليكم نمر
وريني شن طعم الدروس
ما دام بكانا مشي قطر
وكيف ذاتا ترتاح النفوس
تقبل قرايتاً في سفر
كيف زاتي يا نبع الحنان
انجح من الام السهر
عمرك سمعتيلك جبان
خاض المعارك وانتصر
زينوبة كل ما افتح كتاب
القاك في اول سطر
القى الجداول والصحاب
القى الجناين والتمر
في الحصة عقلى انا قام سدر
يمه المدرس لو فكر
كان يلقى قاعد فوق ككر
في الدونكا لسع ما فطر
يسمع كليمة يا عشاى
واغلى الحكم عند الضجر
انا قلبي كلو على جناي
وقلب جنايا على حجر
والله مش لو كان نهر
لو كالني بسيطان بقر
ما دام عقيل الجن سدر
ما اظنو من عندك حضر
بذاتو ابوى تلقاهو قام
فاتح كتابو مع الفجر
يقرأ ويرتل في كلام
ما بفهمو الناس الكفر
زينوبة كر من حالى كر
قاعد لى فوق كيمان جمر
غربة وكمان حالاً فقر
عذبني قبل اصل القبر
الشوق متل شوك الكتر
طعن الجسم لمن خدر
والله لو ما بنقبل
ما كان بفارقك بي شبر
زينوبة دنيا الاغتراب
خلتني زي ورق الشدر
انحت من عدم الشراب
عم الاراضى وانتشر
الغربة اصلوا طعيمة مر
لكني بعقد بالجبر
لمن سنين الهم تمر
يا ربي الهمني الصبر
تمت


للتحميل (غناء محمد كرم الله) : http://www.4shared.com/file/113825623/3023c0e5/___online.html

تنبية : الرابط منقول من مشاركة بالمنتدي للاخ سرو

حسن الكدوس
05-01-2010, 01:33 PM
شكر الله سعيكم يا شباب
ولى مشاركة للاخ والصديق حميد سوف انزلها قريباً انشاء لله بس نتفرغ شوية وسوف تعجب الجميع انشاء الله،،،،،،

ناصرعبدالله
05-04-2010, 12:16 AM
هاشم الأخضر
محمد الحسن سالم حميد

جايي أغنِّيها وأقول
طيبة زي قولة سلام
قاله تربالاً دغيش
لي مراكبيةً تجول
شاله كف الموج بشيش
لي بنياتاً بيردن
تمّن أزيار السبيل
ومدّن إيدن كورا .. كورا
رشرشن قلب الشتول
أدّن الطيّانة دورة
وشويمن تالا المدارس
خدَّرن كل الفصول
صفقّن هلا يا حبيبة
جايي أغنِّيها وأقول
طيبة جبّارة خواطر
وجنَّها الريح التطفِّر
للعصافير التكاجر
ما تعشعِش إلاَّ وين
في الحراز اليومو ماطر
ولاَّ بين سمرة النخل
التقدِّم تالا باكر
وكت أكون صبحان مسافر
زادة ليّا معَ الزوادة
صنّة بسمعا في البنادر
ماب أقول لك ما تساهر
ساهر السهر اليفيد
لاب أقول لك ما تظاهر
وإنت هسَّع كم شهيد
ماب أوصِّيك وإنت شاعر
تبقى عشرة على القصيد
تدِّي يوم الليلي باكر
أدّك الأطفال نشيد
إلاّ أقول لك أوعى حاذر
أحذر أولاد الحرام
المطاليق
المساليط
الخواذيق الضلام
وأحذرك صنت قبالي
وقمت تمِّيت الكلام
جايي أغنِّيها وأقول
داخلى فيِّ عديل وهيطة
زي وهاطة النيل وبرضو
مارقي منِّي هديل موالف
زي ولِف تربال على أرضو
علّمت شفّع غناي
يبقوا آفة متين ويرضو
وناس سمح جيبو ومجبّر
برّة داراته آب يعرضو
عرفتني على الفقارى
قالت إخواني الكبار
المظاليم الحيارى
قلت أخيّاني الصغار
أمِّي قالت أبوي مسافر
إلاَّ نومته بي مرارة
تصقع الحجر آعمارة
أرفع الحجر آعمارة
ولمّا تاوق بالعبارة
بي قدح مونتو وجسارتو
شفتو واقع من عمارة
القدح بي مونتو روّح
أمِّي ما لقت الجسارة
إلاّ وكتينا الكبرنا
وأدّت البلد البشارة
ويا بلد جيت مبتليبه
جيت أغنّي المن عيونكن
يبدا يومه وينتهيبه
التشيل الليل تذاكر
أو تفاكر في حبيبه
ينقطع ضهر القصائد
عند مريقته من وشينا
حلّة قرية مدينة ميناء
تمشي فوق أتره الغناوي
الأناشيد التقاوي
بالمواويل والحكاوي
سكة الجوع الخرافة
وتنتحِن لهة المسافة
ينقطع ضهر القصائد
الأناشيد الغناوي
المواويل الحكاوي
ينقطع ضهر المسافة
لمّا تقفرا بالمواكب
منصهر بالدم هتافه
والمواكب ما تجيبه
ينقطع ضهر المواكب
الأناشيد الغناوي
المواويل والحكاوي
ينقطع ضهر الحبيبة
وما تسيبه
جنّها وجن المهازل تتبرج
من إذاعات هراء
وجرائد إمِّعة
والدواخل تتفرج
في طنين الرؤساء
اليكفّي العالم التابع
موتاً ودماراً وفناء
تكفت الرادي وتذيع
لا دواء
أيها المرضى
لدى الزمن البنوكي
العتلي الذنيم
لا عليماً بك غيرك
كصغار الشعراء
أنت تنتفخين برداً
أو شموساً محرقات
وعواء
أنت تمتلئين هذا العام
جوعاً أو خواء
أنتِ ترتعدين صيفاً
يا بيوت الفقراء
أنتِ تحترقين
حتى أن يجئ
من يحيل النيل قسراً
نيل ماء
وينطلق ضهر القصائد
الأناشيد الغناوي
المواويل والحكاوي
بالحبيبة الخيرا زائد
ينطرح وجه الغلابة
يا إذاعات يا جرائد
والبلد فوق اللمليس
انطرح في خاطر باكر
وجيت أغنِّي لكم حبيبتي
إلاّ يا غبش العساكر
نتَّفت عصب الكمنجة
وصادرت منِّي الدفاتر
دخلت فيِّ الطبنجة
فرَّ من رأس غلبي شاعر
وركَّ فوق كتف الكلام
والعيون كانوا المحابر
هرَّب الشوق الحرام
من بيوتاً في المقابر
لي شموساً في الظلام
هاشم الأخضر سلام
التحيات النواضر
نبدا بي مين الرسالة
ونبدا من وين يا رفيق
عازّة فوق قيف البداية
وإنت في آخر الطريق
وإحنا بيناتكم محاصر
شوقنا بالريح والحريق
إحنا بيناتكم نصارع
زيّنا وزي الغريق
مرّة نمسك في المياه
مرّة في ضل الوطن
مرّة في عيدان حزينة
زنّت الريح في البحر
فنّت الريح من حراز
لما فطّاهو المطر
مرّة نمسك فينا آه
يا بحر مأساتنا آه
يا بحر مأساتنا بس
يا بحر مأساتنا فيق
يا بحر مأساتنا أوسع
أوسع أسّع ولاَّ ضيق
يا بحر بي غادي هاشم
هاشم التحراهو مين
هاشم الشكّعت فوقو
ريحك المزّع شراعو
موجك الصادربو شوقو
طوقو والزمن القضاهو
تالا هم باكر مسافر
ما رجف ساعة وداعو
هاشم السوِّيته فيهو
وسبتو يضرب بي كراعو
ما غرِق غرقت مراكبو
هاشم الأخضر ضراعو
ما يبِس يبست هدومو
ما حرق شومش شعاعو
وبقَّ كالحلم المصوبر
في الخواطر كوم أماني
هاشم العشم المعتّق
في خوابي الجوف أغاني
يا بحر تحراهو مين
يا بحر بي غادي زولاً
ماب ندلِّي الإيد بلاه
إيدو في إيد الرفاقة
وإيدو بي جاي في الرسن
ماشي في خاطر الغلابة
البيفصح والرطن
سار مقوِّنو التعابى وجايي
قاصدك يا وطن
والجا قاصدك كالزمن
ماب يصدنو العوارض
لاب يهدّنو المحن
ويا محن هاشم قمحنا
فأسنا كراسنا وقدحنا
هاشم المجروح جرحنا
هاشم الفرحان فرحنا
نلقى في زينّا وسمحنا
يوي وسي نغماً صدحنا
وفي ترحنا صبر ملحنا
نلقى في كل المراتع
في المزارع والمصانع
إيديه راية وفجر فاقع
في المدارس والمسارح
في البيوت فطن الشوارع
في الكنائس والجوامع
نلقى في كل المواقع
هاشم القاصدنو نحنا
هاشم الأخضر ضراعو
ما وقع يا نيل في فيضك
وإنت ماب يغباك شراعو
هاشم السمح المعافى
هاشم التسلم خطا
ويسلم الدرب الخطا
هاشم الكم لله أدّا
والبرادى تدور غطا
وشن غطاها بلا غطا
هاشم الحسن العطا
هاشم الحسن العطا
هاشم الصاح يا خطا
هاشم الحسَن العطا
سافر قبلنا وقلنا ليه
يا ماشي للوطن الوسيع
يا ماشي يا كم زول يجوا
يا جايي بي كم زول مشوا
يا ماشي في كم زول تصل
رسِّل سريع
وبلِّغ سلامنا
الشوق فظيع
سلِّم على المحجوب
وجوزيف والشفيع
سلِّم على حلمك محمد والمسيح
سلِّم على نفسك يا هاشم
ود جميع
من فات يوقِّينا الخطر
من قولب الحر والصقيع
بيناتو شان يطلع مطر
أو يحضن العالم ربيع
الناس بترحل قول لو ليه
شان حق يفضِّل ما يضيع
الناس بترحل كل يوم
والحق معاهو على العموم
الناس بترحل وماب تضيع
والحق بيفضل وماب يضيع
الحق حيرجع يا بلد
حقِّك حيرجع ليك وبيك
قوليها وإحنا معانا حق
الحق حيفضل يا قطيع
نتلاقى فوق قيف الفجر
بين التيقظ والهجيع
ويا إنتو يا نحنا
يا نحنا يا إنتو
يا أبّان ضميراً تاه
نتلاقى يوماً يوم
وبيناتنا حد الله
ويا إنتو يا نحنا
يا نحنا يا إنتو
يا نحنا يا المحنة
محنة
محنة
إحنا
القلبِ يشوف قبّال العين
من قبلِ أقابلك شفتك وين
في ياتو عريس مخضر إيدين
بين حضنو حلم يلصف لا وين
والناس في الدارة إتنين إتنين
كل خطوة تشيله عديلة وزين
قوق قمريتين فوق كروقتين
قيساب الشوق نوريقو متين
يا رش الغيم يا ريحة الطين
يا بختي أنا وكل الصابرين
يا زول يا زين أنا شفتك وين
في ياتو صباح باهي ووضّاح
الطير صدّاح للزهر الفاح
صفق البرسيم للطل مرتاح
والناس أرواح في حضرة راح
العشق الدغري العذري الصاح
يا قومة بدري وفوتة الدار
من أجل حلم راجنو صغار
في ياتو محطة غشاها قطار
إندهده فيها وقضّى نهار
حس العمال تحت الأمطار
الربط الخط ما فكَّ الخط
يا كم في الخط هيلا وأنفار
والناس النار أم قلباً حار
فتحوها بيوتن للسفّار
الزول الوافي العوّافي
يدِّيك العافي من المافي
وما يأخد إلاّ الأخبار
لاقيتك آهن لاقيتك
في سرِّي ندهتك ولبيتك
مع إنِّي ولا خابر إسمك
لا الجيهة المنها لابيتك
إنت الإنسان الغنيتك
إتمنوا الناس إتمنيتك
يا ريتك تخبر ياريتك
كم صبرِ وعشم إستنيتك
لو قبلِ أقابلك ما شفتك
ما كان في حزَّتي حبيتك
أنا وإنت قبل ده إتلاقينا
شقِّينا على الدنيا جداول
جبدنا زمانا الكان عاول
والعالم سوِّينا جنينة
يا رتة غيمة عتاميره
ربّة عربان وطنابيره
قندول الشوق الحين لبّن
جاب لي بيّوضة عصافيره
يا ريح الزنج إذا اشتاقت
تفتِق بأنفاسه مزاميره
يا القمحة السمحة المدخورة
قسِّيبته قلبي مطاميره
أنا شفتك وين ؟؟
قبلِ أقابلك
يا دنيا الريد ومقاديره.

سماح
05-04-2010, 09:19 AM
ياسلام عليكم والله اجمل قصايد
نرجو المزيد

ناصرعبدالله
05-06-2010, 11:41 AM
عَبيّت زُوادتي الرّيقة من بايت القَوَى ..
الوطن الدّشَرْ ...
غيمو الرّبَطْ
ساعة بقينا من الرّوَى ..
فرسخ مطرْ ...
سافرت لِكْ بأشواقي لآخر المنافي ..
بَحّتَّ في كل المخافي ..
وكُسْتَ عَنِّك في الخُرَطْ
في التواريخ الرؤومة ..
بين نقوش نبتة ورسوما
في الطّرابيل العظيمة
وبين لُغة مروي القديمة
وخَطْ .. في خَطْ
راجعتَ بِكْ كل الاسامي... البعرِفا
كل الُّجمل .. حتى الضمائر ... وأحرُفا
صحّحتَ بِكْ زمني الغلطْ
باخَتّبِكْ قلبي الشّقِى ..
وبشرتو بي لُقْياك عَبَطْ
يا طيبة زي شارع وَسَطْ ..
يمشيبو كادِح وارزقي
وممتنعة زي قبض المياه
والمافي
والما بتلقي
غالِبني جيتك أصادفا
لا في المعابر والموانيء المُترفة
لا في المطارات الوسيمة كما الفراغ ..
لا الأرصفة
كل الدّروب التّعرفيها وبعرِفا
التألفيها وبألفا
خَشّيت دغيش سِعْن الدِّني المرفوع على سِيبات وفا
رَوّابي كان قُطّاع غني ..
وشوقاً مَفورِنْ وانكفى
قِدّام خُطى الوجد الِحفى
غابت صباحات القُرُب ...
وبَقّت ضلامات الجفا
و ضَي المصابيح الجريح ..
كِترْت علي الرّيح .... وانطفا ؟؟؟
هوي يا بِنيّة من الغُبُش ..
من حَرْ أباطهم مُترفة !!!
وين انتي شان نرقد قَفَا
وين انتي وين .. في يات دُغُشْ
ما بيننا بين غيبتك كفى
لو بَقّ حِسِّك في هشيم دبش الضياعات والسأمْ
زي أغنية شوق ..
زي نشيد ..
اندبَّى همسِك زي نغمْ
او خبّ خطوِك زي شهيد ..
رَفّتْ مسيرِتِك زي عَلَمْ
ما كان مهابات الصِّقور
(نخّت) تحت رخّة رَخَمْ
وين انتي وين ...
ما كان هجم ديش العجم ....
والدِّنيا ضَوْ
وامسن سبايا الاغنيات
العُزّل ... ألآه ... شِنْ تسوْ ؟؟؟؟
ولافي الكفوف الخاوية سيف ...
لا في الكتوف الزاوية ضَوْ !!!
دَلّجتَ درب الاربعين ..
صاقَرْ قوافل الرِّق .. سنينْ
برّاً
وبحراً
حتى جَوْ
أشريكِ قُلْتَ من الزمنْ
واعتق معاك رِقّة مشاعري ازوِّجك كل الوطنْ
كل الرِّجال الحملو ارضك بالحلال ...
وافتق سحاب العشق شَوْ
ولا بنتي في الزِّنج البَجَمْ ...
لا كنتي في العرب الأشوْ
لافي شلوخا ..
ولا الوشم ..
لا في شيوخا ولا في عَوْ
بل فيكِ غشّاني الزمن ...
ادّاني صَرْصَرْ وبعتو نَوْ
كوترني .. بي حبل الوَخَمْ
كُلْ ما انقطع توْ .. باَنْ لي .. توْ
ناقِزْ وراكْ ..
ناقِزْ وراكْ ..
ناقِزْ وراكْ ..
انترْتَعَتْ رُؤياي ..
هَكَعْ ..
ما بين أريت ... يا ام زين ... ولوْ
وبين تبقي وين ..
لاكْ في الوجود
لا في العدمْ
لا في الحقيقة ... ولا الوهمْ
لا زين
لا شين
لا البين بين ..
يا راحة الباقالو هَمْ
لا عنِّك أفتاني الزّمان ..
لا مِنّك إنقطع العشمْ
يا ريتو أغناني الكَمَانْ
آ طيبة عن صوتِك نغمْ
من أعلى ميضنة فيّي كان أعلنتَ موتِك للأُممْ
أو .. صِحْ بجيتك لى الرِّمَمْ
لكنو صمتك طال ...
وحَانْ ميعاد زفافي على الألم
قلت ارفع ايديني واقول ...
خاني الصبر ..
خان وانهزمْ ؟؟؟
زي ما انهزم كمّين نبي ...
وخانت على التاريخ ذِممْ
آ طيبة أخافك ؟؟؟ واللاّ اخاف
السُّبة واللّعنة الوبيلة ؟؟
تحل وراي كما الجفاف ؟؟
أو..... تار على اكتاف قبيلة ؟؟
معلمي اللّــــه من عتاد ..
يبرِدْ حشاها ... ولا في حيلة
بَلا تأمِّل في البُعَاد .. سنين ...سنين ..ودنين ... طويلة

وكيف ؟؟ وكمْ ؟؟
والإنأخد بالدّم غَصِبْ ...
مافي البرجِّعو إلاّ دَمْ !!!!


آ طيبة هيلة ..
سلام
عوافي
يا أصيلة .. كما المَعَانا
أو .. بديلة عن اللِّي مافي
يَمّه أدخلي على غُنانا ..
يا أمُرقي من القوافي
يا أحذرينا وما تخافي
وما بنخيّب حاشا ظنِّك ....
ينفخوها وما بتموتْ
حيّة نارِك ... حيّة يوتْ
خُتِّي قِدْرِك في الأثافي ..
يوسف الفي الُّجب بيمرُق
ضاربا ريقة اليلقى قوتْ
روقي أكنِّكْ ..
واللاّ كَنِّك ..
تاوقي في البحر الخرافي ..
يونِسِك في ياتو حوتْ
سَمّ ينده جوفو حافي ..
وهِّطينا على الأثافي....
وهِّبي نارك لا نموتْ
يا حمامة غار محمّد ..
يا خيوط العنكبوتْ
يمة كُسناك ضُمّة مافي ..
الدّروب وين غيّبنِكْ ؟؟؟
في سؤالنا الضّارِي عَنِّك ..
سَدّن ابوابِن بيوتْ !!!!
والبيوت البشبهنِّك ..
انكرننا وانكرنِّك !!!
ننكشف لا لوم عليهن ..
بس ها كيفن يسْتُرنِّك ؟؟
وفي سُكاتنا الجاري مِنِّك
رحّبنْ بينا السجون
الدرادر والمنافي
فينا مَنْ روّح فدايتك ..
وفينا من لا زال ...
وفينا
مافي من بدّل لرايتِك
وانتي في ذات السكوتْ !!!
التراب يتشهّى حِنّكْ ..
السِّحاب عابر يفوتْ
واللاّ يكمُد للعيون
بالغُبار غُمّة وسوافي
وانتي يا آخر المرافيء
يا امْ وجوداً بات خرافي
في صحاريك داخ غفاريك ..
من برِد زمنو الرِّعافي
دون كواريك ..
مات واتاريك
غبتي بي كل المدافيء
يا لساريك .. لاك موافي
لا كمان قادرين نسيبِك نمشي في الزمن المجافي
ما عهدناك عاد تخافي
كانفعالات المُراهِقْ ..
شابكة كالشّجَر الضِّفافي
خيلِكْ - الرِّيح - حين تنهّدْ
لوحة التاريخ بيشهدْ
لونا والدّم الإضافي

إلاّ يا وتري وغُناهو ..
راحة أنغامو .. وعَنَاهُو
يا نبي الثورة الغشاهو
برداً أكتر من غُتَاهو

الاّ يا بِتْ جاك زمن دارِعْ الأيام قُلُبْ !!!
الدفاتر والكتبْ
إستحمّتْ بالغُلُبْ
التلاميذ النُّجُبْ ..
طيّشا الفقُر ....
الغبينة
صنّت الأجراس وجينا
إلاّ يا .. آخ ... ما لقينا
الجوامع مستباحة ..
والمصلّين صَرْ جُنُب
الكنائس جالبا دينا !!
والمدينة تبيع عوينا !!!
لي النخاسية الغُرُبْ
لي اللُّحاسية وعُقُبْ
تشتري آفات الرُّعُبْ
والهتافات الجُرُبْ
عربدت باسم السّما ..
توّكت ريح السُّحُب
ومن ضُروعاً .. كان تكُبْ
كل أطفال الفقارى ..
وكلهُنْ في فَدْ شُخُب !!!!

في اللُّغة الجرسية .. سُبْ
في التُّقى النجسية .. سُبْ
في الوقار الفاوه ... سُبْ
في شعار ما ساوى .. سُبْ

واللاّ اريت ما كُنّا منك ..
لا في بيناتنا القُرُبْ
كُنّا اقلاّ نشوفو عادي
التردِّي الجاي وغادي
سادي في النعم الزيادي
وابن آدم بالأيادي
لى سُترة الحال يكافِت ..
غابة غابة ..
ووادي وادي
ينبح المسكين يا طيبة ..
طيبة يا راحة الفتارى
وواحة الفي الصّيْ حيارى
عورة الشُّرفاء الفقارى
سُترتها ولُب المباديء


يا بنية الأُجّر ام خير ..
أو نبية الشجر الطير ..
يا رسول البسمة للاطفال ... حبيبة نيل بلادي
يا طليقة الغيم ..... عروس طين البوادي
المناديل بانتظارِك ... والايادي
معبّا شوق ..
يا طيبة ..
طيبة ..
طيـــــــــــــــــ ...
ولا حياة لمن تنادي
بَكاك بكيتني .. سَكَتْ برايا

كنت حافي على إبر ..
بِتّ حابي على شظايا

من انكسار رمّاشْ عيونِكْ
فوق مسام سام المرايا
من كُتُر تعباً تعبتو ..
قلت ألقاك ما كَفَاية
يا تكمِّلي فيّي صمتِكْ
يا أخلِّص بيك غُنايا
دي الحنايا وراكِ يبستْ
وامست آشميق الخلايا
وبِتّ أمسِّرْ من حروفِكْ
وأفتل الأيام .. قراية
نبّقْ الغيم .. برضو إرضِكْ
ما استجابت لي سُقايا

وقُلتَ اخطِّكْ بي دمايا
يا اصابعيني ابقي ريشة
ويا شراييني الدواية
وقنِّعي الرِّيح الورايا
النّكعْ بالخيل ..
محالاً ..
يدِّي بي بَقَر الدّرَايا
انتهت كل الخفايا
وقلت اكوسلِك في الخطايا
لمّا في ذات لُقيا حَرّ ..
وزاد هواكي على هوايا
وقمتي خنتيني معايا ؟؟؟
اشتكيتِك لى القمرْ
وضُمّتْ انسام السِّحرْ
الرياحين والزهرْ

شهدوا ليّ عليك يا اخيّة
جاء القمر سوّاك بريّة
وباعتزاز بى نبرة حيّة
صاح في جمعنا يا بريّة
من يكن من غير خطيّة

؟؟؟؟؟؟؟

وقُمْ رميتِك بالتحية من اللِّي فيّ
فيا .... وفيّة
يا معاكي تغيبينا ..
يا تعالي وابقي جية
للبعيشو غَصِب عشانِك ...
والبموتو بحسن نية
حَارْ علينا بعد طراوة ...
وبين عيون احباب تقيّة
نبقى في كتمة وشقاوة
وبين أرَاذِل
وارزقيـ….....ـة

كفاك شكية !!
كفاك شكية !!
يا التّشرِّكْ لي غمامك ...
وتحتَك الانهار قوية
ما انسرق ذات ليل سنامَك ...
لو قبيل كُسْتَ الحوية
كفاك شكية !!
وما بيضيع حق لا قضية
لو في طُلاّب من وراهو
ونية بيضاء وبندقيـ……ـة

ناصرعبدالله
05-06-2010, 11:43 AM
آخر الريد
محمد الحسن سالم حميد ................

جاييك من آخر الريد مشياً
على الأشواق
عز الليالى البيد آنست
نورك باق
خبيت مشاعرى شديد
الدروخة الساساق
كلما لك انت بعيد
توميلي بالاطواق
بى آيه تفتحى الأبواب
للجاك عديل ودنا
داير عينيك قراب وتبقيلي
دار ودنا
لو بالمحبة حباب إبن الملوح أنا
لو بالنغم زرياب وما خلى
فيك غنا
لو بالعلم دا كتاب مفتوح لك
ألف سنة
لو بالضرب دي حراب عنتر
مدارقو هنا
لو بالرسم جذاب عند أمو كل جنا
لو مو الشمس كضاب البدر
يضوي سناء
لو بالقرش وين جاب ما جاب
براهو هنا
لله كم خطاب تتمنى حالو مني
يا بت بلا استغراب تكشحلى
جور وضنا
وأنا اجدر الخُطاب واكتر قلوبه عنا
راجيك تقولى حباب يا ......
ريدتى هاك كفنه
فالدنيا دون أحباب غيمة الضباب دفنه.

ناصرعبدالله
05-06-2010, 11:47 AM
بنيات الجرف
حميد

كلم بنيات الجرف
وكل البنيات
من طرف تتبري من بحرا غدر
اتغاب ما راع الولف
صاد الاخيتين بغدر
ليك حق يعافيك الحراز
واليصطفيك طرفي وعشر
يامتوك الناس العزاز
نابع قليبك من حجر
ما بتنفع انت بلا الخريف
الصاقعي والريح وامطر
تنزف نزيف ما يحوش قيف
لا من يقولوا عليك خطر
ما ظن نخيلك
هز فوق سيرت عريس نازل البحر
ما طالة موجك ما بيضوق
لا يضوق الناس غير كدر
عودنلو قشكن النشف
يدغي ورويسات السعف
مكسور خويطره في قحف
ترغي وتسف ملح الأسف
عودنلو والسنبر برق جنحاتو
بالأشواق سحر
قاصد جريف ود شيخ
يخف لي مويته من دون البحر
والليلة زي غيما رعف
حين طال علي ريح السفر
يا حليلو زينا
ما عرف جوز القمريتين طفر
يا دنيا يانا ربات كتف ا
رغم الفجائع لا رجف
لا قال عوارضي أبت تخف
في بألو كم تاريخ سلف
لوكأن يشيل في الموت
زرف دمعات أسى وحرقه أسف
آو بالعلي الحال يعترف
كان عن رسول الله وقف
كلم بنيات الجرف
وكل المكاليم من طرف
هي الدنيا كلها كم حرف
لمن يطول فيها الأسف
هي الدنيا كلها كم حرف
لمن يطول فيها الأسف .

ناصرعبدالله
05-08-2010, 12:16 AM
شوك الشوق


شوك الشّوق .. لي الشّوفه آ خي
ضارب في إطن النسج الحي
يا مُنقاشو أحزاني إنشرّت ..
وادي الفرح إتمدّدْ صيْ
يا راحلين عِنْ دُغُش اللّيل ..
ما لاقيتو جناياً زي
تكية نخل الفجر الجاسر ..
فوق لي المترة عراجين ضيْ
يا رعّاوة العرب الرُّحّل ..
ما لاقاكم في المطراني
في كاويق الجرف الأمحلْ
بين أسراب الرهو الرّاحل ..
ساند أكتاف اللّيل الميّلْ
عِنْ ساساق الغيمة عليكم
بين رقراق الخيمة معاكم ..
ما أديتوهو شوي بي حَرْجَلْ
آ رطانة الليلهم ليّلْ
ما لاقاكم في ونساتكم
بين الشّادي وبين كاساتكم
في صلواتكم ..
عِنْ دعواتكم
أو دقساتكم
عِزْ خلواتكم
زول زول الله إن ِمحِن آ بسألْ

الهبّاد لي غُلْب اخواتو
الفرّاح عوّان الحلِّي
الفدّار لي الليل ظلماتو
آ نجمات شِقّيشْ قولِنلِّي
ما لاقاك طالع مندَلِّي
المطعوم من طيبة أمّاتو
كالفَجّاج الندّ نباتو
موج البحر الأحمر هوجتو
وعِرْق العَرَق اللاّوي ثباتو
جانا الشُّدَر الأخضر منو
ونار الشُّدر الأخضر جاتو
راح شقيش أب قولاً واحدْ
ليش ما يرجع من غُرباتو
طوّل .. طول ما طلّ علينا
وقاطع مننا جواباتو
الغابات جات تنشد منّو
العُربان راجين جيّاتو
أديناهم عَلَقو وعَرَقُو
وصورتو يقلِّب في كتباتو
ضُل رشّاشُو ..
ركيزة زولو
ساعات سِلْمو ويوم حوباتو
سِنْ طوريتو ..
ولون أبرولو
وحِسْ طمبورو البي نغماتو
لهلب عشق النّاس الفُقَرا
وبرّد جوفِن ..
بغنواتو .. الدّخَلت فينا ..
تمرق جينا على جلاّتو
وجيداً جينا ..
طلقنا وشينا ..
ووش أطفالنا الليلة حلاتو
غني معانا غُنانا هويتو
غني العالم غني حياتو
لا ساومنا عليها قضيتو
ولا فكّينا من إيدنا وصاتو
ألف شليل يا نورا يفوتو
شان ما يجيكي شليلك ذاتو
ولما يجيكي .. شليلك ذاتو .

التحية لي حميد ورحم الله المبدع مصطفي سيد احمد

ناصرعبدالله
05-08-2010, 12:19 AM
نواري


الشّوق من حاطِفْ .. لا قاطِفْ
يتلمّ .. يهز ليك يا نوراي
يا دَرَقة وسيفْ
يا حُضناً كيفْ
من شَرّ الصّيفْ
والشتا ضاراي .. ضاراي
يا شعلة عز بقّت جوّاي
عدّت بي ضلام بحراً عاصِفْ
يا نور قاعِدْ بِكْ .. قايم بِكْ
شايلك مورودة ومتوكِّلْ
يا نورا على الله .. علينا
والفرج القرّب .. وحايم بِكْ
يا بِت العرب النوبية
يا بت النوبة العربية

بي فردة نخوة بجاوية
أو شدر الصّحوة الزِّنجية
دسيِّني من الزمن الفارغ ..
من ريح المتعة الوكتية
من شر السّاحِقْ والماحِقْ ..
بين دَبَش المدن المدعية
والليل يتحكّر بيناته
كحّل بي دبشو عويناته
يا شمس الناس المسبية
روّحت اتنسّم أخبارِكْ ..
لا تشفَقْ قالو لي نصيحي !!!
وأنا عارفك ممكونة وصابرة ..
لكن لي ناس إلاّ تصيحي
جواي مأساتك مغروسة ..
يا طفلة تفتش في باكر
ما بينات نخلة وأبنوسة
الجوع العطش الفَدْ واحدْ ..
الفقر الضّارب زي سوسة
الخوف والحالة المنحوسة
يا بحر الحاصِلْ .. لاكْ ناشِفْ ..
لا قلمي الفي إيدي عصا موسى

يا ام غلباً حار .. ينْبُرْ فينا ..
ما عدّ صباح من ها .. الميناء
كَدْ الكُدّاح شايلا سفينة
النّاس عوجات .. تحرِسْ .. ترْجَا
ترجعبو سلاح وأنوار زينة
بمبان .. شوفونير .. آفات .. ويسكي ..
للنّاس الدّمّنا بنزينا
فِقَراً تسترزقْ من دينا
بايركس إبريقن ..
والموية .. تتحدّى بياض الوزّينة !!!

خرزات السبحة أمريكية ..
خُصَل الموكيت إيطالية
دفتر شيكاتاً ربوية ..
في الجيب .. والسيرة النبوية
جنب مصحف جوة البترينة
تقروقتِك .. ديمة على القبلة ..
ميهية إبريقِكْ بي طينا
السِّبحة أصابعِكْ يا صالحة ..
يا بت النَاس الصّالحين
الذِّمَمْ المشرية الطّالحة ...
شتّان بين دينِكْ وبين دينا
شتّان بين يُحمد .. وحاج أحمد ..
وقُدّاس ناس ياي وسلاطينا

شِلْناكي مع الخلِق النايحة
على أرض فلسطين الفاتحة
البركة في رملِكْ يا سيناء
إرتج أسير الدعوات
ما بين آمينك وآمينا

يا نورا .. شليلك ما فات
بي عدلو شليلك جاييكي ..
ما جايي ألِم التمرات
لا أبكي وأقابل بالفاتحة ..
في زولاً ليّا مِرِضْ .. ماتْ
جاييك أتزوّد من غُلبِكْ ..
واقفِر خطأ غيمةً ما جاتْ
نَبْحَتْ لها كُلّ المعمورة
والنّاس يوم تمرُقْ مدخورة
يا نورا نسلِّكْ غنوات
وآمال بي باكر مضفورة ..
طُلاّبك وأقلامنا هويتِكْ ..
قدّامنا قضيتِكْ سبّورة
رتّبنا الخرطة البتوصِّل ..
أدِّينا الخاطر يا نورا

بالمدّ الثوري المتدافعْ ..
فوق دربِكْ تَبْ ما متراجعْ
رغماً عن عَنَتْ الأيام ..
والزّمن الجهجاه الفاجِعْ

ما رمل الدّرْب الوسطاني ..
وكتيني الرّاحل وصّاني
لا ترجع ساكِتْ يا شافِعْ
لا ترجع شافِعْ يا ساكِتْ
خُتْ بالك وعينك في الشّارعْ
لا ترجع .. لا .. لا
الشَارع فاتح في الشَارعْ
الشّارع صَانْ .. صَانْ الشارعْ
جاييك كايسلِكْ يا نورا ..
لا كُتْ متسوِّل لا صَايعْ
لكن العسكر باغتني ..
يا نحس الحلم الباختني
يا عفن الأيدي المأجورة
نوراي الخطوة الجابتني
للمدن الصِّبحت مهجورة
يا ناسي بطاقتي عويناتا
البضهب عنِّك بيناتا
تلمحني الفقراء .. وتلفحني
في ليلها أغني معاناتا
الفجر الكاذب يرْشَحْني
ترشَعْ بي الواطة سماواتا
شدرات السّافِل تَنْتَحْني
بي الحاصل أعبي مساماتا
الناس القُصّر تنصَحْني
أتْكَاجَرْ أتوِّر نجماتا
القمر الطّيب يفضَحْني
تنبحني سجونِكْ وآهاتا
كَجّنّا سجونَكْ لولاكْ
كم عشقاً يتيرب واطاتا
منعول الزّمن الخلاّكَا
سلّمت الوطن الهمباتة
على كيفك سيفك يتحَكّمْ
يا سوسي تكنّك ما بتعلمْ
بي شتلة تقرِّبْ تتكلّمْ
يا حَال البتألم وساكِتْ
يا حال السّاكِتْ وبتألّمْ
يتفتّق جُرحَك يوم نبرأ
ونتلمّى .. وقيدك ينحطّمْ
وين عاتِبْ هارب من بُكرة
وخطو التاريخ البتقدّمْ
للزّمن الإنساني السِّدْرَة
حا يوقِّف قولو وما بيرغَمْ
المنفى في شرعو كما الهجرة
والسِّجن متل دار الأرْقَمْ
والشّارع قارِنْ في الشّارعْ
رغماً عن عَنَت الأيام
والزّمن الَجهْجَاه الفاجِعْ
بالنّفس النّازل والطالعْ
وأنا واحد من شعب مضارعْ
سمّيت ومشيت ما متراجعْ
غنيتك يا عشقي وتيهي
يا بلاداً كم سمحة وجيهي
لو لِقَتْ النّاس البتدورا
الأيدي التنفض كانديقَا
تنقُز تلحقا في الكانديقَا
ترتالا .. تكوس لها في الجيهي
ويا بلدي الواقع بك واقف ..
الشوق من حاطف لى قاطف .

ناصرعبدالله
05-08-2010, 12:45 AM
سوقني معاك ياحمام
... ...


سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منام
... ...
سوقني محل ماالمحنة
وأيادي تقطر سلام
سماحة الحياة فوق أهلنا
وبلادي تقرقر وئام
... ...
غلابه وأمان مو الطيابة
ضكارى بصارى وكرام
حبابه الحبان في بابه
وتدخلوا عليّ الحرام
فقارى ولكن غنايا
غنايا بهذا الغمام
بهذا النيل كم تغايا
وتيرابا نرميهو قام
... ...
إرادة القمره البتقدر
براها تضوي الضلام
شعاع شمشاً ياما خدّر
وإذا يبَّس لا يُلام
... ...
فيابا خرابا الحرابة
وخرابة فكر سوسي سام
خرابة الكل نفسو تأبى
عقابه .. تلِم عم سام
... ...
ولِيد مخلوق للقراية
خزين مدخور للجِسام
تتمر نيتو التخاية
إلاما مذهلل إلام
درب من دم ماب يودي
حرِب سُبّه .. حرب حرام
تشيل وتشيل مابِ تدِّي
عُقب آخرتا إنهزام
... ...
بطانة الشيطان قديمِة
وبعد دا منو العرشو دام
إذا الإنسان ما ليهُ قيمِة
علي إيش خلَّفُو سام وحام
... ...
تعالوا الدم ما هو مويةِ
ولا ها ترايي المسام
أخويا وطراوة الخوة إبتسام
... ...
تعالوا نحانن بعضنا
نخل قلبو على التُمام
نبضنا يشهل أرضنا
وأرضنا تجِم العضام
... ...
تعالوا بدل نبني ساتر
نخيب ظن الصدام
نطَّيب للعازه خاطر
نقوم لأطفاله سام
... ...
أخير كرّاكةً بتفتح
حفير وتراقد الركام
أم الدبابة البتكشح
شخير الموت الزؤام
... ...
تعال لي غابتك يا خيرا
تعال لها يا أسده الهمام
بدل دوشكة يغني طيره
محل قنبلة عش نعام
... ...
بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
... ...
بساط أحمدي كم يشيلنا
وتشهِّلنا على الدوام
نَقِل ليلنا تقوِّي حيلنا
ودليلنا تمام التمام
... ...
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام
... ...
ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
... ...
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
... ...
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
... ...
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
... ...
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام
حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
... ...
فلاحة العالم تعمر
محبّة مودة ووئام
تشمِّر ساعد السلام
... ...
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام .

ناصرعبدالله
05-08-2010, 12:48 AM
حوش الربيع

يا مبيتانى الليل قوي
وراجياني أجيب ليك الشمس
طالقانى فيك عكس الهوي وسابقانى
بى فسراع .. وامش
نقرشتى قلبى عشان يكون
يوم مهرجان سعفك .. برش أنا ما نقدت
حب العيون لا من يحاحينى الرمش
ساعالى ناموس الشجون
وحامانى بى غنواتى اهش
مابين مرايات الظنون
فيك كل مرة
بلاقى وش
بقبقتى بى ريح السراب
فانوس رؤاى والشوق عطش
وصقعالى بى داك السحاب بار البروق
وأوعاك تطش
ولا همسة يا بنية الغمام
الرش واديك مندهش
ليش لا قبض شتل الغرام
لا طيروا فيك سوالو عش
نوبة المجاذيب اترخت
ودرويشي ينقز مندرش
وانا روحى تقابة بخت ليها الله
لى رب العرش
فى الضلمة لسه بنات نعش
يابنية بارى العنقريب
ضارب العريجي مجرد غش
فى سكة الشوق الخبيب
إندهدهت راجى الهواء
وعود التباشير يملأ طيب
ينفخ مزامير الهوى
وعلى نقرة العشق الرهيب
تصدح معانينا السوي
وتسكت زنازين الوجيب
وانا بيكى ببقى الكون ندى
وكل المواسم همبريب
لا ريدة تتحترب صدا لا ظن
حبيب فى حبيب يخيب
العمر بالبسمة إبتدأ والصرخة
ما صرخة نحيب
صرخة اريحية ورضا
وأنا راضى بي ذكراك نصيب
يا بنية ما اكتر من بشر فى خير وشر
يختى ويصيب
يسعدنى اكونك من مطر
ما شرط طينك يستجيب
المهدى وين المنتظر عز الكدر
غير فى الحبيب
دي الكتمة
وكشر المطر
حوش الربيع الهمبريب .

ناصرعبدالله
05-08-2010, 12:51 AM
عرق الجباه

وكتين يضيع عرق الجباه الشُّم
شمار فى مرقة .. آه .. يا نورة آه
من دربك التوّر نفس خيل الصبر
فتـّر خطاوى الشوق وراه .. يانورة .. آه
ساعة الشموس الغُر تهضلم
تلحق الصِّح .. فى المغارب
يستر الضو الكهارب
تستر المدن السرابية .. الضبابية الكآبة
حائط التيه .. والطشاشات .. فوق قفيِّك
يا أمْ عوارض...
يا أمْ عوارض .. ما دُعاشة
ماها شبـُّورة وتقيف .. جايى ليك يا نورة غيمة
تملا ماعونِك خريف
يملا عينيك ويفضـِّل
يروى جوّاك العطاشا
*****
يا نفس فجر القصايد يا بلادى
القطع قلب الروادى .. بى اللّواج الجاى .. وغادى
ماهو صوتك .. لاها صورتك
دى البترقش نادى فوق صدر الجرايد
إنتى يا حُضن الصحارى
شُفّع العرب الفتارى
البفنـّوا الشايلا إيدمْ
ويجروا كايسين القطارى
لا سراب الصحرا .. موية
ولا حُجار سلّوم .. موائد
حالكم البصرخ وينادى
ياوطن عز الشدائد
*****
يا هُدى الناس الحيارى
يا ندى الفجر الببلِّل نور عِوينات الفقارى
جايى ليك يا نورة
آفة .. للسوس البنقـِّر
عود عِشيماً داخرو فيك
أصلى لمـّن أدور أجيك .. بجيك
لا بتعجّزنى المسافة
ولا بقيف بيناتنا عارض
لا الظروف تمسك فى إيدى
ولا من الأيام .. مخافة
يا نفس فجر القصايد
ما ضِهِبْ فى بعدى عنـِّك
أصلى متغرِّب عشانك
راضى بى الجايينى .. منـِّك
ما شكيت شُح اليالى .. وما بكيت نُحْ .. شِلتوا حالى
رغم إنو الحال بيفضح
إلاّ كٌتْ فى الحارة بصرُخ :
يا وطن عِز الشدايد.

ناصرعبدالله
05-08-2010, 02:52 AM
http://mosawiland.com/upload/بدبابة.mp3

ناصرعبدالله
05-08-2010, 03:02 AM
http://mosawiland.com/upload/مطر.mp3


مطر الشوارع

هبّت نسّام جيتك .. ضوّا لحظاتو البكانْ
زين أركانو الزّمانْ
فرهد الشوق المضارع
البلد بقت الشوارع
دافرة من كل المواقع
زي مطور هَتَكَتْ سماها وسَيّلت ملت المزارع
لهفة الزول الّجا راجع
من نخيجو تقول موادع
الفرح في أعين الصابرين دموعو
الهتافات التندد بي عوارضو والتأكد لي رجوعو
والتبدد خوفو .. جوعو
والتجدد بخّة الدم في عروقو .. وبين ضلوعو
تطرد الهم من جموعو .. من خطابِن ..
لافتات أعلام بشابِن
موكب العرسان شموعو ... الأصابع البي ترابِنْ
الأكف الدم خضابن
لافتات اعلام تهبهب زي صفق
الاناشيد .. يشتهنِّك في سَبَقْ
المناديل التلوّح والطِّرحْ
البنفسج والبراسيم التراقص في مرح
العصافير الملونة في مرايات الفضا المتكابي تالاك قوس قزح
استحمّت غيمة في بحر الأُفُقْ
كان دعاش الغيمة بوقة وكانت الرغوة الشفق
جفّفْ اطرافو النسيم .. جرّ بشكيرو الغَسَقْ
ختّ في كف المسا حنة الزمن القديم
قالت الريح العجوز
ما استحت .. قالت يجوز
كالصبا ارجع صبية واسري بي عطر العروس
ابرى فستانا البياضا .. نية الطيب حنين
بي ندم صادق أمين
عقّبَتْ قالت واتوب
ما أغُش الأوكسجين بالأعاصير العبوس
إلا شان للظُّلم ادوس
آه يا عشمي الحزين .. لو ترجِّعني السنين
باركنها نسمتين .. بَاخَتن بالا الرزين
آجَرَنّها في اللّي راح .. وطيبن نزف الجراح
وعمّدنها ريح صلاح .. من طرف شق الصباح
قاطعنها نجمتين .. يمة عقبالنا .. ومتين
من زفاف الغيمة وين .. ونحنا نشرق مرتين
انتشى العشب الصغير .. وتاوق القمرة التغيّر بين ضفاير تمرتين
وخفّ يتصنت مزارع ..
دخلة المطر الموله أو زفافو على الشوارع
وحّم القمح اليراهق في المتر .. جبّد شتولو .. نوّر القش في المراتع
نوّرت كل الخمائل .. السحر فوق راسو جايل
زي تخاليل الأصابيع .. بين سبيب محبوبة طالع ومرة ونازل
زي رسائل بينو بين الجاي راجع ... لى حصاد العمر شايل
ضوّا في كل النفوس .. حُبْ تحت كل الشرائع
والشعائر والطقوس
جمّة العشق المضاجع ... حتى أصوات الضفادع
سنّ حنجرة المغني في قلب زولو الحجر .. العنيد الما مطاوع
ضحّى من أجلو وصبر .. صبُر زمانات التدني والمناحات التجنّي
سنّ حنجرتو المغني .. وغنى غاية ما انفجر
شاحب الليل الألق ... الفَجُر فرهد بهر
جديد الفرحة يا دابو انعتق .. فك قيد جرحو ونتق
لي جواد شوقو انطلق .. قولب الضُّل والصقايع
الوجود قدامو رايع .. خالي من صُرمة وفجائع
العصافير التطالع في كتاب الصبح طالع
الندى في سرابو ناقع .. الزهر يا دابو فاقع
انطلق للحلة شافع .. شال بشارة يوم جميل
الفراشات للأصيل .... والبنفسج للشفق
املو عينيكم غميد .. يا مجاريح لا أرق
ضمّو لي ليلكم شديد .. ضمّو بي عد ما وسق
لا تجمّوها السيوف .. لا ترمّوها الدرق
المطيرة الفي وشيكم .. هبّ نسّاما وبرق
ماها بي الساهل تجيكم إلا بالدم .. بالعرق
يا مطر يا نار حبابَك ..
خدِّر القصب المعوبِس بلّل التعب التشابَك
روحنا شبّت بالقضية وتاوقت برقَك سحابَك
أيوة يا مطر الغلابة المن زمن صابر ترابَك
والقلوب عشرق سرابَك.

ناصرعبدالله
05-10-2010, 12:13 AM
يا متخبية خلف وضوحك


http://mosawiland.com/upload/يامتخبية.mp3

ناصرعبدالله
05-10-2010, 12:15 AM
يا متخبية ...
خلف وضوحك
أمرقي داخُل ..
تلقي الغيم الطاش
إتلقط
لمّه وربَّط ..
ربَّط ونقّط
نقّط ورشّى
الغبن إتفشّى
القابض طينك
وطاب في دوحك
... ... ...
يصحى الشجر اليابس
أخضر
يضحى الأخضر
زائد وأنضر
يرجع طيراً
غِصب إتهجر
وشوش ..
عشعش ..
وعمَّر روحك .
... ... ...
يترى الحلم
الفينا إتحجّر
وندرأ نزوحك
تالا المدن ..
المصّت دمِّك
ودسَّت فوحك
قسّت همِّك
وقصَّت موحك ..
... ... ...
يا متخبية ...
وأنا مفضوحك
رنّة فرحك ..
صنّة ترحك ..
وين ما أقبِّل
ياني بروحك
أي مرتكب الصاح
ونصوحك ..
... ... ...
كَجَر الصمتِ
وكت داهمني
كنت متلبِّس ...
بي غنواتاً ليك
إتكرمن
من سر بوحك
للأطفال
بالزمن الجايي
الزمن الطيِّب
زمن الخير
الجالبة فتوحك
يقفل حرباً ..
باحتة جروحك
وطوفان جدباً
محّن نوحك ..
... ... ...
كبّر طفلك
ونشّن حجرو
قام الصمتِ وكجرو ..
إنكجروا ..؟
إنعدِّيتي ..
وشبّت أزمة
... ...
بين فرقات
الضو والعتمة
شقَّ نسيم
لي عِرْق الكتمة
خالَ النخل
العاول طوّل
قال وإستشهد
بي عمَنَوَّل :-
"المنحوس ..
هجّر تربالك
والمجروس ...
يا الردم الجدول
ودكَّ أطفالك
تحت الردمة
... ... ...
وقامت طلقة ..
تجاه النسمة ..
الساكنة النخل
العالي الأسمى ..
حاض الطير الحامل ..
هجمة
طرح الغيم الشايل ..
صدمة
داخ النحل العامل ..
صُرمة
... ... ...
رجمة ورجمة
في حلقَ الليل
إنشرقت نجمة
رقد النيل هبّود
بالوجمة
نفدت شيمة
بقدرة قادر
طارت غيمة
وصارت باكر
باكر رحمة
مدّت
وندّت
وشدّت
خيل الحيل
بالبسمة
نخل الغبش
الدغش إتلمَّا
الأبنوس الجاسر
يمّة ....؟
هبَّ تبلدي
تحدي وهمّة
وبحر المالح
كبّر وسمَّا
"الأديان
في القلب
يا أمّة
والإنسان
في الدربِ
أهمَّ"
... ... ... ...
البلد إتحول
بي مسموحك
ناس بتكاتل
لأجل سفوحك
ما يسقيهن
غير فد جدول
جدول
خيرو الخاوي
نضوحك
لا أشواك
تحميك تتجوّل
لا أسلاك
تنصلبط سوحك
... ... ... ... ...
يا ممتلية
كجوفي فجيعة
وآخرك أوّل
أو معتلية
كطمي الشوق
القلب الماحل
راحل طوّل
زي دعوات
الناس الظُلَّم
لمّا عليها الغول
إنغوّل
... ... ...
حلمي مدردح
دخري فقارى
إرثو ...
ضكارة
جسارة
بصارة
بإيد كرّاسو
وبي إيد فأسو
لو لا إحساسو
بعزّة ناسو
كان تكَى راسو
زمان وإتسوّل
زولاً طبعو
يفجِّر نبعو
بدّع زرعو
وماسك الأول
... ... ...
سوَّى حضارة
وشرَّف لوحك
شرحو ..
شروحك
مسحو ..
مسوحك
يفقد عطفك
ويأبى ينوحك
غامل يوم
راح ترجعي فيهو
ومجد بنيهو يلاقي
صروحك
... ... ...
جهراً ترجعي
ياوضّاحة
يا مرفوع للقوّة
صمودك
صبر الناس
اليوت كدّاحة
لنضرة عودك
... ... ...
المارقين
الذمّة هجائر
الساكتين
فوق رأي
وبصائر
مطر الحق
بالحيل سحّاحة
ناراً بق
لليل صحّاحة
شالت وجع الحال
في أصفاحه
وتنزف شان
ما تبرى جروحك
وتعبك راحة
... ... ...
شدِّي النيل الأبيض
فرسك
وفيض الأزرق
فينا جموحك
مقداف فألك
ومرسى طموحك
الإنسان اليسمع
بالك
يعرف مالك
يفتح خِزَنو
و يستر حالك
يلفح إجنو
ويقلع نالك
يكتل حزنو
ويروي قموحك
رافع رسنو
وراتعة أمبوحك
... ... ...
تنمسيبو
هديراً طيِّب
وتصحي
خرير الفجر
صبوحك
... ... ...
عشتي آواضحة
وراء مخباكي
ويا متخبية
خلف وضوحك
عشتي أصيلة
كأرضك ونيله
ومرتع واحد
لألفِ قبيلة
... ... ...
يا ال لبنايتِك ..
من غنمايتِك
يوم ما إنطفت النار
في لدايتِك
غيَّر زيرك
ولاّ ملوحك
... ... ...
قدمك قاشر
قطع الفاشر
سمسم باكر
باهي مسوحك
... ... ...
سترة بدنك
قطنة وطنك
طينك سكنك
نبضك مكنك
عرفك فطَنك
تبري جروحك
يا الطوفانك
صدراً ماهل
وشرف العزّة
الأحمر
نوحك
من دعتاية الزمن
الكافر
ينصر دينك
وتسلم روحك
... ... ...
تسلمي واضحة
وراء مخباكي
أو متخبية
خلفِ وضوحك ؟

السر حليب
05-10-2010, 07:57 AM
ابداع ولا احلى
الف تحية وسلام لك الاخ منصور وياريت تواصل

ناصرعبدالله
05-11-2010, 11:19 AM
ساحراني عيونك يا نيل

ساحراني عيونك يا نيل
يا نسمة نشدتك بالله
كان ماشي علي نوري
تزوري
حبّاني وأهلي وخلايي
………..
أغريله سلامي
وقوليله
المطرة إن صبّت
يا الجايي
العرق الناقع
دا الليله
وأولابو كشينبة وإنقايي
…. …. ….
قندول الشوق حد ما لبّن
دندح حبّايي وحبّايي
الطير ورياحاً قد هبَّن
ينفزعوا ويرموا الحاحايي
إندلِّي على الجرف الليلنا
وجيبيلي معاك
كركجايي
ما هو الكركجي
خلق نيلنا
وساحرني صفاهو الشبّايي
…. …. ….
شادهاني مراكب
من بحري
وروّاسي يحنِّس سلكايي
قولة يا ليل …
ونزل صدري
وزِّين وانفدعت لوبايي
جاهراني رمالاً كم ربّت
من قيفه وعبّت مخلايي
بالليل إن غبّت
زين ربّت ..
ووين زيّها
-تشرق- مصلايي
ساحراني عيونك يا نيل
أومت بنبونة
لطرفايي
الموج بشِّير ومواويل
محظوظة عروسك
واللا آيي ..!!
…. …. ….
بارقاني بروقكن
يا ناساً
سوّايي
وغيمةً رتايي
بيّوضة تخدِّر
وأعراساً
تنقر من تايي
ولي تايي
…. …. ….
يا نسمة نشدتك بالله
صنِّيلي مع ربة دارة
وطنبارى تخوجل غنّايي
محبوبةً سارحي معا طارة
حبّوبةً سمحي وحجّايي
وصبحاني الجمعة
علي شفّع
قمراته التقرابه قرايي
حفيان الله بينجيهو
من دعتي
وشوكي
وحرّايي
…. …. ….
يا نسمة
الدرب الوسطاني
حفتييَّا …
الرايح والجايي
آذان زاويتنا
وحلتنا
في تالتي تمعوِن
في سمايي
كُشنة حَلتنا ،،
حمو الدوكي
زرزور الجنِّي
وكسرايي
…. …. ….
رجعة بنوتنا مع الغيبة
حبحيبه
وود الحلفايي
متكية بتكرُت في حيبي
من ساقه
وتخرت دمّايي
ريق اليتمطق في صورة
وقام رقرق …
في آخر آيي
مارتلو
الفي ورشة مكفرن
في الكرو ..
والدوشة الفي إندايي
بين بطن البلد البطراني ..
مطراني ..
مرطبي ..
سفّايي
محروسة أنفاسا
من أبنوسه
وعقبان لي آخر خلفايي
…. …. ….
كم قهوة شوفتك راماني
وحاماني عوارض لوّايي
وقندول الشوق عد مالبّن
دندح حبَّايي وحبّايي
الطير ورياحاً قد هبّن
ينفزعوا ويرموا الحاحايي
…. …. ….
لكين وأنا حيّاً ينتبّن
يا نسمة..
إن صبّت يا الجايي
…. …. ….
كجنت اللنجي
الأفرنجي
بايركس
تصاوير
وهوايي ؟!؟
داير أهلي
وسهلي
وشيت جهلي
يا رحمة خلقة الله كِفايي
…. …. ….
الخلا بأبيارو
وبأزيارو
غدرانو التترارَى مرايي
شوك غابو
الحاني على أطيارو
قش الله .. الوين زيّو ملايي
وفوق عزِّي مكرّم ..
ما دِلاَّ …
وأنا حر في بلدي وفي رأيي ..
…. …. …. ….
الحاري قليلتو ..
ولا الساكت ..
متعشِّم في الترف الجايي
الحاري عقابو ..
ولا الساكت
متعشِّم في الترب الجايي
الحاري حقيقيتو ..
ولا الساكت
متعشم في الوهم الجايي.

ناصرعبدالله
05-11-2010, 11:28 AM
الغربـــــــة


الغربة دايري صبر
ويا ربّي وين بلدو
لا يبقى شالو قبر
وراقد مع الرقدوا
*** ***
بنحِب بلدنا قدُر
ما الزول يحب ولدو
لابدَّ تبقى خدُر
أيامو بي جَلَدو
*** ***
الطير بيصحى فجر
كان ما لقى النقدو
يقطع بحار وجزر
غير رزقو شِن بَعَدو
*** ***
زيّو الغلابة سمر
من حر شموش وقدوا
تعب السنين المر
يتحالى لو حصدوا
*** ***
يا كم ليالي تمر
وفد وقفة كيف صمدوا
بحراً جناحيه جمر
يا الشالن إن غمدوا
*** ***
أقدارنا ماله كُتر
نيرانه ما بردوا
كل النصدّو يتر
حالاُّ يجي البعدو
*** ***
للقال بلدنا فقر
قول خيره بي رعدو
لكين عوارض الضر
إنقنقتوا وقعدوا
*** ***
صقرين تعاقبوا كُر
عاقِّين وماب يلِدوا
حد ما ضروعه تدر
بي خيره ينفرِدوا
*** ***
صاح الحمام يا غُر
يا قمري .. قانقردو
يا طيرو فرَّ صقر
فاضِل لنا البعدو
*** ***
ذرُّوا الحِديْ لا يذر
سوسيونا والأخدوا
من طينّا مافي عذر
يحراهو بي لسدو
*** ***
لابد يرش أم در
غيماً فرج بردو
تحتو اليرارو خدر
إنبردوا وبردوا
*** ***
الأرضِ دايري صبر
ويا ربَّي وين بلدو
يي دا الحفرلو قبر
للغربة بي جَلَدو.

ناصرعبدالله
05-12-2010, 10:59 PM
للسلام


لا نغنيك ولكنا نناضل
هذه الأوتار أعصاب شهيد
كلفته الأرض أن يرحل
فأستأذن راحل
كشعاع بصراع
هرب الدفء إلى الآتين
من شم المراحل
هذه الأنغام أهداها لنا
بعد أن نازل بالمنشور أعواد المقاصل
لا نمنيك بباطل
كان ياما كان في مر الزمان
كان سلطان وشرطي وكاهن
ومغن
هبت ألثوره والسلطان فر
رجع الكاهن للمعبد يبكي
عمل الشرطي فلاحا
وكر
يطلق الماء على صدر الجداول
يضرب الأرض على صوت الكمان
وهو يهتز مع خبط المعاول
... ... ...
كلنا للأرض والأرض لنا
ولنا متسع حتى السماء
فإلاما ولما
يغمر الأوطان طوفان الدماء
يا أخا الأرض لمن
هذه الحرب
ومن ذا الذي يشقى ومن
يعشق الأوطان
أطلال دمار ودمن
إنه البوم لذي يعجبه ليل الخراب
إنه الشؤم الذي ينجبه ويل الحراب
هل أتى اليوم الذي تعقبه خيل الصحاب
فيحط الغيم في جوف أراضينا
ويرتاح التراب
هل أتى حين من الحلم على الإنسان
يحيا مطمئنا للزمن
تضع الحرب به أوزارها
كرنفال السلم يجتاح مدى العالم
إبداعا وقمحا
والعصافير السلامية تبني دارها
حبا وصدحا
يا ورود الدرب يا أحجارها ليلا وصبحا
يا خطى العمال يا أيارها
خبا وكدحا
لأتحاد الساعد الكوني مرحى
لا خضروات الفنن
لانغراز الإصبع الثوري في عين الدمار
وارتفاع العلبعه البنبان كوبا من لبن
لتجار الحرب تبا ...
للخوازيق وتبا للبوار
للسرابيات في تيه الفتن
للذي يبحر غربا عن اماني الشعب تبا
للدوار
للخطابيات من دون فطن
لأنطلاق الريح من غير لقاح
دون خير وصلاح
للتي تمطر موتا وجراح
والتي تمرح من دون رسن
في مراعي الشعب في حقل الشباب
للذي بملأ كفيه يتبر وتراب
يكشح التبر على حظوته
والترابيات في عين الوطن
... ... ...
ادعياء الحرب كالحرب تماما
اولياء السلم لا خوف عليهم
لا حزن
واذا مروا بهم قالو سلاما
وإذا غم بهم نادوا وطن
هذه الحرب وثن
وانا أؤمن بالحرب التي بين احشائي
وتجويع الفجار
الطواغيت إذن
فلتكن يا عام عام الإنصهار
بالذي ادعوه دربي
بالحبيبه بالصديق من الوطن
ولتكن يا شعب ضد الانكسار
وليكن ما قد دفعنا من دماء
لأنبلاج الفجر مهرا أوثمن
نحن اقسمنا على صدر عموم الشهداء
الفقراء
ان نسويه بروح وبدن
ونقويه على سوق النهار
" ونضويه " وطن
فلتكن يا عام عام الإنتصار
للجماهير على بؤس الزمن
قد كفاها ما دحاها
من محار من عذاب ومحن
فلتكن يا بحرا للبحار
التيتنضج سلما دون من
عاشت الأرض لنا لافتة
ولأعداء العصافير كفن.

ام مؤيد
05-13-2010, 02:31 AM
منتهي الروعه والجمال
شكرآ اخي ناصر

ناصرعبدالله
05-15-2010, 12:59 PM
نفسي أقدّم لك جميل

نفسي أقدّم لك جميل
وفي حدود الإستطاعة
فليكن هذا الجميل
غنوة بين الناس مشاعة
ولاّ سرية وتقاوم
في الجمود .. حمّى المياعة
المهل ضيقا النبيل
شان بلد تاخد وساعه

غنوة قالت يستحيل
يصبح الأسف البديل
للتماسك والتواصي
بي مشي الدرب العديل
راح تموت البركة بركة
واللي نيل راح يحيا نيل

ويا عروق السنبلاية
الأرض ما قط خيرة
لسَّه يا بيوضة جايي
ألفِ غيمة وألفِ غيره
لا تزال القبلي طايي
والأرض باشة عشيره

خابرتني نسيمة شافت
طيرة خالت لي شديرة
من الشديرات التلبِّد
كلمة السر في صديره

والعصافير ماب تكضِّب
لاب تحوم فوقا الإشاعة
قالت النار إندلاعه
في المساخر حار قراعه
و لابد الدنيا وضِياعه
عنوة ترجع لي جياعه

وينطلق ضهر التواريخ
المعبية سيرة .. سيرة
تجي الطراوة ..
تجي المطيرة
تجي النقاوة
تجي الدميرة
بحر غنانا من الحجيرة
يغرِّق الذمم العضيرة

وللتقدم بي هداوة
التلاميذ البي خيره
بي ضراوة
تدق براوة ..
وبي شقاوة
تسوّي قيرة
للمطيرة المافي غيره
راتي ياخد لي خبيره

تحكي عن عزة مهيرة
رزتا وهزة ضراعه
نفرته الولد المظفَّر
وكيف سفه دنياه ومتاعه
في سبيل سودانو قطّر
دمّو سطر فكرو واعي
سرُّو كان في اللهُ أكبر
ونفسِ شورتا بي جماعة

نفسي أقدِّم لك جميل
فليكن هذا الجميل
حكوة عن عبد الفضيل
التماسَك وما تداعى
ولاّ عن عبد اللطيف
ورحلة المنفى الشجاعة

سنَّ حنجرتو الخليل
بينو بين حجر الجداعة
وكان مسبب من قبيل
وانتفض فارس رفاعة

شلتَ من جودة الرماد
وقمت مورقت الزراعة
بتَّقت كل البلاد
بي ولاد طول باله باعه

شهداك الهيلا قاموا
وبوغوا التاريخ جداعة
توروني وراحوا ناموا
في حِضن سيد الوداعة
اللي ما خان الوداعة

حملوني أمانة أغنِّي
معجزاتك بي براعة
ولا أبالي تكنِّي جنِّي
ماهُن أدُّوني الشجاعة

يا برية متل جناياً
مستمِخ حصة رضاعة
أو شقية متل غناياً
سرُّو يدِّينا المناعة
ضد مناحات التسول
والتوسل والضراعة

أيوا أحبِّك لا شكية
لا حراق روح لا إلتياعه
ذهني قادر بيك يفكِّر
إيدي قابضي على يراعه
لي ضراع أخضر يخدِّر
وكفِّي فالح في الصناعة

في بحار الحق مراكبك
ليْ صلاح يعجب شراعه
فيِّ سِر نهمة مواكبك
دون جرائد وهوشة إذاعة

ويات مطر بتشاور الريح
والبوادي دغت مجاعة
يات سيولاً ترجى تصريح
ولاّ تصديق لإندفاعه

ماب أبدل فيك وأساوم
لاني تاجر لاك بضاعة
شعبِ غلباوي ومقاوم
وأمّة ما أنبل طباعه

قول ونسمع لي كلامك
يا وطن سمعاً وطاعة
قلبي ضاق بالغنية حامك
ورؤيا زيّك في وساعه

نفسي أشهد من غرامك
آخر آهاتك وداعه
وتشرق الدنيا السلامك
بينا يتبختر شعاعه

لو أغنّيك عمري أجاهد
وإستلف من ميتِّي ساعة
ماب أوفّيك دا أنا واحد
وإنتَ أمجادك جماعة.

ناصرعبدالله
05-15-2010, 01:19 PM
لو ألقى بندقية


لو ألقى بندقية
معمَّرة وصقور
معاها كم حِديّة
بسكِّت الطيور
بأصواتن الشجية
تذكِّر العساكر
عساكر الرزية
عنايا في البيادر
غنايا للبنية
*** ***
كأني خاذي .. سارق
تحرِّشُن عليَّا
تشيِّلُن بنادق
ترسِّلُن إليّا
** **
....
....
أقول لهُن دي غنوة
لأحلى جارة ليّا
عشان سميحي حلوة
كما القمر عشية
كتبتها وبقيت
أغنِّي وحدي فيها
أختَّها وأجيها
أشيله فوق إيديّا
** ***
صحابي شافو بيت
فقاموا هاموا بيها
تناموا في عينيها
معاها حاموا بيّا
** **
غنيوة ماب تبيت
شقاوته العليها
حليوة في مشيها
ولا وراها جيَّة
** **
تخش في بيت لبيت
حلاّل وبي وشيها
شوارع أي جيهة
نسيمة في البرية
أبت تخونّي أبيت
تصن ولا عليها
تزِن ولا عليّا
** **
مداخلي في المحاضر
مخارجي البريَّة
تشعوِّت العساكر
يتفُّوا في وشيَّا
يشنِّفوني شاعر
... ... ... ؟!؟
يسبُّوا والِديَّا
يطفطفوا السجاير
في كلِّ كلمة كيَّة
سجارة في السجارة
في جارة ناره حيّة
تدودِي ليل نهاره !
تفّدِّر الأسية !
وبتهدي للحيارى !
في نار بلا القضيّة
تخضِّر الصحارى
ومطورَه هيَّ .. هِيَّا !
بلاش شطارة .. هَيَّا
ويصد صدى العبارة
::عيّة
::عيّة
::عيّة
دي ناره ولاَّ ...
...
...
يلاَّ ...؟؟؟؟
وأسوِّي إيش يا أخيَّة
غريب دخلت حِلَّة
وكلابه طبُّوا فيَّا
ولا حجارة ولاَّ
عصاية بين إيديَّا
في حوشنا مافي إلاَّ
رماد .. وحُسْنِ نيَّة !! ؟
وغنيوة مارقي للَّه
دا كلُّ ما لديَّا ؟؟!!
** **
ولو ألقى بندقيَّة !!
...
...
حاطفِّش الحمائم
!! !! ؟
عشان قعَد تقوقي
وهديله حالي حالم
يتوِّر العساكر
عساكر المظالم
يذكِّرُن بشوقي
لعالماً مسالم
قَبُلْ ندى البواكر
تلفَّبُوا النسائم
وولاد بلد نذاكر
نحسبُّن هجائم
نجدِّع الدفاتر
في كرِّقة بهائم ؟؟!
نخاف يقلِّبوها
يلاقوا طيفه حائم
بنيَّة غلبُّوها
بكافة الهزائم
تلقِّي بال أبوها
لجافَّة الشتائم
؟؟
..
..
؟؟
!!
** ** **
بدل هُن اليساسقوا
بقيت أنا البساسِق
حلالي حين يصادقوا
أفوت حلالي مارق
لو إنُّو عاد يصادقوا ؟؟!
أنا أولى من تصادق
عيونن الطرية
كأنتن الخنادق
*** ***
لو ألقى بندقيَّة
حأكتِّل البنادق
إذا تخون قضيَّة
وشعاعاً أصلو شارق
عشان حشا البنيَّة
يدفِّي ما يدافِق
وبدل خنا أرزقية
يجي المطر يساسق
لكل مشرقيَّة
خندق من الخنادق ؟

ناصرعبدالله
05-15-2010, 01:22 PM
صــــــــــــــــــــــــور



زي ما تقول بين الجروف
والقش مقهِّي مع الندى
زرزور يفرفر دار يشوف
أم رأس مطرِّفي ينقدا
… … …
حس الرواويس والكفوف
الموج رزازو يبرِّدا
قولة الله هوي
تنزل صفوف وزِّين
ضفافو مزغردة
تصبح مشارع الهم
حروف صافي وحلال الوارده
على قدر عينيك ما تشوف
جنّات طيوره تغارده
… … …
فوق في المتر زولاً ولوف
على أرض عاولي يراقده
ويرقد عليها يجم لو جوف
من شمشو شرقت ما هِدى
شربوكو لي عطشو الكفوف
والطَيبة جايبالو الغدا
"خبر البلد ؟
ودا آمني عوف
مشى لي سعادو يصدده
الله .. وياريت الظروف
ترحم تعدلو حويلي دا
آخد لي بكراً لا تشوف
محنة قراعي لا أورّده
_ تمشو الخراتيم طوف تطوف
بالسيلمات قاشرين كدة ؟!
? الشي الفنادق وكل صنوف
الفخفخة المستوردة
- آمين وأكون ماني الردوف
- ارتحتَ لفّاني الردى
? آالطيبة أتبني الواطة أشوف
? بوخك ولا الشاف والندى ..
- خوفتني ؟!؟
? وكيلتيني خوف
وأنا لسّه في إضنيّا الصدى
الدارة
والحنّي
الدفوف ..
- وأنا قرمصيصي تراهو دا ! ؟
صدى الصور :_
يا أرضنا البكر الحنون
يا الدلَّها
ويا التلَّها
إيد المروّة ندلّها
؟؟؟…؟؟؟
يا شاكي من عقد الديون
حقِّك علينا نحلَّها
نصحى ونصابحك بالتعب
شمشك ضراعنا يسلَّها
تفقه شعاعات الغضب
فِقر المساخيت قولَّها
شيتاً نسوِّي آب ننكرو
ونحنا العوارض شلَّها
النيل قدرنا ونقدرو
ضبلين أرضنا نخدِّرو
وماب نرجى غيمة تبلَّها
الموية يومنا النفتحا
تروي الجنائن كلَّها
تنفض شقوقه من الدعت
يختا الجداول سلَّها
وطير البقر يملأ الكرو
وشدراتنا يرجع ضلّها ..

ناصرعبدالله
05-15-2010, 01:24 PM
انت يا ابرزقاً موكر في عميق الأرض



انت يا ابرزقاً موكر في عميق الأرض
في جوف البحار
فوق صناقير الجبال الحين يبيضن
مابيبيضن غير حجار
قط ما في الأرض من رونق نضار
غطي وديانك هجير
صاد مراعيك المحل
صد سيفك في الجفير وأنت تارك ما اندمل
الوطن جواك أسير وأنت هارب ما العمل
البحر حين جاك دمير
ختَ فوق قيفك وحل
مابي جرفك غير رماد حتى عصفورك رحل
طبَ في سأبك جراد قب روسيين النخل
ما جنيت من كد نهارك غير بوار
لا لقيت في يد بحارك غير محار
ما فِضل في كل خدارك فدغصن
لا في دارك من ركن
تضوي نارك تتكل تالاهو بن
دون عمل ؟..!
الما الفايدة منك معني حنك
و الا أنك ود قبائل وليك اصل
نار خلاوي ونور أهل
نظم أفاتوا الدجل
وأنت في فوضي الدجل
خل خروج الغيمة من نفخة بخار
لي دخول الأرض المطر أم بزار
مافي غير تجلب ضراعك في المدن
والمدن ما فيها غير حفنة تجار
وسوقها واحد يا غبن
وأنت أشباهك كتار
جيت تنادي ولا أُذن
طال صراعك للحزن و التصاليت والدوار
كلما فجيت حصار تلقي لجيت في حصار
وكلما ليها المدينة تابي غربانك حقاره
تاذي أعوانك عوينها
تدفرك تالاي الغبينة وحافة اطرافها المهينة
تاخد افراحك رهينة
قسمتك كيف الدبارة
كافة أعيادك حزينة
و البجيلك من يسارها تاخدوا منك بي يمينه
اه لو كان بالضكاره أو نفس طيبة أمينة
غنيتك ما طال إثارها وعاني موالك رهينة
دنيتك كانت بحارها تحتفيبك مينا مينا
ليل فرح قاد في صحاري
لا كهارب لا في زينة
ضيوا كشافة الفقاري قمرا حتى ولو رتينة
إلا يا تارك مسورك للمحل عز المزار
أرض الميري ومتورك و الأهل عارض جدار
بينها بينك وين قمورك في السهل
ما بقوا نار
مافي يا الكانت ديارك
قاجي ليلها علي النهار
في المدينة من استجارك غير ضواحيك ها الحجار
راح زمن حردك تجارك في الضواحي وبالأيجار
غصب عنك وحار و حار
ترضي شان أم الصغار و الصغار شان أم الصغار
والبطون البنتظارك وأنت جاي أخر نهارك
الرغيفات في يسارك وفي يمنيك كيس خدار
عمروا ما أتمنوا المقصتر ذات يوم
عمروا ما استنوا الفواكه إلا دوم
لا في عيد داروا الجديد لا مراجيح لا لعب
لا زيارات للحدائق فنه في الزمن الصعب
مافي شكوي ومافي لوم و بي تواضح وبي أدب
يسألوك أحسن بحرنا والا بترول العرب
الشي مالا في ناس تريدن وناس تزيدن بالكرب
أمهم داخل تصيدن يا ولاد النوم وجب
ويدوا وشهم الفراغ وتدي وشك للترب
آه لو تأذن يا رب آه لو تقبل يا قلب
ثانية بملاهم لُعب عيد بلا عيد الجديد
يجروا في كل الحدائق يقروا بالم هادي رايق
لا متاعب لا هموم في المصاريف و الرسوم
متخمين بالنشوة و الحلوى و الفواكه
بالحقائق والحكاوي الخالي خوفها
حرمان مزله إلا آه ياوضع شائه
منحلج قانون تائه
ومافي تايه غيروا دله
حلمهم مع إنو تافه إلا لكن بالتالله
إلا لكن بالتعب وبالتعب كم مرة جلا
جد زمانن جد صعب إلا آه يا رمل الشوارع
كم حرمناك من غضب
و يا رجوع عرق المصانع مافي بقاقة لهب
الكعب طول ماهو طالع مابينزل غير كعب
وأنت يا أبعرقاً موكر في عميق الرفض
في جوف الصراع في انتظار
الجاي من براك بريه
منوا نفسك أوف خداع
فجر كاذب خدرية
انتبه حتى النخاع
أيدلوجيا الكسر من بيع القضية
في عكاظ الغرب في سوق الرعاع
واجتماع الانفضاض وانفضاض الاجتماع
بين لندن و الرياض كان إلي حين المتاع
انتبه حتى النخاع
انتبه حتى النخاع
ما بيجيبوها الدموع لا الدعي لا الامتعاض
و الا راكض فوق خنوع مابيفرخ انتفاض
انتبه حتى النخاع
ابتزاز الشعب بالمثلي الابيه
لاحتكار الدنيا كان الدين قناع

الصكوك الكنسية في همركوشيب تباع
جنة اوهاج الاسية وجنة الحاج الضياع
وي كأن الله آهٍ يا نبيا
آه يحتاج حماةً ورماةً وتباع
انتبه حتى النخاع
لا متطاء الجيش يا حظ المطية
من تقل ما فوقا من شاذي الطباع
انتبه حتى النخاع
لا امتلاك الارزقية البندقية
وانطلاق الرعب من حتى اليراع
انتبه حتى النخاع
فامتهان الكذب قدام الرعية
وانتشار الأمن في شتي البقاع
لا يخلي الريح يطلوح بي مراكبك
تالا لجات الضياع
اخير دوام الدفي قلبك وفر بصيراتك شراع
مدرتك طول بالك انت و المقاديف الضراع
مافي غيرك من يجيرك ادري بي جوع الجياع
وا وطن يطلع نفيرك
ما مطر ينزل مشاع
الضلام العاد مسيرك يضوي بي اذن الشعاع
في الصحاري يبق خديرك ترعى خالفلك كراع
فوق كراع لا قط بيرك لاغشى تالتك ضباع
ياولد كل القبيلة وليها ماديلا الضراع
ما بتبيت شاه عليلة ديمه نجداتك سراع
البلد تحتك كتيله ليش تأجل للصراع.

ناصرعبدالله
05-15-2010, 01:26 PM
http://mosawiland.com/upload/humeed.jpg

صورة للمبدع حميد

ناصرعبدالله
05-16-2010, 10:26 AM
الجابريــــــــــــــــــــــــــــــة

فجأة يدوى مكّبر صوت
قال الريس ماربى فوقنا
كان ضحوية وكنا نسند فى المحروت
شن شغلتنا بلا ماروقنا
فكّينالو حبل واسوقنا
وإنماسكنا يطمّن روقنا
قمنا جميع الحلة مرقنا..البيشوفنا يقول واشوقنا
كان ضحوية وكان عين شمش الله قوية
وكان الريس فى عربية..واقف طولو تحت شمشية
هللنالو وهلجنالو..ولوحنالن بالطورية
فرّ عبايتو وهز عصايتو
وهزّو بنادقن الضابطية
صفقنالن صفقة قوية
زغردنالن وهدّن عندنا خمسة دقائق
قدمنالو كتاب الله..درقة وسيف..تبروقة هدية
قفة تمودة و فاس دهبية
وكنا قبيل بيّتنا النية
وبين بنتين علينا اليافطة
اليافطة ام زيق الدمورية
وانعبينا هتافاً واحد
الجابرية تحي الثورة..دايرين بوسطة ومدرسة وسطى
والشفخانة وسوق منضبطة
روح باسم قام خاطبنا بنهج الثورة الصارم وحازم
امّن لازم من شفخانة والتعمير بالعون الذاتى
الا البوستة دى ينظر فيها..اما السوق ....السوق منضبطة
وبالتاكيد للتجار الاسعار واضحة
للمستهلك باينة وواضحة..وإن جاملتوهن تبقى الغلطة
إتكيفنا رفعنا ايدينا وهزيناهن بالتاييد
لاتفريط فى قوت الشعب..الجابرية ضراع الثورة..بالانتاج حنبنى بلدنا
وكانو فى جيهه ونحن فى جيهه
هم اتهبهبو بالكابات..وماهمانا الصيف وعرقنا
فات الريس وانفرقنا
كلنا ننضم وما صدقنا
بالجابرية تجيها البوسطة
الشفخانة ومدرسة وسطى
قلنا ياريت لو زارنا فطور
واتحزمنا ضبحنا التور
كنا أقلا ضمنا النور
كنا بننضم بايدينا دة احسن ريس مّر علينا
من الله خلقنا وشفنا خلقنا دة اول ريس ذاتو يجينا
وكونه يجينا يقنب بينا يشوف البينا كفاية علينا
الجابرية يجوكى الحكماء
الجابرية تواصلى البرة
الجابرية ولادك تقرا
نمشى الليلة نصاقر الرادى
نمشى الليلة نحضر النشرة
كنا نرجّع فى كلماتو ...

يتبع ....

ناصرعبدالله
05-16-2010, 10:28 AM
(2)


إلا فى ستة من الجابرية قالو تعبكم خارم بارم
يذهب حاكم خلف الحاكم
والجابرية تظل فى حالا..حلة حياتها تسر الظالم
صدفة تموت ونحيا اطفالا
لا جلكوز لا تقرا رسالة
لا راح يطلع منها عالم
مابنصفكن الاّ ضراعكن عبّو ضراعكن يارجالة
وخلو بصركم دغرى وسالم
حكم العسكر ما بنشكر
كلة درادر كلو مظالم
ماهو قدركم تحيو همالة
مقصودين والقاصد فاهم
وقاطعناهن حاربناهن
تمينا البينا شتايم
حالتن احسن ناس فى الحلة
ايدا نزيهه..عقولا نبيهه
وقلنا يفرزو قلنا فواهم
يطلعو فالصو وقطاع رحمة
عينة شماتة وخارم بارم
ونحن القصًًر واثقين فيها
وقطعناها معاهم جملة وقاطعناهم
وصارو فى جيهه ونحن فى جيهه
مرً اليوم الشهر الحول
والجابرية بلد فى حالا
قواسى شيوخا مآسى اطفالا
عذابات ناسا حلة تعافر ومقطوع راسا
من القراصة لى قراصا حلة تعافر ومقطوع راسا
عشرين كيلو من الجابرية صبية تساسق بى كراسا
الجابرية عذابك فينا لاكى قرية ولاكى مدينة
وفد فى وفد يقوم ويجينا
عايزة دراسة واجراءات
عون امريكى قرض المانى وحاحاءات
وحد ما نشوف مسعولين مسعولين او خواجات
نجرىنلم قدحاتنا عليها ترطن ترجع زى ما جات
الشفخانة وعايزة دراسة
ومدرسة وسطى واجراءات
لما الطوحة طالت بينا اتذكرنا العون الذاتى
اتحزمنا وقلنا برانا نبنى نقوم للشفخانة
طوبة فى طوبة وقومناها
ويوما التمت جات السلطة عربى وعجمى ومرة رطانة
الشفخانة دة ماهو بكانا
هاك يا تلتلة هاك يا ورطة
وغصبا عنك ياالجابرية غصبا عنك يا احوالا
وحمياتا وموت اطفالا
وعمرة عينكم يا رجالة
قوة انشكت بينا النقطة
وفى الجابرية تحوم الشرطة
هووا كلاب الحلة وصنوا
ومن يوم داك ما شفنا الستة
وفد الحلة السافر جانا
قال اتاكد شاف الخرطة
ونحن بدل نبنى الشفخانة انسرعنا بنينا النقطة
الشفخانة دة ماهو بكانا
وكانت غلطة انقلبت ورطة
اتفاهمتو مع المسعول؟؟؟؟
انفاهمنا مع المسعول
وقال حيقوم للشفخانة او يدفع لنا حق الطين
مع انو النقطة وقت بنيانا قومتوها بدون زنزانة
فى تقديرنا كلام معقول
كونو يقوم للشفخانة
حاجة تضحك محرقة هانة
انتو تقيفو مع المسعول واللا كنتو تقيفو معانا؟؟
وقلنا وخفنا نصد الجاى خفنا نفشل باقى الخطة
فضلت جاى هى فضلت خطة
واتفرقنا على الجابرية واتعلقنا تجينا البوسطة
ومدرسة وسطى والشفخانة قصاد النقطة
تجينا تجينا تجيناوما اتيقنا
ناس انولدو وواحدين ماتو
لما الريس ودوشتو فاتو
فاتو العسكر وجو الاحزاب
ونفس الحلم انجدد تانى
نفس الوجع الراح تحتانى
حتلناهو جمعنا رفاتو
نفس اليافطة فى نفس الحتة
الجابرية تحيى الشعب
دايرين بوسطة ومدرسة وسطى
والشفخانة بديل النقطة
فينا اتكلم شيخ الحلة
صنقع دنقر سلم وصلى
وكانو كلاب الحلة يهووا
وقال كلمتنا تكون فد واحدى
شان ننقوى ما ننذلا
شان مشهادنا وعدل الحلة نحن نفوز حاج البلة
وزاد هوهيو كلوب الحلة
وبعضنا عارض رد وفاوض
شيخ الحلة القام حمسنا
بلة الحمش الزول ما دلة
اول فاهم وقبلو ولدنا
وراح يحكمنا بى شرع الله
هو هو هووا كلاب الحلة
لما استغرب شيخ الحلة
وانفرقنا على الجابرية
انفرقنا ويوم الليلة انجمعنا عموم الحلة
شيخ الحلة قرا القرآن
صنوا كلاب الحلة وهووا
وبلة اتقدم سم وصلى
صنوا شوية وهو هو هووا
وقام اتكلم وعند اتكلم كان ينقسم
النسوان الجاى تتهامز
الصبيان الجاى تتغامز
وكان يتبسم وكانو كلاب الحلة يهووا
شكر وشتم هو هو هووا
حلل وحرم هو هو هووا
هود سابنا وفات ودانا الآخرة وجابنا
قاطعناهو وصوتوا انوطأ
اصلاً واطى وتانى انوطأ
دايرين بوسطة ومدرسة وسطى
والشفخانة بديل النقطة
التموين وزيادة الحصة
كهربا موية وسوق منضبطة
بلة اتبرع قال يبنيهن
هو هو هوواكلابنا واستغربنا قبل بالمرة
لامن نهتف ترسى كلابنا
لامن ينضم بلة يهووا
بلة انحمس وقال بسقينا
وبى اذن الله يضوى الحلة
هتف الشيخ وهتفنا وراهو
لاتبديل لشرع الله هو هو هو
لا ولاء لغير الله طاء طاء طاء
عاش الفارس امل الحلة
بلة الطاهر على حسب الله
كبّر وقام اتدلّى
ولسة كلاب الحلة بهووا وزاد هوهيون
كبشا ضاع من مرحاتو وفاقع باع
بله الطاهر على بلاع ..

يتبع ...

ناصرعبدالله
05-16-2010, 10:29 AM
(3)

كان اول مرة نشوفو يومنا الشفنا اللاندكروزر
اللونا مخطط والبنوت الراسا مربط..التنبوبر
لورى مكوش اقمشة سكر حتى رفوفو
وعتًل تؤجر وامحى المنكر بى معروفو
بلة الطاهر على بلاع اكرمناهو اكرمنا ضيوفو
يشبه مرت الشيخ فى وشيو لولا الدقن الدشدش صوفو
بلة خبارك مابتشبهناوعامل زولنا؟
تانى نقول الزول برانا نغير قولنا
الا كبار الحلة بقولو.بلة دة هولنا
بلة دة اصلاً من ها الحلة
الا اتربى وقرأ فى الخارج ورافق جدو الفتح التركى
وسيرتو انقطعت فى المهدية
ومرة سمعنا استوطن برة وقام اتزوج من مصرية
جابت على..على جاب الطاهر..حتى الطاهر خلف بلة
جدو اشيطن اخير مالانا
وبلة انسركن وجا وبرانا
اقرب واحد لحاج بلة ..اقرب واحد شيخ الحلة
بلة الطاهر على حسب الله
اول مرة يصلى معانا قدمناهو وقام امانا
صوتو مرخرخ لمن يقرأ
يقرأ ويقطع زى البطرأ
لامن يركع جسمو متختخ
عند السجدة سجودو ممخمخ
شيخ الحلة يقول عن امرو
زول غرقان فى الدين من عمرو
ستة سنين قابض فى جمرو
ما فكاهو طريق الله صوتو ودر من كترة ذكرو
وجسمو التختخو شدة صبرو
قلنا حقيقة الزول بى عذرو
وفتنا قناعة ومانا قناعة
إلا الستة الصارو جماعة
قالو دة زول ترباتو مناعة
مابيشبهنا ورفعو وضاعة
زول زول دنيا ودنيا صياعة
قصة دقنو ودينو بضاعة
ونحن اصواتنا يا اما مضاعة
يا اما جهالة وناس متباعة
وفى الحالتين آمالنا مضاعة
وخرم بارم كونها بوسطة ومدرسة وسطى
والشفخانة وموية ونور
كونا يجينا دة ما منظور
وزيادة الحصة الزول زول سوق
زول من جدو يلف ويدور
وياالجابرية دة مطلب عادل كونو تطيبى تكاتبى وتقرى
ضوك يشلع ..دشك يرشع
ونحن دفعنا ضرائب بدرى
ولسة بندفع لسع ..لسع
بس يا جماعة إنقضينا حياتنا تباعة
وصنيت رادى وقول فى الفاضى
خوفنا نقوم ما نلقى اراضى
ونحنا اساسنا وراسنا زراعة
والجابرية ان دايرة شفاعة
ما بشفعلها الا ضراعا
عبو ضراعكم يارجالة وخلو بصركم دغرى وسالم
عبو ضراعكم يارجالة
شيخ الحلة اضّل وضلّ
واسالو برة وحاجة السرة
عن التيبان وحكاية الصرة
اللّم البلة وشيخ الحلة مع شرع الله!!!؟؟؟؟
والناس ديل العارضين برة
جرّبناهن كمين مرة
تاني نجرب شان ننضرّ
ويا الجابرية معاكي سلامة .. كان الفوقك ما فات مرة
كان كلماتن ناشف ريقا .. وكانت مرة
إلا حقيقة .. غلبنا نطيقا .. وين في الصرمة وقل القدرة
سكتناهن بس ما صنّوا .. وقاطعناهن تاني المرة
وبلة طريق الناس وخيارا
فوزناهو وجانا زيارة
كرمنالو التور وعرضنا .. وخليناهن برة الدارة
دايرين بوسطة ومدرسة وسطى
موية وكهربا والشفخانة .. زيادة الحصة وسوق منضبطة
وصدوا كلاب الحلة يهووا .. ينضم بلة يهووا معاهو
نهتف نحنا يزيد هوهيوا ..

يتبع ...

ناصرعبدالله
05-16-2010, 10:30 AM
(4)

مافي شهر جاتنا الخرسانة .. جانا السيخ .. الطوب .. الرملة
جا الأسمنتى شكارة شكارة
عديناهن ألف شكارة
كرمنالن خيراً جانا
وكل كلاب الحلة الهوّن .. طفشنالن بالجبخانة
وفي صنانة تدودي الزانة
انغالطنا كتير في بعضنا .. أولى المدرسة ؟ واللا البوسطة
أولى المدرسة والشفخانة .. الشفخانة محل النقطة
ونان النقطة .. نحنا أهالي .. وودنا صافي
بينا معزة جرائم مافي
وما بنحتاج لي شرطة ونقطة
تحصل علة .. في شيخ الحلة وناس السلطة
نحنا الإيدنا بنت لي النقطة .. والجيرنا زبالة اطيانا
ناس السلطة إن دارو النقطة .. شي بُكان أرض الشفخانة
وما طالبانا خلاف زنزانة
مدرسة بوسطة
ستين طلبة وعشرين اوسطى .. شغالين ما ملو سخانة
مدرسة بوسطة .. وقلنا غُنانا
يا الجابرية .. الله أدانا
حاج البلة المبروك جانا
جاب المدرسة .. جاب البوسطة .. وبكرة يرجع للشفخانة
نصحى نصابح موية الدُّش .. نمسى نلاقي الضو عمانا
مدرسة بوسطة .. مدرسة بوسطة
وتاوق .. تاوق .. تاوق ..تاوق .. تخ
وفجأة تبين في السطح الخرطة .. وكب تنتصب الميضنة أخ
أخ من حظك يا الجابرية
سابع جامع بالجابرية
وصدوا كلاب الحلة يهووا .. أخ يا الناس الحالُن قطّ
هو .. هو .. هو .. هووووا
في البلدان الحظها فاجع
بق يا الصاح الماك متراجع
حرِّق دبش الدنيا الغلطة
بق وانفرق في الجابرية .. بق في ارحامنا في شافع نافع
ترفعوا امو في حيطة الجامع
يكتب يسقط دجل السلطة .. يسقط بلة وشيخنا التابع
وكشفناك وكشفنا الخطة ..
تحيا كلابك يا الجابرية .. يحيا ضراع الزيتُن طالع
غُلب يصارع مر الواقع
يحيا ترابك والطورية .. الجابرية تحيي الشارع
دايرين كهرباء دايرين موية .. دايرين سلطة وسوف منضبطة
دايرين هسة زيادة الحصة .. الشفخانة بديل النقطة
دايرين بوسطة ومدرسة وسطى...
ـ تمت ـ

ناصرعبدالله
05-18-2010, 11:30 AM
أتبرا الطيبة

(1)

بينما نحن نقاسي بين رمضاء الماسي
و أقاصي المقبرة … فأجتنا اتبرا
فإذا بالمقبرة تتنامى سنبلات
و الماسي قبرة
دوزنوا لحن المبادي فالأيادي حنجرة
لونوا قوس الأماسي كيف كاسي محبرة
وطني … أو اتبرا
خلف ليلاي قصاصي أي فجراً يا ترى
وطني … أو اتبرا
اتبرا الطيبة يا منجم الثورات
كيفك بعد غيبة وغربة ووطئ جمرات
رجالتك الهيبة … نسوانك الحارات
قالن لي قولا تسر … تنفع زمان الضر
كل البلاد أم در .. والمهدي حي ما مات
الخطوة في الشارع منبثة ثورية
بق الغضب طالع .. أبرول وطورية
شافع ورا النافع .. طلبة وأفندية
الجوعو كان دافع .. لي هبة شعبية
ما الصبر ما نافع في أيام كركية
ذات وضع همباتي .. وأحوال متل دية
كهان وجهدية .. وكابات هي ما هيّ
حموني اغرودة والدنيا عيدية
حرموني زغرودة في فرحة عادية
حظروني من عودة .. أو مرقة ليلية
منعوني من ذاتي .. واخواني جندية
للقمع يوماتي سدوبا وردية
شك في هوياتي .. فتيش وسخرية
لكناتي .. لهجاتي .. شلخاتي .. عينيا
أوكير وحمداتي .. باعوضة سل فيا
تحتاج معاناتي لبطاقة شخصية !
يا مسخ بعاتي .. وقام لجنة شعبية
لي حضرة الآتي .. شايل الفرح ليا
عبيت مساماتي .. من غيمة منفية
وعلى أرض مأساتي .. فرغت ما فيا
وضل الوطن شاطيء .. وشمسو المراكبية
النيل ديمقراطي .. والقيفة جمعية
بردت غنواتي .. بي نمة مغلية
بقت هتافاتي .. دوديتا بي إيديا
في دقن همباتي .. وعسكر حرامية
طارت حماماتي .. وركت سلامية
غدروها شماتي .. وكتل الرصاص فيا
لكن يا مواتي .. يا ذمة مشرية
يا عسكراً فاتي .. مافيا وطفيلية
من شرفة الآتي .. وبي كل حنية
أخدني أماتي .. بي طرحة و أمنية
ربطن لي جرحاتي .. وبي مرتق واغنية
سدن لي آهاتي .. فوق وقفة صخرية
سنن لي إيديا .. وصاحن بي صد صارع
يا عيش وحرية .. وانغير الواقع
يا ميتة دغرية
نار التكل ماتت .. نار فينا شن حية
و روحك إذا فاتت .. روح الوطن جية
أماتي يا أمات .. كل الغلابة الجات
من حلفا لي نمولي .. من بارا لي سنكات
غضب الخلا اليغلي .. صرصيرة الغابات
في عب ضلوع النيل .. جيب القلب غيمات
أشواقا تالا الأرض .. والأرض شوقا نبات
أماتي يا أمات .. ود الحياة الصنديد
قولاً لكل عنيد .. وصاحب دقن همبات
قولنلو نحنا حديد .. زي المرمة شداد
اللي ضميمتو يخون .. ما أمنوهو بلاد
يا مستبداً بات .. حارساهو دبابات
كضاب وكضابات .. هواب وهوابات
شن حزبك الويحيد .. وضرعاتك ام حجبات
طظ .. جبهتك وين سيد ... الإشتراكي الفات
لا البوت ولا النبوت .. لا التوت ولا الكهنوت
ونقل الفلاشا أفاد
وكان يحكمونا بيوت .. لو بحكمونا أفراد
حارين حديث الموت .. والبعث والميعاد
كل لحظة روح بتفوت .. وكل لحظة كم ميلاد
وعلتنا يا مسخوط .. مو اسم الله واحنا عباد
علتنا كيف القوت .. والجيهة والمشهاد
ما مر قطراً توت .. ما طال للبراد
الشغلو الكلو زيوت .. ما يلقى زيت لا زاد
ما يلقى الطِّري .. وضاقنبو السبل
العجل العري .. النار والبقل
خيري وسكري .. في الدقن ام قمل
يا الدقن ام قمل
شيلي وصدري .. وجيبي دمار دبل
زير ولباش كيري .. شامبو دلال وفل
غني وشكري .. يا كوز المثل
في الضيق منهري .. وحمدك الربل
وبت السمكري .. جيهتك للرجل
دهناً كركري .. الطلح الكحل
هوي يا العسكري .. غيرك من قبل
عامل فنجري .. وفاكر الناس هبل
بى اسم الدين يطل .. وبى أسمى المثل
يرغي وينفعل .. ضاحك بالعقل
ما داعب طفل .. لو..لو قالو كل
ينفرطق نعل .. في المرة والرجل
قاصد ننشغل بي سنن الغسل
عن موية وأكل .. لا توب لا في ضل
نقعد ننكتل .. في اوصاف الرسل
مين برعى الإبل .. وتبرا الغيمة ضل
والمن دوب طفل .. يفتي ويشفي غل
والوكتين يطل .. يلفح للعقل
حيلتك ما بتحل .. في فكرك عطل
زهدنا فاض فضل .. وما ناقصين مثل
وين يوجعنا وين .. ماك داريبو كل
ما شعنف دقين .. شنف حالنا ذل
عيشة يا مفتري .. ويوم كامل شغل
نسرق ننكري .. ولا بلاش تكل
غني وشكري .. يا كوز الدبل
زير ولباش كيري .. والآية بــ رطل
بس يا عسكري ..
يا عسكري التالفين .. ويا تالف العسكر
يا لايصاً في يمين .. والشعب قد أيسر
ما جف ساق ابريل .. اكتوبر الأخضر
يات شيمة ليهو تشيل .. كل ما الرياح تكتر
فرعو الهطيط بيميل .. بس ما بينكسر
يتسامى دغري عديل .. كلما الرياح تنتر
طير الخطى الجايين .. ما بتفزعو الهزات
لا صقورك النازات ..
من دم رعاف الطين .. ودنس الحياة ام لذات
فاكر رقبتك مين ... وفاكرنا مين بالذات
دي القرشي .. قاسم أمين .. ويا دا الشفيع ما فات
وما اعظم الجايين .. يا اتبره وجايات

يتبع ...

ناصرعبدالله
05-18-2010, 11:33 AM
(2)

حاضرنا ما ضنّين .. وكل الدروب صاحيات
يا لابساً كم وش .. على مين تدور وتحوم
شغلك ضلالي وغش .. نضمك عسل مسموم
قاصد عيونو تتش .. ويرغى البلد مقسوم
طقّت جبهتو شمس .. فارت في راسو دموم
الجاي بعدو يمش .. يعتب بعيد مكروم
تطفش طيورو تطش .. وبومك يعشعش شوم
يا ضاحكاً غياظ .. لي شعبك المأزوم
ظنك ليالي حراز .. ما دلدل الخروم
في مزارعو .. لافي رذاذ .. لاغيمة طاشة تحوم
لا زيت ولا أمباز .. قطّن مصانعو عموم
وانعكنن الإفراز .. وقد بلغت الحلقوم
وبرضك تنوني انقاذ .. ينقذنا منك يوم
بيناتو نمشي عزاز .. زي النبي المختوم
يا ضاحكاً غياظ .. لي شعبك المأزوم
من دكة التلفاز .. دايماً تطل ملخوم
وتنطاير الإنقاذ .. وزبدك يرك متخوم
عرب الكنانة حجاز .. مستقبلن مهموم
عشمان في كوتة جاز .. عربونا كم قدوم
من لذتك تنحاز .. مع غزو ما له لزوم
كان ماك نتن لذاذ .. فتان ولخبات كوم
شن غزتك في عكاظ .. شعب الكويت مو الروم
لا قصباً لا عكاز .. وقت الدميرة تقوم
لاك نافعاً حجاز .. وشن للعتاب واللوم
فوق العليك لاواز .. تشهد سما الخرطوم
غماز ويا لماز .. هماز ويا مفصوم
ما الفرق بين ملوك .. كادى الرعية تلوك
وعسكر وراهو بنوك .. ساوى الغلابا حنوك
طول النهار عوك .. عوك والليل تراب وصكوك
تملا وتفضي تنوك وتملص ضميرا هنوك
واسترني يا المبروك متل التكني أبوك
ناس بي أخوي وأخوك لا اخلاق لا دين لا سلوك
اخلاق ..دين وسلوك
يرمي الولد في الشوك أما البلد مشكوك
يا شعب يسلم فوك .. عطفك رضاك وعفوك
قول للخزين صل صوم ولا تنكسر مهزوم
ولو فضلت الخرطوم من تصحى قبل الطير
بعد النجيمة تنوم
ومنعاشى يا طيبة بخير مكفية راجية اليوم
ممنوع عليها السير غير لى كبار القوم
والسادة الأمجاد ..
لابد من يجي يوم ساعاتو ما ها بعاد
يجي من صراع اضداد
من امة حق الموت ما لا قيا وانتو سعاد
قول للدعي المتخوم
يا متفن التفاح .. وشغلك قيافة ونوم
في شعبك الكداح .. وفي أطفال مو لاقى الدوم
يا أرزقي ومرتاح .. ما جابهنو هموم
جاييك زمن كتاح .. جاياك رياح وغيوم
جاياك مطور الصاح .. جاي الصح المعلوم
من كل فج في كفاح ..ومو وحدا الخرطوم
البيننا بينك دم .. تاراً غريق وجراح
فينا البحرفو السم .. فينا البكفو سلاح
شهدانا ما قت كم ... لا ياتو فيها فلاح
لا ارتحت شلت الهم .. لكنو يا سفاح
لا الإندلق بنخم .. لا بتتوزوز أرواح
ان النفوس جم .. جم
ود الفضل ما راح .. وما طال فينا شهيد
عصيان وإضرابات .. ما بنفع التشريد
لا بجدي صالح خاص .. لا مسخك الشعبي
وغنايك الرقاص .. لا دفاعك الحزبي
لا حيلة ابن العاص .. لا السجن لا التهديد
يابوت ولاد الناس أشراف وما بتنداس ..
ما بمشي فيها وعيد .. وفيها الوعد متراس ..
فيها العشق صنديد .. وصاد أعزلاً دواس ..
يا أرذلاً رعديد .. يا أبخس الأنجاس
وسع مجاري الدم .. زيد السجن ترباس
يا هالكاً مجراس .. مصاص خزا ومصاص
خازوق بني العباس ..
زي ما انت عندك دين افريقيا ليها تراث
وكان تنهري وتنغاظ .. عبداللطيف والماظ ..
ما حرضم النخاس
يا رباية المنظمة .. المريبة المسجمة
دي البلد طيبة ملهمة .. ما بتزوّر ملاحما
كنتِ خدرا ومنسمة .. جنة طيبات مواسما
يا ارض جاك مسيلمة .. في ايدو كيزان مخرمة
فاضية فاضية ومعلمة الله من دين ولا انتما
بين دهاليز مضلمة .. وبي مراويد مسممة
تشتك وانتي مرغمة .. يا أرض صابك العمى
وكل شيء طار السما .. إلا المطر طار من السما
وما اكتفى السفه انعما .. دكن السفة دردمة
وقال نشرع نأسلما .. وفي البداية النقسما
ويا كضب .. لا بتقسما .. لا بتقدر تأسلما
ويا كضب .. لا دا بلسما .. لا ترابيك مرهما
كلكم ملة مجرمة .. والبلد في البيكرما
في الغلابة المنظمة .. في نقابات مصادمة
أو جماعات مقاومة .. من خصوم المساومة
واللا أحزاب مصمة .. سلطة الفرد تهدما
من أساسا وترايما .. وبالبنوك المرمرمة
من عرقنا ومخمخمة .. مافي خير غير نأمما
إلا وجعة ملاحما .. الغلابة المألمة
تنزع السلطة بالدمى .. وأي ثورة نقيما
الكروش المنعمة .. كش تلملم تخمخما
تصحى ذاتا المرخمة .. وللعساكر تسلما
دايرة فعلاً مأزمة .. إلا لابد لازما
يا الغلابة المأزمة .. من تجارب تعلما
من دروباً تقدما .. والديمقراطي أسلما
هو البوضح معالما .. والمعالم تفهما
إنو سبة مظالما .. في الارض ماهي في السما
ولو دي أفضل عوالما .. يبقى في خيلها مكرمة
ولو دي أفضل عوالما .. يبقى غييرا لازما
وعِن تلملم عزائما .. غيرا ما بيبقي حاكما
شعبنا وفارس الحمى .. ينطلق بي ملاحما
تصبح الدنيا سالمة .. والخلائق مسالما
الحبيب للحبيبة ما .. من عساكر نقاسما
شعبنا وفارس الحمى .. ينفرد بي ملاحما
الحبيب للحبيبة ما .. للعوارض يقاسما
منك براء .. ألديش إيمانو والإخلاص
يا سم بنوك العيش .. يا أرزقي ولحاس
ايد تقبض البقشيش .. وايد ترشي للحراس
يا كرشك القدر ايش .. واكبر فراغ الراس
ماك جايي منقذ ايش داعي الهلاك للناس
شن داعي للفتيش .. حالة الطواريء وفاس
حظر التجول ليش .. ليش كتمة الأنفاس
وليش جايي أصلاً ليش .. يا جايي من غير ساس
ما قابلك دقيش .. جوة القطر .. في الباص
حال حلة تشكي دغيش .. ما عشتو ها الإحساس
لا جُعْ لبست الخيش .. لا سهدك قراص
أطفال حفايا تكوس .. للموية في الحصحاص
يوم ما لبست البوت .. في هيصة الأعراس
تعب البرد والصيف .. حمى النفس والراس
طيب حتقدر كيف .. تلمس قضايا الناس
نار المدن والريف .. الضمة ما بتنقاس
كم نفنفت نفنيف والأقوى منك فات
فاكر الحكم طرطيش .. والسلطة قوة راس
كتيل رقاب في دغيش .. حميس جهالة حماس
مو رقصة يا درويش .. عليق بخور ونحاس
ملينا شعب وديش .. ملو الأرض والفاس
الهبة تبقى بشيش .. والحيطة من فد ساس
قول للحرامي بريش .. حلتنا مو تكساس
دم اخويا مو معليش .. وانا ماني نايم حاس
وين تمشي وين شقيش .. اترك برا القصاص
واهلي الغبش ديش ديش .. وكل البلد حراس
ديل نحنا مانا قريش .. وماك ود اخو العباس
والشعب ماهو قشيش .. حالك يصيدو يباس
وسوداننا ماهو حويش .. بيقفلو وبي ترباس

يتبع ....

ناصرعبدالله
05-18-2010, 11:35 AM
(3)

اماتي يا أمات .. قولن لكل عنيد على شعبنا وعاناد
قولنلو نحنا حديد زي المرمة شداد
وين تمشي يا رعديد .. وانا يا دا يا جلاد
جيت من قريب وبعيد .. من ادنى قول في البيد
وآخر فرع غابات
هبة رجال و ولاد
نسوان عزاز وبنات
أجداد وحبوبات
جيتك بكل جنس .. أحيانا والأموات
جيتك بكل لغة .. رطان وصاحب ضاد
جيتك هجمة السيل .. مطراً بلا ميعاد
لكني ما جيت ليل .. جيت في الضحى الوقاد
وما فوقي إلا نشيد ..
وما تحتي إلا ثبات ..
ما في إيدي إلا الأيد شعباً جنا حوبات
وين تمشو يا أوغاد ..يا شرزمة كابات
خانت ثرى الأجداد
بي 300 زول في خمشة دبابات
بدل البطمن خوف وبدل البيلم شتات
بدل البسند الجوف صفيق ومؤتمرات
بدل المدارس جات تملأ البلد ثكنات
بدل القلم رصاص بدل الفهم خوذات
محضر بدل كراس جيهة النشيد غارات
حس رنة الاجراس ابواق وصفارات
تمريناً للجمباز
بدل الشباطة ابوات الحصة كتم انفاس
درس العصر كشات
فتش بيوت الناس واستجوب الاموات
جز الفرع بالفاس ام العرق هيهات
انقاذ وما ادراك انقاذنا الاهلاك
انجاز وما اسماك تكويشة الملاك
يا مسخرة مأفون ترباية السفاك
يا مدعي وافاك زمبارات القصبة
حيكومتكم كعبه
بموروث الشعب والبسملة مغتصبة
ضراعات العمال الزراع الكتبة
سارقين لبس الديش باسم الشعب الطلبة
يا شناق القول يا ربط العقبة
يا خناق الزول يا كسار الرقبة
كنا بنأكل فول نرجى الله في الكربة
مر علينا الحول ضِقنا وضُقنا الادبة
وانت تجب كف كف تنضم لمن تغبى
مؤتمرات السف شكل لجان الضيبه
شنفت الاحزاب قت كوفية وعذبة
الجمعية ضراب زي الما منتخبة
حق الله الاضراب وأي حقوق مكتسبة
قلتو سياسة غاب
طيب لية يا كذبة ما وفرتو القوت ها الحالة الصعبة
ما وقفتو الموت والنهب البى قلبة
دقن فرشة البوت فوق جوطة وغلبة
ولانزيف الدم منو عمارة وعربة
وشر العيشة الغم ليكم خير يا كسبة
كسبة وضلاليين لي بنوكم الخربة
تحيو وحلاليين وللغير حرام وربا
السلطة للاحزاب الشعب ساقا غبا
ولحزبكم ده ثواب جاء من الله جابو هبة
بجيهة الله الجاب وبجيهة الله ابى
لي بيتو انتو قراب من بحرى بقببا
تنفرج امدرمان والمهدى في الكنبه
تنشايت ام ضبان ود الترابى وباء
فوق تربة السودان في ضرايحو كم غرباء
يا ملعبة كيزان دنيا وبلاش غلبة
وجيتاً ظهرتي بيان يا اتبرا التعبة
ما ضاقت الاديان والدنيا كم رحبة
وفي حضرتك فتيان ما بدلت جببا
الدروشة الغليان الهمهمات غضبا
وكم دوبت بمبان بمواقفا الصلبة
يا ملطشة فرعون
موسى الشوارع عاد
وعلى مين تحلقوا دقون كان اتخلقتو جداد
الشعب كلو عيون الأمة بالارصاد
اللي ضميمتو يخون ما امنوهو بلاد
وكان بيحكمونا بيوت لو بيحكمونا افراد
يا شعبنا الوقاد يا صاحب اعتى جهاد
يا ابن الغلابة الحر يا جيهة يا مشهاد
كتر السكات بيضر وقت المهادنة فات
بيك يا النضال المر تحلى البواكر هات
ايدك لعالم حر والتنهض الكلامات
طول ما الضلالة تضر زي ما هى جات بتمر
يا مفدر الظلمات يبقى اللقى بيسر
والمهدى حي ما مات
يا اتبرا الِبرة يا منجم الثورات
اتبرا ……. اتبرا

ـ تمت ـ

ناصرعبدالله
05-18-2010, 11:44 AM
إلاَّ نوري الفيها أكتر

(1)

من زمان قالوها
صدِّق ..
إيد فرد واحدي
آب تصفِّق
إيدي في إيدك يدفّق
خيرنا للأحلام نحقق
… … …
لي جرح نورا النمرتِق
العوازل دايرا يفتِق
جات تضيِّيق ليها مشِّق
حلُّو خلَّ أرقوقا ينتق
يروي شتلاتنا وتعمشِق
لا تقوم واطاتنا تشِّق
… … …
البحر لا قدر الله
كان كسر ياهو المغرِّق
لاب يحابي مراكبي ولاَّ
بين بيوت الطين يفرِّق
للخزاز نومو ومجرّح
في الرقاد ماب يكفي فد شِق
لاب يطير الطير مجنّح
والمكتّف كيف يفشِّق
… … …
نوري يا باجور يدقدق
وإيد من أية حوض تورِّق
يا متر كلما نمتِّق
تاني حالاً زين يبتِّق
ناسه شِدّة مو التشوِّق
ما ها بالساهل تشرِّق
زول يكوس في زول يرفِّق
ما التراب كير عِقو ينتِق
في ضليل منقايي ، مشرِق
من عمرنا عياني نسرق
نحكي عن حالنا ونقرِّق
نقطع القافات نفرِّق
…. …. ….
الشمش لابد تحرِّق
لي جلودنا عشان تطرِّق
عز جدودنا تخلِّي يبرِق
ما ها من ترهاقا تشرِق
… … …
في ترح في خير تدفِّق
أمَّة .. لُمَّا عليها تشفِق
المعاوين حد ما تشرِق
لو مو نوري عليها تفرِق
يا جرف كلما نمتِّق
تاني حالاً يبتِّق
نفسي فوق قيفك محدِّق
في البحر والموج يصفِّق
نعشقه وبأسبابه نعشِق
عازة السودان
ونعشِق
عِزة الإنسان
ونعشق
والملآن شمتان يطرشِق ,, . ,,
**** **** ****
نوري ذِكْرِ
وطارة .. قبّة
نوري .. فِكرِ
ودارة .. ربَّة
أصلو لمّا رموها حبّة
وقامت اِنشرت محبّة
يا السواقيك
طِبق أناقيك
بي صلات أرحام وقربى
وين تروح الحِن يلاقيك
كيف يكون الحال في غربة
… … …
يابا يا الفكي شيخ
سلام
يا فقير فاقِشلُو قبّة
وطار يفتِّح في الغمام
والغمام بي خيرو صبَّا
عام ضرائح زوله نام
مطمئن بين أندى تربة
بختو ساب الجنِّي قام
يلقى فاكهتو ذاته وأبَّا
العمر عربون
ونوري
جنّة في حفض الله تربأ
… … …
الصغيرين يا تُمام
في عدل نسّامو هبَّ
من نخل ناساً تمام
لا عول لا فاطَّة شَربة
… … …
نوري أقول البدرِ تام
كم ليالي ألقاهو غبَّا
الشمش ..؟ .. بلقى الضلام
خبَّا بي نجماتو طبَّا
ال أقول نوري الغرام
وفي الغرام البيني شبَّا
المربِّى مع الكلام
في الدموع والدم مخبَّا
يا بيوت الطين سلام
شوقو بالتحنان معبَّا
زي مريكب مُوني عام
والصلاح في طِيابو هبَّا
… … …
يا .. ألِف .. با
حوض مباديك ..
مو كشينبة
أَوّّّ .. بحر ..
حين دارت أُمبَا
شَوّّّ .. مطر
عِن طارت أبَّا
التدورو تقول مربَّا
والبتأبى نفسنا تأبى
… …
نوري يا أم ترهاقا
يا أمِّي
يا العليك ما انتاقا
هَمِّي
بي خيول فشّاقا
هِمِّي
لمِّي شوقي الطاقة
ضمِّي
ماب أجُر من فاقة
نمِّي
عشقِ حُر قد لاقى
دمِّي
ماب ألِف الطاقة
عِمِّي
لا أم ألف محّاقة
صمِّي
وفي شمش حرّاقة
حُمِّي
وقاطع الفرطاقة
عَمِّي
من صباح إشراقة
نجمي
ومن سماح أخلاقه
نضمي
الحنان جِنِّك تردمي
الجنان جَنَّك تقسمي
يا أم عِرِق لأعراقه
إِمِّي
لا مرض لا فاقة
وأُمِّي
بين قلوب أفراقة
أرمي
ريدتك الأشواقه
ألمِي
الأناقي الساقه
حلمي
من خداره أوراقه
ضلمي
ما طريتك ..
وإنتي إسمي
لا نسيتك
وإنتي رسمي

يتبع ...

ناصرعبدالله
05-18-2010, 11:46 AM
(2)

نوري يا بغر الحواري
من بساتينا أم قماري
موية ليل ونهاره جاري
توَّرت نفس الطواري
عبَّت العطرون لواري
من خدارك ويا خداري
البلل لليلي طاري
حس حسونة الديمة ساري
مرقة الناس العصاري
والبراسيم التراري
ما أروع الليل
حين تساري
لا دواري ولا سواري
لا تِوقِّف في كباري
الحبيِّب دارو داري
في عيونو لقا ووداري
تاري يا نفضة غباري
من رحيلي وهم سفار
نوري رزقاً جاني جاري
ولاني حاري
ولاني داري ؟؟!
… … …
يا خشم باب لاب أدقُّو
ولاب أصفِّق بي إيديَّا
وفي المراح الدايرو أطلقو
أقضي للغرض العليَّا
يا الحسين رسَّل لأخيو
قالُّو طلقنا الرضية
يا الحسن مرتك مهارجي
أمِّي شان هرت البنية
الحسن ردّالو هاشِّي
والمشاعر هيَّ هيَّ
يا الحسين الطلقة ماشي
إلاّ رجعه في العشية
من ضرب للشافعي خازي
باقي حذَّرت الولية
إنت ما شفت الحرازي
حين تقع خرُّومة نية
وكيف حناناً في الجدادي
حين تحولق فوق حديَّة
شِد ضراع مِد الأيادي
فوق مواريثنا النديَّة
الكبار من كلمة طيبة
يرضو أبّان الرضية
والصغار بس كيف هي تربا
باشري بالخير دي القضية
ويا الحسين تمشي الرجيلى
وتغري خيلاني التحيَّة
قول لهم دوعلو العجيلي
حُمد أُحمد ناوي جيَّة
في الدويم ود حاج تزورو
وخت زيارتك حسن نيّة
وطاسي طاستين لي طيورو
وشيلا ندهاتاً قوِيِّة
قلبي منطبقات نذورو
والنذر دين مو شوية
… … …
في الطريق أغشاها أخيتك
وورَّها الحاصل عليَّا
كاتبي قالت وينا جيتك ؟!
ناسي ظرفاً مُو باِيديَّا
لو لا أكون كتَّر عليكا
عندي ليك كمِّين وصيّة
من وراء نار كوري توقد
ولي جبل كولقيلي حيَّة
يا الحسين نتلاقى طيِّب
وإنتو طيبين وأمِّي حيِّة
جنبي واحد من قوشابي
قالَّك أغريها التحيِّة
باقي في الغربة العصيِّة
العلائق قاعدي تكبر
والمسافات القصيِّة
بين جنات الجيهي تقصر
تلقى واحد من قرورة
وفي الجنينة مرقلُو كمْتَر
لاها صِرمة ولا الضرورة
فينا شيتاً مُو مأتَّر
يا هو زولاً في الكركي
من بعيد بي إيدو أشَّر
هوي سلام كورك كُرُكِّي
طار وكرودينا قرقر!!
ياهو دا السودان
يا أخيي
إلاَّ نوري الفيها أكتر
أيِّ زول بالله حيِّي
قول لُو صابرينبك تصبَّر
قولُّو خوجل كبرياءً
عزّة بي نوراك تنبَّر
إنت يا البتموت حياءً
وروحك الفوّاحة عنبر
صندلاً معلوم فؤادك
كلما حرقوهو عطَّر
ياتو ريح تسبق جوادك
وأيِّ غيم من لاكَ أمطر ؟
… … …
كلما نقرش مغنِّي
وبالمحبّة الخالدة طمْبر
وإن عَجَب !!؟
يبقالي عنِّي
ما قدِر بالضبطِ عبَّر
…. …. ….
أتبنك مورودة منِّي
صفحتك تملاله دفتر
يا وتر غلبك تغنِّي
صح عيونا الفيها أكتر
.؟؟؟.. …؟؟؟
جِبتَ ما خلِّيت لي جِنِّي
فيُّو خير ..
من وادي عبقر
كان فزع ..
جدع ..
إلا فنِّي
يي الحسالو
خيالو قصَّر
يا طرابيل عرِّفَني
نوري
أَم تاريخا أنضر
واللا زول
تحتك تدفني
تلقِي غطَّى الواطة أخضر
…. …. ….
ليْ بلد
رابَّة وتغنّـِي
قط .. قطَع
غنّايا دنقر
وصنَّا صيد الدارة
صَنِّـي ؟؟..؟؟
الأذان ..
الله أكبر .

ـ تمت ـ

ناصرعبدالله
05-18-2010, 11:47 AM
السايقي واصلي

كنا أحسن حالا وإن كان
ما إتلقي الحكم اليصلِّح
الزمانات كانت أمهل
المعايش كانت أسهل
كانت المرحات تملح
كان قشيش الأرض أخضر
والخدار للعين يفرّح
كنا من طرف التقاند
نملا ماعونا ونروّح
كانت المويات حبطرش
وما مرق بترول بلدنا
بي ضي النجمة الحميرا
أو القميرا نسوق نبوق
والمتر بي فوق مفرّش بالسواعد
شيل نفسنا وختوا واحد
وفينا قولة الله يساعد
كانت أصدق
و اليتم للتاني يلحق
كنا نتونس نفاقد
و الرقاب تالا التراب عرقن يسابق
و العيون بالحر يقطرن
والعريريق تلقا لاصق
في جسمنا وفينا كدّب
بالترابه السودا دابغ
بس تبرّد لي بطنا
قولة الدارعنو فوقنا ده من قطنا
تمرق الإبر المكيني يجيك وطنا
ثم تلقي الباقي كلو بصاره ايدينا
والله ينصر دين بلدنا
وينصر إخلاص الشغيلة
علي العفاريت الدخيلة
تنكسر ريح العوارض
وتبقي كل الدنيا هيلا
وما يصح تملاها عافي
وتحيا في أحوال عليلا
هي البتستاهل رحيق
مرقاتا روقاتا وعديلا
وفي الحقيقة هي أولي بالخير
من فقر شيخ القبيلة
و الجلاليب الرهيفة ولمعة الكاب العميلة
بتنا لمن نقول لا
نستغفر كأنو كفرنا بالله بعدنا عنو
مع أنو عارفين الله عادل ومافي ظلماً جاي منو
والرسالات السمويات جميعن عادن الجوع حرمنو
كنا ننضم زي فياقة في ضليل منقاي نفطر
والقراريص حار فراقها
قمحة سمحة ومو إغاثه
من زارعتا للعواسة
جمبنا الجدول شرابنا جاي من نيلنا اليطمن
ونيلنا مدعوم من سحابنا
صن و الشاي بي رواقا
وحيو دارفور يارفاقا
سنتطا ونبقا الدقاقا
الجنوب الارضو عاقا
الله يديها اليخارج زولا من مطموسا ضاقا
وكب نعكم في الطواري ونلقي نفسنا في هجير
بلا المراكبية التمقدف والبحر فاير دميري
بتنا في حالة طواري وحظر هاري
وطن تجاري ونيلنا جاري من الزفاري
الفي الكباري كرم جروفو عقاب صحاري
قرف يمين ووجع يساري
بتنا نقضم و الوخم شال فوقنا يردم
الا حالنا وبالنا بنضم
سبع حيكومات ومالن كلهن سفهن رجالنا
سبع حيكومات ومالن كلهن طلعن خوازيق
كلهن جحدن نضالنا
سبع حيكومات ومالن كلهن قلبن علينا
كلهن حرنن قِبالنا
وقولة العمال سواعد الثورة
و الزراع ضراعا وقولة حماية الديش لشعبوا
نفاق اشاعة
الثورة وينا
خزي الجلاليب الرهيفة الإنقلابات المباعة
انقرعوا يا حكام جرايد فالصوا تلفزيون إذاعة
نحن ناس الوجعة عارفين ياتو جيها
قلوبنا فيها معانا بالحق و الامانة
قبل نزيها وياتو جيها تكت وشيها علينا بالزيف والخيانة
كفانا قطت
وكانت المرحات تملح
وكنا أحسن حالا وان كان ما انلقي الحكم البصلح
إلا ما دام فينا حرقة
وفينا فورة دم غبينا
نعز نبينا ومن نبينا
نعز وطنا ومن وطنا
نعزو عالم
من محبة سلام سكينة
غيمة غيمة ونبتا نبتا وطينا طينا
ما بيصد السيف جفيروا إلا ترتاح المدينة
و البلاد تفرد جناحا مع الزمانات الحنينة
و العصافير و الشجر وجملة اطفال الفقاري
تغني للمطر البجينا
في الصباحات الطراوه والندي البغسل جبينا
فيا وطن تصبح خير
بيكا اصبحنا ومسينا
فيا وطن تصبح خير
و الميامين مينا مينا
فروا ضرعاتم بوارق
لي ملاقة السفينة
ويا بحرنا السايقي واصلي وما نضب ذات يوم معينا
والله كانت ديك عترا وياما كم عدلت مشينا
فيا وطن تصبح خير
بيك اصبحنا ومسينا
فيا وطن تصبح خير
و الميامين مينا مينا
فروا ضرعاتم بوارق
لي ملاقة السفينة
ويا بحرنا السايقي واصلي وما نضب ذات يوم معينا .

ناصرعبدالله
05-18-2010, 11:55 AM
لو رجعت وايديني فاضي

لو رجعت وايديني فاضي
يابا ما راح تبقي راضي
والبلد ما بتبقي راضي
ونفسي ماراح تبقي راضي
والنخيل الكان بشابي
يهش ينادي يصد يقبل مني غادي
والدروب الكان بتفتح ضفتين
احضانها نادي
عليها اه تسب خطايا
تكب ترابها علي قفايا
تقوم تعتر لي جوادي
والقلوب الكان بتفرح
تكشح الشوق في الايادي
جيتي ليها بلا ابتسامة
تبقي زي جيت الغمامة
للاراضي الغبشة فاضي
با نخل ياطين سلام
يا غلب في المغربية
لما تتزمر صبية والا حبوبةً قبيلك
باركة لي امي الشهادي
في التراب الراجي لي
تنقلب بي شد علي
وتنكسر قدر الولادي
يا غلب لو عدت فاضي
للغمت في ايدي موادع
او عصر حق الزوادي
يا بحر مابي الزيادي
يانخل ياطين سلام
ياضراع في التقله يكدح
يامدارس ياحدادي
ياغبش صر ياغلابة
يامقاطيعاً في وادي
وضالتن ضلت في وادي
وداي كفرن فيني شعوت
خيل قراطيسي ومدادي
من مداين غيمة دافق
نيل سلام يروي البوادي
او يبل ريق امي يمة
شوقي جاي اشواقي غادي
مشتهيكن نشتهيكن
في صهاري ايامي يلمع
في ضلاما يبق وشيكم
وفي خطاوي الناس بفتش
لو اصادف يوم مشيكم
وحد ما اعاين في عيونن
ما الاقي متل عيونكم
وغربل الالوان وحاتكم
ما لقيت يا يمة لونكم
ما انتو لونكم لون بلدنا
لون جناينا لون سماها
لون ترابا و لون نخيلا
لون قماريها وهديلا
وضفتينا الماسكا نيلا
وبينا هادر زي مسيره
انتو صوتكم صوت بلدنا
صوت تواريخا وضميرا
وصرختو الدواية العزيرة
وباقي زي نار الهجاير في حطب
غابة الظهيرة
حس شروقا الفي عروقا
حس جداولها في شتيلا
حس بهايما في المغارب
و النسيمات الهميلا
حس وليداتا وغناهن
فوق عميرن ليله ليلا
يسالو القمر النجميات
عن شيليلا ويا شليلا
يا شليل ما شف بطانا
هد ظلم الدنيا حيلا
يجروا عاجين الشوارع
واحليلي ويا حليلا
ياحليلكم بشتهيكم
انسي وارجع بشتهيكم
إلا عاد كيفن بجيكم
وماني شايل الجيت عشانو
عشانو فارق ضو عينكم
عايز اقولك بي صراحة
من وصّل ما جاتني راحه
جاري فوق الفوق افتش
للشغل ما سبت ساحة
كم برد جا إتغت بي
وكم هجير سواني واحة
كم شمس صحيتا قامت
ما لقت فردة جناحا
والرياح باليل تعافر
تورت في الذات جراحا
وكان حبيت العرجي قالت
ما ح ترجع لي مراحا
في بحر ممسوح مأسي
شاقي تحلم بالمراسي
ما الشغل يا يمة قاسي
الفراغ يايمة قاتل
في انتظار ما عندو رحم
وكل شي بيناتو زحمة
البرد يايمة كافر
وصيف غريب ماضاقلو نسمة
وكم بطون احلاما لقمة
وكم بيوتا انوارا ضلمة
ياني زيك بينا يودر
بالو يضهب ضمة ضمة
يما يتعب حالو يصعب
ما المعايش قاسي يمة
يابا يالكدح المضارع
ياوتر نغم الطواري
المدن شرقت غناي
توكت صوت الغفاري
وادت اولاد الحرام
الكرابيج و الامارة
ميضنة جامعنا تنقز
ما تصل كتف العمارة
أن دعت الحضارة والرياح
بيها تتعوز حصن النفس الابية
وارخي اضانك يابا لي
ساعة اقولك بباسطة
هنا الشغل داير وساطة
ومن وسيط قاموسي خالي
والمكاتب من تشوفني
تصفد البابين قبالي
ما اتملت بي الفيها فاضت
وما غريب مالا ملي
وما حارجع يابا لالا
لا حاهاجر الا تالا
نجمتين خاتك في بالا
نجمة للخير والجمال
واحدة للحق والعدالة
ما انت عارف اني حالف
بالكسالى المو كسالى
بابتهالات العطاله
بجريهم في هجاير بقت النار من رمالا
بالبلد بى الشالو شيلن
وفي وجيعتا وقالوا لا لا
بانتظاركم طول نهاركم
شرقت الشمس وزوالا
بالصغار المرة تفتل ومرة تجلب في حبالا
وبالايادى الياما شادت
ناقشا عزتا بالزباله
بكنايسنا اليتيمة وكوم جوامعنا الثكالى
وبي مدارسنا العليهم دقت اجراس الدلالة
بي جدودنا الماتو ساكت
يابا بالضايعين همالا
بي تميراتن تضاددي
لاحيت لا موتا شالا
بي مشاريعنا البتحلم زي عوانس
راجية يوم جية رجالا
بي خضارنا القام مهضلم
عينو موية النيل قبالا
بي بكية اختي البترضع
والضياع واقف قبالا
بي تويب امي المفضل
خير وشر ساتربو حالا
بنكرب يايابا واصبر
رغم انها ماها حالا
رغم انفك يا عوارض
يا تفاهات ياسفالة
ما ح اركع ما ح اسجد
ما ح اعبد للخمالة
وبنكرب يا انتو واصبر
رغم انها ماها حالا
وكان حفاير الصبر قلت
في الضلوع بحفر لي دالة.

تمت

ناصرعبدالله
05-18-2010, 11:57 AM
آه يا غبش

آه يا غبش
ما عندي ليكم غير نغيم .. برجوه ينفض لي غبار زمن القسا .. الكتاحة
يهد عرجون نخل صبر الغلابة الطال ..
يحت يخرت .. تباريح الأسى الممدودة فوق نور الدغش
يا نورة آه ..
يحرد كنائسنا المسيح .. يعرش مدارسنا الصدى
ييبس يباس حلق العصافير الوديعة من البكا
إندردر الصوت البعيد أسيان تصر من دون صدى
ينكفرن الفجر الصبوح .. يحمي الزهيرات الندى
تختا الدراويش الضريح .. يسكن خلاوينا الجنون
يهجر جوامعنا الإله
يا نورة آه
تطرح غيوم الشوق تئن .. تشرق تموت خيل كلمة الحق التناهد في الشفاه
يعقر بسيمة الصح مع لوبي الجروف
تغرز ضريعات الحروف
ينشف مراح الأمسيات .. تتمطق الأرض المروق والأغنيات
اللي الشروق .. والأرض والحب والمطر
تضهب تتوه .. وكتين يضيع عرق الجباه الشم .. شمار في مرقة
آه يا نورة آه
من دربك التور نفس خيل الصبر .. فتر خطاوي الشوق وراه
يا نورة آه
ساعة الشموس الغر .. تهضلم تلحق الصح في المغارب
تدفر الضو الكهارب
وفي وشيك تدفر المدن الضبابية السرابية الكآبة
وحائط التيه والطشاشات فوق قفيك
يا أم عوارض .. مو دعاشة .. ماها شبورة وتقيف
جاي ليك يا نورة غيمة .. تملا ماعونك خريف
يملأ عينيك ويفضل .. يروي جواك العطاشة
مو دعاشة
يا مطر عز الحريق
يا مصابيح الطريق
يا المراكبية البتجبد من فك الموج الغريق
يا الجزاير النتحويبا .. لما إنشعوز بحرنا
يا المراسي النتحويبا .. لما إنشعوز بحرنا
يا نشوق روحنا ودمرنا
يا المحطات الحنينة القصرت مشوار سفرنا
يا ما شايلك بين حايم
أيوة شايلك بين حائم
في الأرض تكون قضية .. في السما الاحمر غمايم
بي برد نغما السلامي .. رطبت حلق الحمائم
طنبر النخل التبلدي .. راقص الأبنوس وصفق
لعبت الصقرية موجة
خلت النيل هاجلو هوجة
بشرت بالخير بلدنا .. شالت الشبال نسائم
جددت زلفي القديم .. أمشي بالماشيبو أقاوم
لا بتكبر راسي فورة .. لا بتصغرني الهزائم
جنس يا نورة ابن آدم حلمو في عالم مسالم
لا الليالي الماها ليا .. لا الشماتات العليّ
لا البنوك المخملية
لا تفاهات الحضارة ..
لا عفاريت المدينة .. لا العمارات السوامق .. فوق ضهر ناساً فقارى
لا الهتاف الفاوة ضارى
غطى بالي من الفوارق .. لا الألوف الطمطمية
لا البرندات الوسيمة .. ولا الأسامي الأجنبية
بتمحى من عيني ملامحك .. وإنتي جاية المغربية
جاي دايخي المغربية ..
وشك المقبول مكندك .. سامسونايتك زمزية
كونشبر .. مرزبة مقطع
ريشة فانوساً مدردح
قلت بيهن لي زمانك .. يا زمان الحجة عندك
يا زمان الآفة حدك .. لا تطا الوردة الصبية
يا نفس فجر القصائد .. يا بلادي
القطع قلب الروادي
باللواج الجاي وغادي
ده ما هو صوتك .. لاها صورتك
دي بترقش ناديي فوق صدر الجرائد .. ماها صورتك
لا هو صوتك .. لاها صورتك
إنتي يا الفي إطن الصحارى
شفع العرب الفتارى
البفنو الشايلا إيدن .. ويجرو كابسين القطارة
يجرو باريين القطارة
لا سراب الصحراء موية .. لا حجار سلوم موائد
إنتي في الغابة اليصارع .. جوفو للآهات تلكي
يا مدفق غيم رجاهو .. لكن الأيام كركي
في خلا حالنا اليمحن .. ويملأ بالسهد الوسائد
إنتي غيمة .. شديرة .. خيمة .. إنتي جاهنا ..
والتقا الطلقت وشينا .. فرقت غمة جباهنا
فرجت في الحارة ضيقنا
فرحت شفع فريقنا
والمواعيد الحزينة .. وإتجاهنا
يا النغيم البقّ فينا .. وشدّ لي وتر إنتباهنا
يا تباشير يا بشارة
إنتي يا ضرعاً تكرمش .. شان يرضعني الجسارة
إنتي في منفاي رفيقة .. وفي حشا الأشواق حرارة
يا هدى الناس الحيارى
يا ندى الفجر اليبلل صور عوينات الفقارى
جاي ليك .. آه جاي ليك .. يا نورة آفة
آفة للسوس الجا ينقر .. عود عشيماً داخرو فيك
وأصلي لمن أدور أجيك .. لا بتعجزني المسافة
لا بقيف بيناتنا عارض .. لا الظروف تمسك في إيدي
ولا من الأيام مخافة
يا نفس فجر القصائد .. ما ضهب في بعدي عنك
واصلي متغرب عشانك .. راضي بالبيجيني منك
ما بكيت شح الليالي
لا شكيت نُح .. شلتو حالي
رغم إنو الحال بيفسخ .. إلا كُت في الحارة بنده
يا وطن عز الشدائد.


ـ تمت ـ

ناصرعبدالله
05-18-2010, 11:59 AM
بــــــــراءة




براءة السبحة والمصلاية والإبريق
ضرا القبلتان .. الصنة والقرآن
صحائفنا السماوية .. مواريثنا .. جوامعنا .. وكنائسنا
فقر شيخنا .. ونقود السيد المطران
براءة الكدح الصالحين .. من الفقرا الصح الزينين
جميع النفس ما عابت .. ولا خابت .. بإسم الدين
ولا إتغابت عن الجيران .. ولا خانت بيوت الطين
على الرسل الكرام الحب .. على الواقعين وراهن رب
عليهن حب من الرحمن
على سدرةً ضريحا يكب
سحاب الرحمة والغفران
آهة جديرة بالتمجيد .. وبي نعمة جنان رضوان
ولكن يابا يا سودان .. نحرقو حريق .. عدو الإنسان
في أي مكان .. في أي زمان
في أي قناع تستر جا
بأي طريق .. وتوب فستان
تحت يات صورة ما فرقت .. ولو كانت هي الأديان
شوارع بقتك مرقت .. عدو الإنسان .. عدو الرحمن
فلا ترحم ذمم حرقت تياب الواحد الديان
وللإنسان أخد تارك من السود وشي دارك .. شوا الأوطان
فمن شارك .. ومن بارك .. هما سيان
هنا الشرعية كيلتنا .. عدوك ما خرب الميزان
عرفناك للدموم حقان .. ولكن دمنا الترع .. يروح ساكت .. يروح مجان؟
ده ما ممكن ولا بيكون ولا إنكان
إذا سألونا عن كرري .. جسارة الماظ .. بسالات أربعة وعشرين
عن القرشي وصحابو العزل الطيبين
عن الدرديري والأنصار
عن أم درمان شمال وجنوب
رفاقة هاشم الحبوب
شفيع الأمة .. عن جوزيف .. عن المحجوب
دماء ماريل .. مشاعر جملة الشهداء .. المشو الجايين مدى الأزمان
إذا نشدونا عن من نفذوا التاريخ بريح الدم
عن القيلي .. وعن عثمان
عن الكدرو .. عن الكرار .. رفاقتو الجم
عن الفضل السوادو كتم
سواعدو ( ) صنم
( ) يا تم
عذاب السم
عمن صان كتالو على ( ) وقالا بغم
بإطمئنان نقبل وين من أنفسنا ونقع شقيش من الأوطان
وشن حا نقول لأطفالنا .. ونساءنا وجملة الحبان
يا مارق الدم من الموية .. يا فارق اليافطة من دلقان
أخد تارك .. تعلم من قساوة الدنيا وإنضامن من الغربان
هنا الشرعية كيلتنا .. عدوك ما خرب الميزان
عدوك يا سيدي يا سودان
جميع الحملوهو أمانة .. قام خرم الأمانة وخان
فسخنا .. شيحك في الشمس .. نام إتباهى بالعمران
نفوساً شان تشوف الدم يقطر من حشا الشريان
تنتف بالسنون عصفور .. تشق العامرة بين إخوان
وإيداً تنفحك بالقمحة .. شان ما تنقح الوديان
عدوك الأجرة ما كفت .. عدوك السخرة والسدان
جلداً مردغك في الجهل .. في المرض البطالة عشان
يقري جناهو .. يصح معناهو .. يخارج العندو .. ينقدل .. تباري مدان
يشغلك إنت بالفارغة .. ويطول تريان
وياخد من ثراك الخير .. حصادك سوس من التمرة
ومن الأقطان نصيبك في الورق ما بتقرا
بيقرأ الأرزقي التلفان
يا مقري البيقرأ عليك .. وحقك في القماش أكفان
يا حايم دواء ويكفيك .. وكلُ من عليها فان
عدوك واضح وضوح البروة والنار الدم القيزان
عدوك وماهو خابي عليك .. عدوك فاشية الجرذان
وهنا الشرعية كيلتنا .. عدوك ما خرب الميزان
وزولك فتشو بتلقا .. ما بين السجن والسجان
ما بين الرفد والتجريد .. ما بين الهبة والعطيان
محنتب بي غضب وإيمان
بنصر الشارع الطالع .. وشعبو وديشو في الميدان
يصبح ظلمة الواقع .. يفتح للترى العميان
فيا فاشية الكيزان ..
هنا الشرعية كيلتنا .. وفي كيل أصدق من الميزان
هو الإنسان
مقدم بي هدى الماضي العظيم الشان
مجرتق بي وفاء الحاضر .. محصن بي ضرا الإنكان
مضرضر بي دم الشهداء ورضا الحبان
محمد بي صفاح باكر على زولة اسمها (السودان).

ـ تمت ـ

ناصرعبدالله
05-18-2010, 12:02 PM
بيروتْ رِبَاةْ بارُودْ

(1)
حبّت تمُوت
بيروت !
..
تحرَق ..
حراق الصوت !
..
تغرَق ..
غراق الحوت !
..
زي طائر
الفينيق
المامناسبَ الموت !!
على كيفه
حرّة تموت !؟
..
أصلاً رباةْ بارود
من دون
بَرُود
وحَنُوط
زيْ لَمْبَة الحانًوت
مِتْعَوِداهُو ..
الموتْ !!؟
..
شان آخِر العنقود !
والأُولَى
في البنُّوت !
دون المُدُن
بيروت
الموت مَدَلِّعه
مُوت !!
مدِّيلَه سبعة
حيوت !
يوما التموتْ ..
هُو يموت !!
..
يا بِتْ
عليكي سلام
جيّاش وما مشروط
أحلامنا
تبقى أحلام
وبأوهامه
تمشي زلوط !!
..
مافي الوتر
ده كلام
فارغ ..
ملانا سكوت
عبَّ المطر
نسّام
راس الشدر منكوت
..
تلقاني أنا الإنسان
بتشهَّى دايماً
يُوتْ
جيَّة زمن حنّان
وماليْ نفِسْ
في الموتْ !!
..
سارجَ الهواء
المجَّان
على كيفي
وين ما أفوت ؟!
..
بالفيِّي من وجدان
جاسر
على الجبروت
قادر
على الطغيان
والطاغية
والطاغُوت ؟
..
كم مَرَّة
يا لبنان !!
تابوت
وراء تابوت !؟
ومنُّو .. وجديد ..
غليان !!
تنزِل من الملكوت ؟
..
يا أرْضة
نحنا حجار
جرَّبنا كم مارُوت
يلقانا ..
ما يحتار
ذات الغلَب هاروت ؟؟!
...
هدِّمنا ..
يا طيّار
ما تخلِّي فوقنا
بيوت
عَدِِّمنا ..
نفّاخ نار ,,
أطفالنا سُوطُن
سُوطْ
تلقى الدفنتُو
بِِذار
تِحْتَ الدم
المحتُوتْ
..
أوَّل تجي
الأمطار
من حلْمنا
المبعُوت
حالاًّ تضجْ
الدار
والطير يغالِطْ
صوت
أطفالَه
والأزهار
قاشرة
وتلوِّح يُوتْ
..
الإيد دوَم
في الإيد
والاِبتسامة تفُوت
يوماتي
عربون عيد
بالأمنيات مغمُوت !
..
من تاني يا حقَّار
بالله
قَبْلِ تفوت
دفِّق عجاج النار
صُبْ ما تَصُبْ
من موت
وما فيكَا من جبروت
دُوس الحشا
بالبُوت ؟!
..
بسْ كلّو كلُّو
يفوت
ومِنْ معصَمْ البنُّوت
تمرُق
كما الياقوت
منُّو .. وجديد
بيروت !!
..
هادي الفضا
المحروت
بالطائرات
الموت
يمْلِنُّو بالزغروت
برق المطر
هطْ سوط !
..
..
الليلة لِيل
والليل
غير الزمان
وقِبيل .؟!
ديل الأبَتْ
ما تشيل ..
غِيرُن ..
ضهُور الخيل !؟
..
حُرّاس ..
وكيف فرّاس
يتحدُّوا ...
مُرَّ الويل ؟
رأساً ..
مارون الراس
قدماً ...
لِبِنْتِ جبيل ؟!
..
..
*ولدي ..
الدرب دا طويل
دايْرَ النَفَسْ
بالحيل
..
خبِّر جمال الشيل
من خطْوَة ..
يبدَا الميل
..
قصَبَةْ مدالقَ السيل
قطعاً ..
خدارَه تقيل
,,
راس الجبل
مُو نخيل
وين ريحُو مال
هُو يميل
..
فُوت اليجيك
في فتيل
للبين رياضو أصيل
..
فَزَعْ الأخيْ
مُو دخيل
والماطراكَ .. بخيل !!
..
سِحْرَ العيون ..الريل
وين ,,؟
يوم دماها تسيل ..؟
..
دمعاً قبيلة
هميل
ما جففُو المنديل !؟
..
خل الوراكْ
لله
وابْرَى الدرِبْ
دا عديل
يا جِِبْتَ حَدْ
للآه
يا رُحْ فداكَ
كتيل


يتبع ...

ناصرعبدالله
05-18-2010, 12:04 PM
(2)

...
- شكراً ..
يا ابويا جزيل
شكراً ..
لإسرائيل !!
وأمريكا أمَّ الويل ؟!
...
ظنَّت –تعالى-
الله..
سوّاها عزرائيل !!
لابُدْ تشيلْ الآهـ
وما طفَّفت من كيل !
...
شكراً ..
لكلِّ عميل !
مِنَّ الفرات
للنيل ؟؟!
..
ديل علَّمُوني
أشيلْ
حِمْلي المخيف
وتقيل
وحداني
فوق كتفيْ
دامْ كتْفَ أخيِّي
شلِيل !!
..
عُذراً ..
كتير لبنان
صبْراً
على التنكيل
..
فِعْلاً
هي الأحزان
تمِن إنِّك
أبقى جميل !؟
..
سيِّد ديموقراطي
قِدّامي دُغْرِي
عدِيل
حاضِر على الآتي
والماضي أصْلُو أصيلْ
..
يا أروع الأوطان
يا مَن
تكيل العين
بهجة وجمال فتّان
"قانا"
أفْرَعِك من وين ..؟!
ولاَّ أفزعِك
بي مين ؟؟!
"يا صيدا"
والغزلان × فتنتك
× أتنين
..
لبنان ؟
سُمُو الفنّان
عُرْفُو ؟!
وتراثُو .؟. ودين ؟!
أنهار ..!؟
وطير ..؟! وجنان !؟
غلمانَه ؟!!
حُورَه العين !؟
ساحل .. ؟!
سهول .؟. وديان .؟
رملُو ..؟!
وجبالو .؟. وطين ؟
وما فوقو
من إنسان ..!!؟
..
بيساوي === جنديين !!؟؟
..
أم أنَّ هادي النار
هادي الدمار
الشين ؟؟
هادي الزفار
الحارْ
مِن أجلِ جِنذيين !! ؟
..
يا خُبْثِ ذاك الفأر
جاب التراب
مِنْ وين ؟!
كُل الشَبْ المدرارْ
ما رَوَّقك ...
يا طينْ ؟!
..
لا أشْتُمْ العربان
والواقِفِين
بِينْ ..بِينْ !!؟
..
فليمْدَحه الخُذلانْ
وعار الفِرَج
لا وين !؟
..
عالَم بيتفرّج
على دم يلُكْ العين
وآخر بيتحرّج ..
الله ..
ده عالَم وين ؟؟!
.
$ جيش مصْرْ
يحمي مصْرْ !!؟
علَى مصْر لا تثرِيب
بسْ عَن وطن
في الأسْر
- يا حُزْني ..
يعني غريب ..؟
أم يعني
مَنْ في القصْرْ
مَا يحمي تلاّبيب ؟!
..
شرفانْ فتَح دكّان
العين على
الفي الجيب ؟!
ما ليهُو بالأوطان
غير كم تُرابَه
يجيب !؟
..
مِنْتلِّحْ الأديانْ
بالعيب
تغطِّي العِيبْ
غطْ عوْرة السلطان
تكْشِفْلُو
ما في الغيب !!؟؟
..
من نار
دخانَه ... لسان
غضَب النبي
الغلِّيب !
..
$ درب السلامة
قريب !
..
* درب السلامة
نسيب
فاضي الكلام
ما يجيب
بهماً
جَرابًو الضِيب
..
ضيباً ..
في واشنطون
وآخر
في تلابيب
تالتْ تِحِت قانون
قانون دمار ..
تخريب
روعة نظام الكون
يرْتَع وسطنا
قريب !؟
..
دايرين حياتنا
تكون
حُرْقة ونواح
ونحيب
..
لكن ..
وربَّ الكون
هادي الضلامة
تخيب
الروح فُراقَه
يهون
شانْ عزّتك يا حبيب
..
يا دُخْري تربَى
بدون
خبزِ الغريب
وحليب
الأرزقي المأفون
بأعشابه
"شَبْعَا" نطيب ,,.؟


يتبع ....

ناصرعبدالله
05-18-2010, 12:05 PM
(3)

..
دا وطن ..
وأنا المفتون
بي أهْلُو ..
سهْلُو ,, خصيب
أمسِك عليكْ
العُون
أنا هُون
طَلعبي ... نصيب ؟
..
بين المعزَّة مصُون
يا بوي
في أحَنَّ قِلِيب
..
من لحْمَنا
المحرُوق
..
من دمَّنا
المدلوق
..
من رِحْمَنا ..
المسروق
..
مِنْ حِلْمَنا ..
المشنوقْ
..
مِنْ قلْبَنا
المطفوق
بي حبّنا
المذنوق
لي شعْبنا
المدقوق
بيناتُو كَمْ خاذوق
..
من جوْفَنا ,,
المشْرُوق
,,
منْ صفَّنا ,,
المشقوق
..
شدَر الوطَنْ ..
مَخَلُوق
دايماً ..
يطُول لا فُوق
..
ويا فُوق ..
رعُود وبروقْ
أنْزِل ..
مطَر ..
ما يرُوق
إلاّ ان يرُوق
الشوق
بأنبَل
وأعزَّ شروق
..
وتطْلَع فجُر
لبنان
مِن عضمك
المسلوق
..
المجْدِ للإنسان
والكون
دا ما مطلوق
؟..؟
لبنانْ
يظَل لبنان
رُغْمَ القَهَر ْ
..
يا ..
عِلـــوق ؟؟
...
الدمْ
سُقا الأوطان
وللقادمين مارُوق.


ـ تمت ـ

ناصرعبدالله
05-18-2010, 12:13 PM
بين الموجة والخزان

سنّى على النضال إيدى

سوّكى بى الهتاف .. فمّى

شوارعك لى .. دويها .. على

إذا ما آخر العلاج الكى ...

مراويدك حُمر يا أمْى

**********

هردت لهاتى بى الغنوات

وقتْ يبرد حشاك .. يا أمّى

من التعب البلا صالح ...

تفيقى .. تروقى .. تنجمّى

تسوّى مكانسك المطرة

تضوى البيت وتنجمّى

تمرقى صبوحة لى الجيران

قدح فوق إيد ... (وفْيد) ألمى

**********

يلاقوك شفّع الكتـّاب

نضاف وظراف بلا النسمى

يغنولك غناوى السـاب

وفى بيوضة مافى سراب

جبال كجمى وفيافى الكاب

تميد بى الخضرة ...منقسمى

فيافى الصّى وبيوضة ..

البراسيم فيها مفروضة

خدارا يرارى شوف عينى

على الأبواب .. طواريها وحواريها

بقت روضة

بقت تشرب من الحامداب ..

تشوفى رهاب ... بُعُد نجمى

.. بشوفو قريب قُرُب نضمى

بشوف العالم التحتانى هيلاهوب وقف ناهض

وهدّ عمايد الفوقانى ..

جوّة الجُب رمى العارض

وفى الساقوا الدمار أفراد

عريق الحب نبض قابض

متل قبض الحروف فى إسمى

وغناوينا القبيل .. رقراق

علينا تصب برد .. قارض

وأجر نمّى ...

أدوبى لهاتى بى الغنوات ..

عُقُب يبرد حشاك .. يا أمّى

....

وطنى ولا ملى بطنى

سكاتى ولا الكلام النّى

بليلتى ولا ضبايح طى

قليلتى ولا كُتُرْ سمّى

سلام يا أمّى

سلام لا هكمى .. لا دكْمى.
ـ تمت ـ

ناصرعبدالله
05-18-2010, 12:14 PM
مناقيش العدالة
منِّي متعشِّمْ طلوعِكْ ..

كُلِّي مستنيك تعودي ..

ويغسل السّاحات رجوعِكْ

في حشى أحراش الليالي

منتظر بقّة شموعِكْ

تشتلي الضّو في الضّهابة ..

ترخي للجايعين ضروعِكْ

يرجع الطير المهاجِرْ ..

يملأ في الفجّاج ربوعِكْ

.......................

في كلام النّاس بفتِّشْ ..

بين عوينات المدارِسْ

في صدى آذان المساجد ..

ورنّة أجراس الكنائِسْ

في إندهاشات العذارى ..

في إرتعاشات الموامِسْ

في بحر فرحان يبشِّرْ ..

موجو لي جية النوارِسْ

الرّوَاويس طَمْبروك ..

وهزّ بيك في الدّارة فارِسْ

.........................

بين سُكَات القرية أفتِّشْ ..

بين هضاريب المدائنْ

يا نسيماتاً تَكَرْبِتْ ..

شايلة أشواق الجنائنْ

لي جديول حلقو ناشِفْ ..

أو عَرَق تُربال يكادِنْ

في وشي الأفراح بفتِّشْ ..

بين قفا اللّحظات أعاينْ

بين سواقير الفقارى ..

الجاية من تالا المدافِنْ







مَرّة طال اللّيل عليّ ..

ووصلت الآهات مداها

قلت لي النجمات مو جايي ؟؟؟ ..

قالت الأيام تراها

يا ضيا القمرا القُبَالي ..

شوكة الظُّلْم الخيالي

عَسّمَتْ فوقنا اللّيالي ..

خُبِّي في إسراعِكْ تعالي



يا مناقيش العدالة

بتنا فوق الصّبر عالة

يا تعاويذنا وعَزَانا ..

خلِّي نور الفرحة يطفُرْ

من عوينات الحزانى

صخرة الأحزان تقيلة ..

واحنا ما بنملِكْ سِوانَا

قولي هيلا هوب معانا ..

من على الشّارع نشيلا

سكّة العمر الطويلة ..

ترتى في الجايين ورانا

صرنا زي رحّالة عنِّكْ ..

فَتّش الكون تبني لبني

وراح سأل طيانة تبني ..

وقالوا جاية

بالعوينات البقومن بدري شايلات القراية

في تلوت الليل تبوِّغْ .. سارقة للدّنيا السّقاية

ولما تورَدْ ..

بنسلينا ..

الجَرْدِقَة ..

القَرَضْ ..

المحاية

جاية من ضهر المسافة ..

البين بناء الطِّين والسّرايا

طالما في الدنيا ناساً ..

فاتو للجايين فداية

وناس على جلاّتا تكتب بالثبات ..

والنيل دواية

جاية .. جاية

دفّة التاريخ في إيدا ..

دَمْ عروق أماً بتنده

راجية نُص اللّيل وحيدا

بيّتَتْ في القُلّة مويتو ..

وزادو في المُعْلاق عصيدة

جاها في جواب يسلِّمْ ..

للبلد داني وبعيدا

يمة يا نفس الوصية ..

الكل ما شَرَقَتْ نعيدا

يانا يا شخب القضية ..

الصافي في قدح القصيدة

مانا قنعانين تملِّي ..

من دواية الصَبر نكتب فينا والإصرار يملِّي

تنعدِمْ موية وضونا ..

بيها نتيمم نصلِّي

الزّمَن ينقُض وضونا ..

تاني نتوضأ ونصلِّي

ونمشي فوق دربِكْ نباصِرْ ..

في الرِّمال والشّوك نحاصِرْ

بي شُعَاع بكرة المسافة ..

وسطوة اللّيل والعَسَاكِرْ ؟؟

تنهزِمْ ريح العوارِضْ ..

والمواريث التّعوقِكْ

ومن شَقَايا الحال تبقِّي ..

وتقدَحْ التّاريخ بروقِكْ

وكلّما مَرَقَت غبينة ..

تمشي لي داخل عروقِكْ.

ـ تمت ـ

ناصرعبدالله
05-18-2010, 12:17 PM
جرح غريب
*** ***
الجرح الشايلو دا مو الليلي
مين بدّل جرحو يا عشَّاق
أنا جرحي بقدرِ مواويلي
خايل في الزمن الفرَّاق
أغرق من بحرِ سواد ليلي
وأقدم من صادي الأشواق
أتقل من ريحاً حات شيلي
وقافل واطاتي بأطواق
*** *** ***
أصلاً جيت عابر للدنيا
والجرح الطيِّب صادفني
وزيْ إنِّي بعرفو ومن بدري
وزي الشايفني وعارفني
طوّالي إتعلق في صبري
صارحني بعمقِ وكاشفني
إتربَّى في صدري مع الغنية
والفتَ عليهو ووالفني
*** *** ***
كان جرحي حبيبي قُدر حالي
وفي مرّة مشينا على لمَّة
عند بابه إنكرم إستنّالي
بس فيكن عاشق يا أمة
لمّاهو عليهو وخلاّلي
جرحاً بس ضمُّة أبى ينضمَّه
فرّح شُمَّاتي وعزّالي
أكبر من صبري ومن ثمَّ
لا داير يدخل موَّالي
لا قادر يمرق من نمَّة
*** ***
ما قادر أحلِلُو يحلالي
أنا جرحي قديم ودا بي دمُّو
مين فيكن خلاَّ جرح غالي
وشال جرحي ملتَّق بي همُّو
ما طاقني جرحكن لا إنطاق
ورُّوني متينك تتلمُّوا
ونتريَّح جملة يا عشَّاق
وكل جرحاً يرجع لي أمُّو .

ـ تمت ـ

ناصرعبدالله
05-18-2010, 12:27 PM
الضو وجهجهة التساب

(1)

ودَّاها فوق قُوز الرماد
كان ظنُّو يوم يومين تلاتِة
المُوية تنزِل والبحرْ يشرد شُراد
يفضل تَرا .
يبراهُو بالسلُّوكة من ورا
والعِيوش والخير يعم يرقد رقاد
والناس تخُمْ خمّ السرور ، وماهُو البرا ..
ناساً كُتار فاكرين كدِي .
يومين تلاتِة ، الحالة ترجع حالَتَا
ويبنوا البيوت هُو وشفَّعوا وأم الوِلاد ..
ينجمَّعوا ، ويسترجعوا الماضي وشتاتات السواد في صالَتَا ..
شِيتاً ضحك .. شيتاً بِكِي
ويبقى الخراب دا رهاب رِهابْ
عِبرة وحكاوى بتنحكي ..
بلدك مِتلْ كمِّين بلادْ ..
بدت الدقون فيها الخَتَا
نجَّس تراها المُتْرَفين .. كِترتْ مواعين الفسادْ
وكان كلمة الإسلام غُتَا ...
جاتْ الَلَتْ الله وشالتا .
**********
كان ظنُّو يوم .. يومين .. تلاتِة ..
مشى السِبُوع والتاني جا
والمُوية كلما ليك تزيد ... ويقلْ رجا .
قوز الرمادْ الكان قِريْب .. فات بعيد بقى ماب تخُوجْ
قوز الرمادْ ... يا الضوْ فِضِلْ جزيرِة ضاربْ فيها مُوجْ
وحصار حصارْ كيف النَجَا
عاينْ البلد دي دمار دمار .. فيها إيش فِضِلْ ؟!
لعبة قصب فِ إيدين طفلْ !!!؟
الحِيطة وكتينا الـ
ـتـ
ـقـ
ـــع
تقع ألفِ وجعة على الضُلعْ ..
دخانه يمرق في السما .. آهاتو تنزف في الأرِضْ
بحر الصَبُرْ والاحتمال بيناتو ينقطَّع تُرعْ
لا يلقى يربُط لا يحِلْ .
لا حولة يا الكتب .. الكراريس .. المكَرِّنِة في الشتِلْ !؟
التَخْتَة .. أقلام الرصاص .. كنَب المدارسْ .. كُور يلُوجْ
باب الفَصِلْ كاسح بو موجْ
لا قوَّة يا ورق الجرائد .. يا المصاحف ؟؟
والصحيحات .. المَجَخْسنة في الذِبلْ ؟؟!!؟؟
ورافعين دواليبن بعيد .. طابلين خَوازِيقُن طَبِلْ !!
لا حولة .... حال ... ماب تِنْقَبِلْ ؟؟
يا مسلمين ؟؟.......؟؟
وين لي تَسابْ عشرة وتَسابْ كم وأربعينْ ؟
دا يمِين خرابْ كمِّين سنة .
يا الضوْ .. مِنُو الفي الكون يصدِّق كان هِنا
ليلة ذِكرْ .. حلقةْ مديح .. دارةْ غُنا ..
هيصة ورقيصْ .. القرمصيصْ .. سيرة عريسْ .. وحلاةْ عروسُو محَنْنَة ؟؟
يا الضوْ .. مِنُو الفي الكونْ يصدِّق ؟ كان هِنا
شُفَّعْ بيلعبوا جَمْ بَعَضْ .. دِيكْ لِفّتُنْ .. في الدِشِّي _ غَبْشِي _ مَشكَّنَة
واللاَّ الشَتِلْ خايِفْ لها .. فارِدْ ضَفايرُو وحاضِنَا .
فِيقْ ... لا تضيقْ
باتْ الفَرِيقْ بَهَجِي ومَتَمْسَحة بالمِي .. وين يا الضوْ نَقاقِير الهَنا
ووِيننْ مشاوِير الفرحْ .. غَزَلْ البناتْ .. الهُودَنَة ..
حَشْ البراسِيمْ العصُرْ .. الليلْ .. وَنَسْتُو .. الشيْطَنَة ؟؟؟
وعِندْ الفَجُرْ كمْ مِيضَنَة ؟!؟
وهَذَرْ التلاميذ _ الصباح _
بِي جَمْ رواكِيبْ الحَلَبْ ؟؟
يا الضوْ بِيُوت الناسْ حياتا مَبشْتَنة ؟؟
الحِلّة كلَّها في البحَرْ !
كَسَر البحرْ .. ؟؟ ..
ولاَّ انتَحَرْ قلبْ المياهْ ..؟ ..
واِنكبَّ قَبَلَكْ وحْدَكْ ؟؟؟.
ضاضاك فِ بلدكْ شرَّدَكْ
نَفَدتْ قوافلْ الأغنياء .. وجملك على الحصْحاصْ بَرَكْ ..
مرتاح حمامُن في البروجْ .. وإنت أب حماماً طاشْ يلُوجْ
لا سوَّى عشْ .. لا ركَّ .. رَكْ .
يا الدنيا .. كيف مِتْقلْبِنة ؟!
تصحَى العصافير الودِيعة ، مع الصباحْ مِتْخلْقِنَة !
وشرْ الكلابْ مِتْمسْكِنة ؟
وين نْرَّتا وهِوْهِيوَا وينْ الليلِة غابْ ؟
كلبْ الجَنائنْ زيُّو زيْ كُل الكلابْ
كلبْ الغلابَة المُسْتَغلِّينْ العَبِيدْ .. الليلِة سِيدْ .. سيِّدْ مُهابْ ..
كلبْ أبْ زَهانَة تَهِينُو هانة ، مِن المهانة تقولُّو تَكْ .
حُكْم اِنقلاباتْ التَسَابْ !؟!
دوَّارَة .. دنيا فَرنْدَقسْ
نِنْجارَى فيها سبقْ سبَقْ .. نخسرْ بعض في هِينْ ترابْ
نتلاوَى عند فتحْ اللَبَقْ .. فاكرين برانا أهل العقابْ
تارِي البحرْ .. عَوَّافِي .. عندُو معانا حَقْ ؟..؟
يا الدنيا .. زيْ سكْرَة وتَفِكْ مِنْ راسُو فَكْ .!.
بعضْ المسافاتْ اِتْلَغَتْ
الفارغِة طَنْبَجَا والملانِة اِتفرَّغَتْ ..
الدَنْدَهُوباتْ زيْ بعضَ ..شكل العِديدِى ورَصّها
نَفس العَنَاقْريب نَفْسَهَا
عَفَشَك دَة ، حَقْ غِيَرك تَشِك .. يَدَخل فى بَالك أَلفْ شَكْ
مَا الحَالة اصلاً مِن بَعض
حكم إنْقِلابات الَتَسَاب
الدِنْيا كُلَهَا حِلّتك
تَنْضُم مَعَ اَلَفِى آخْر الَبَلَد .. مِن غِيْر تَفُوتَا مِحِلّتك
تَحْكِيْلُو قِصَة تَقِصّها
إِنْ نَفَسُو فِيْهَا تَحِسّها
إِنْ مَاها فِيْهَا تَحِسّها
حَتَى الأحَاسيِس نَفَسَهَا
مَا الَحَالَة كُلَهَا مِنْ بَعَضَ
إِلا الَمَسَاخِيْت الَدِقُون ... خَتَوُهَا بين أَهَلَك قَرَضَ
بالَدِيِن وبالَطِين بالَنَسَب ... بالَمَيكْرَفُونَات بالَخُطَبَ
بالَبَنْطَلُونَات بالَرُتَبْ
فرِّق تَسُد
تَاخُدْ قَنَادِيلَك تَفُوت .. وإنْكَتَلُو فِى حِزْمَة قَصَب
ويَوْم التّصُد تَلَقَى الَبِيُوت فِى أزْيَارَهَا بَانِى الَعَنْكَبُوت
والَحِزْمِة شَاَهَد فِى التُّرَب
حَرَسَك يِظَمْبِر مِنَهَا
وفَرَسَك يكُد .. لا اسَيَادَهَا تَسَأل عَنَها .. ولا زُوْل يَرُد


يتبع ....

ناصرعبدالله
05-18-2010, 12:28 PM
(2)

أرْخِيلِى اضَانِكَ يا بَلَدَ
مَرّة اسَمَعِينِى مِن الَبَعِيد وإنْطَارَشِينِى وللابد
فِى حَبْلى مَاتَت شَتَلتِى .. مَاْت بيْتى مَاْتَت حِلّتِى
لَكِنِى يُوم مَاَت إِتْولَدْ جُوَاَى الفَ إنْساَن جَدِيْد
وانَا ذَاِتِى مِن ذَاتِى إِتْوَلدْ
وَرَتْنِى مَلَتَى مِلّتى
والمُوْية بَدَلت الوجُوه
يا بَادِى مِن بيتَكَ تَتُوه
تَضهَب ضِهِب
لَوْ بَاَبُو مَافى أو العَتَبَ
تَحَسِبْلو مِن قَوْز الرَمَاد
أو بِيْت أمِيْر المُؤمنِين الِلِسة حِيطُو تَسِوى رَبْ رَبْ در.. دَرَبْ
والَدنْدَهُوب إنْدَكّ دَكْ
هَرَسْ القَزازْ .. المُوية جازْ .. والجازْ وَدَكْ
بِينُو الدقِيقْ إتْلكَّ لكْ
ضِلَفْ الدَواليب الكُبارْ .. عائماتْ خَشَبْ
المُكْحَلِة .. الكُشتينة .. مِيزانْ الدهبْ !!
ضُوقْ الغضَبْ .
ضُوقْ المَذلَّة الدُسْتَبا الناس العُزازْ
سِيدك دخرنالُو المطرْ .. أمَّا إنت يكفيك الرزازْ
خدرّتَ تاني يجي الجَرادْ ..
أقوى الحقيقة من المجازْ ..
وهِنا المحكْ .؟.
يا أرزقي .. يا نسلِ حمّالةْ الحطبْ
يا مستفيدْ مِن بذَّةْ أطفالْ السوادْ الما نزلْ فوقُن ملكْ
بالسُكرْ .. العيشْ .. السمادْ ؟؟؟؟!
المُويَة أوْلى من العبادْ ؟
في ياتْ كتاب دين ياتْ حديثْ .. يا فاجِر الله بيسألكْ ؟
يا حَسرةْ الإتغشَّى فيك ... كَبَّر وراكْ ... جاهد جهادْ ...لامن هلكْ
يا حَسْرةْ الصدَّق صلاتكْ .. وموعظاتكْ في الفسادْ .. بان الشَرَكْ .
أيْواتَ ليك ..
أيْوَة ... أيْوَة .. يا بحرْ التسابْ ما أعدلكْ .
شُكراً جزيلاً يا بحرْ .. رغم الكَساد
بحَّتْ لنا العَفَنْ المَكرِّنْ في الزمنْ من عهدِ عاد
والضوْ وليداً ما قرا
خرَّجتو منك باقتصاد ... قانون ... فلكْ
جَفَّ المِداد ..
ما أعدلكْ .
جَفَّ المداد ما أعدلكْ
ما أعدلك ... ما أعدلكْ
بالسكَّر .. العيشْ ... السماد
المُوية أوْلَى من العباد ؟
يا شارعْ الثورة القصاد أهلي المسالمينْ البعادْ
يا بندقيتو ...هِنا المحكْ
وقَبَّل على القِبلة ونَدَهْ
قُبَّالْ يمد إيديه إنتَبَهْ !
حِسْ المطرْ .. بين الشدرْ .. والضوْ مع الفيها إنشَدَهْ
بَرَّة ..... المطرْ
في الدَنْدَهُوبْ برضُو المطرْ
خَتَّ البِرِشْ فوق راسُو ... لكِن المطر
أوْوْوْوْ .. والهوَا
وراسْ تمرة فوق عَقَشْ المسكينِة
الجَرِيدْ رمَى دَنْدَهُوبا .. العدِّة فاتتْ بالبحرْ
بِرِشْ الصلاة اللافْحُو الهوا .. وإبريقْ يثرثرْ بين كَررْ
يا الله سِتَّها في السفر
والضو ينط من دنْدَهُوبُو ... يجيبُو صاد صوت المطرْ
في إيدو كوز .. سبْحِة و كَكَرْ .
حَلَّةْ مُلاحْ .. كرَّاسْ غُنا .. إعلانْ قضية .. عِلمْ طلبْ
.. بروازْ قديمْ .. حاضن عَروسْ وعريسْ وسيم بين كمْ نفرْ
السِبْحة والكُوز .. مُو اللَتَا
تشبهْ أمير المؤمنين .. باكر يقولُوا سرقْتَها
فنـَ ــنـَـ ــنْْْْْْ ... يفِنَّها في البحرْ !؟
أقوَى البحرْ .. واللاَّ المطرْ ؟ أوّّوّّ والرياحْ
بتَصحِّي في الجو الجراحْ ... بِتَحِتْ من الجوفْ الفِكَرْ
إشْْْْ في الوعر ..
عِشْ قُمْرِي بي فرخِينُو كان من حظ وَرَرْ
يا رازِقْ الحيوانْ أخُو ...؟!؟
يا رازقْ الحيوانْ أخُو .. الينْجَا مِن كِيد البحرْ .. ما ينجَى مِن إيد المطرْ
والينْجَا من إيد المطرْ .. ما ينْجَى من كِيدْ الرياح ..
والينْجَا من كيدْ الرياح .. ما ينجَى من كيد الفِقَرْ ؟؟!!؟؟
يِي .. دا القدرْ .
ما أعتى حربك يا بشرْ .. إنت الغريبْ
والموج يشيل غادي ويجيبْ
ينكَرْبَشْ النيمة الدَبيب ... والضوْ مُو جايب لك خبرْ


يتبع ...

ناصرعبدالله
05-18-2010, 12:29 PM
(3)

طقْْ ..
دندهُوبْ ناس ستِ نُور .. عودُو إنكسرْ .. وفاااات بالبحرْ
تِحت السماوات ما في أرِضْ
في الموية .. في الريح .. في المطرْ
في الدَابِي .. في التمْر الخطرْ
وإنسان يصُبْ _ قبل السمِا _ عرَّاقِي والوشي والشَعرْ
غيَّرْ وقفتو .. الدندهوب زالَفْ هَبَرْ
يا غيمة ..هوي .. دا وكِتْ مطرْ ؟؟
واِرتجَّ جوف الجوْ رعدْ
يا الضوْْْ كفرْْ ...
يا الضوْْْ كفرْْ ...
من بعدما نفد الصبُر .. والإحتمال في الجوف دَشَرْ
صنََّّ المطرْ .
والجوْ صِفا .. بنْقَرْ حجرْ بتْ الرسول .. لكِن بعدما الضوْ كفرْ
ضربتْ شعاعات الشمش في دوشة فوق قوز الرماد ..
.. كلبةْ مدينِة نِعِيجَتَا .. ديكا العجوزْ .. وكدِيس عماد ..
.. طيرةْ بقرْ .. ودِحِيش غريبْ .
شوف الظروفْ ؟!
دحَشكْ .. حمارتَكْ .. والضيوف !
قلعنْ يَحَفْتِنْ في الرماد ؟؟
وبالسكَّرْ ؟؟ العيشْ ؟؟ السماد ؟؟
الموية أوْلَى من العباد ؟؟؟؟
وبالفِيتَرِيتِة العِيشْ حُكُمْ ... الموية أوْلَى من البُكُمْ ؟
ومَلَصْ العِرِيرِقي ولباسُو .. ومصَّرِنْ .. ما غيَّرِن
خمْخَمْ عقابْ الكسرِة .. واللابْرِي القديمْ ..
من دندهوبو المنْتَكِلْ النيمة .. شال باقي الأكلْ
خمََّّ الرياح .. خمََّّ المطرْ .. خمََّّ الجراحْ ..
خمََّّ الدَبِيبْ في القُفّة .. مو جايب خبرْ
قصَّالُو فرعين منقة .. بالمِنْجَل هبرْ
حشْحشْ صَبايْطاً هِن صُفُر .. لكِن قُلاد
البدري لسه على الحصاد
في أرواحْ على قوز الرماد
يا الضوْ بقالِنْ أعزَّ زاد ,,, ونجاضو زاد .
وإنكابَسَنْ فوق وجبةْ الزمن الغريبْ ، كلبةْ مدينِة ... كديس عماد ..
يا الضوْْ دبيــــــــــــــــــــــب .؟.
وطيرةْ البقرْ .. في الجوْ تغيبْ ..
دلَّتْ من الكازُومْ
د
بـ
ـيـ
ـب
والضوْ يَصنْقِع والوررْ
يا رازِقْ الحيوان أخو
نختا ... وتصيــــــــب .
نتحدَّى كيدك .. يا بحرْ
نتحدَّى إيدك .. يا مطرْ
يا آفة .. يا ريح .. يا فِقَرْ
نتحدَّى بالصبرْ الجميلْ ... بأعمالنا ... بي طيرةْ البقرْ
وطيرةْ البقرْ ، في الجوْ تغيبْ
دلَّتْ من الكازومْ دبيـــــــــــــــــــــــــــــــــــــــــب .
وإنكاتلنْ في آخر التمُرْ
كلبةْ مدينِة ...نعيجّتا .. ديكا العجوز .. وكديس عماد .. حمارتو .. والدحشْ الغريب
ودِحِيشو فوق الرمادْ .
عَكْمْنا فينا من الغلِي ، وعِيشةْ الجلاجلْ والشتاتْ ؟..
وبالسكَّرْ .. العيش .. السمادْ
الموية أوْلَى من العباد ؟؟؟
وبالفِتَرِيتِي .. العيشْ .. حُكُمْ
الموية .. أوْلَى من البُكُم ؟؟؟؟؟
ولمَّـَّــَّــس دِحِيشُو ..
الضوْ بكى .
بكى ما بكى ؛؛؛
بكاّهو حِسْ الطائراتْ
بكَّاهُو قُدْرَتُو تنتهي ؛؛؛
بكَّاهُو يرجى المعجزات !!؟
بكَّاهُو قُولةْ الموية أخفَّ .. وأقلَّ من كمْ وأربعين
بكَّاهُو كضَّبْ حاســـَتُو .. وصدَّقْ أمير المؤمنينْ
بكَّاهُو ما رَمَى للكُرِيق ، زاغْ في أوائلْ النازحـينْ
مع إنُّو أدْنَى الناس شِتُول ، وأخفَّ سُكْنَة ، وأقلَّ طينْ
وإنضرَّ أكترْ منَّهُمْ .. لكِنُو .. ما ندمان .. يَمِينْ
بِيتُـــو اليَرُوحْ ..
عَفَشُو اليَرُوحْ ..
غنَمُو التَرُوحْ ..
ما طالَ عايِشْ .. وفِيهُو رُوحْ .. وأمُّونَة نفَدتْ بالعَوِينْ .
في اللُجَّة يفْضَل كالسَفِينْ .. أكْرمْ لُو من جرحْ النزوحْ .
ولمَّـَّـس دِحِيشُو .. الضوْ بكَى
بكَى ما بكَى
بكَّاهُو يرْجعْ لِي ورا
بكَّاهُو رادِي الدنْدَهُوبْ الغادِي
وأم دُرمان تغنِّي .. حبيبتي آه .. وودادي وين .. وحَبيبي وُوبْ !
والباقي كلُّو مقابلاتْ ..
ضِدْ القوانينْ البدِيلَة = مع القوانين البديلة
اليَسْوَى ما يسْوَى الرَزِيلة
جهنمْ .. الجنَّة .. الفَضِيلة
؟؟ .. ؟؟ .. .. ؟؟
ولا خَتَرْ في بالُنْ الحالْ الكَدَرْ
لا علَّمُنْ سِيلْ الجبالْ الشَاتْ مواريث القَبيلة مع الحجرْ
لا حِكمةْ البحرْ الكَسَرْ
ما ليهُو مُسْلِمْ لا الكَفَرْ
هَبَدْ الجوامع من طَرَفْ .. غَمَرْ الكنيسة مع الغَمرْ
ما علَّمُن
ما علَّمُنْ
والألَّمكْ . ما ألَّمُنْ
ما ألَّمُنْ .. ما ألَّمن
ضِدْ القَوانين الهَزيلة مع القوانين العديلة ، الماب تَمرْمِطْ للبِلاد .. اللابْ تَصنِّفْ للبشرْ .
والضوْ زَفَرْ
استغفر .. إنشهدْ .. تَلا
في سِرُّو سُورة الزلزلة ... دُونْ بِسْمِلة .
قاوم عَنَا .. نفَّضْ عِرِيرِقِي .. ودقرْ طاقيْتُو لي ورا .. وإنحنى
شدََّّ الحَبِلْ .. بالطُوفْ دَنَا
جَمْ تمْرَة مِن دُون التَمُرْ .. ماب تنْطَلِعْ .. طالت كُدُرْ .. يقَّن عفاها وسبَّله
سابْ الحِديَّات تَسكِنا
بمْبُونَة مِن كمْ وأربعين .. وحِّيدا ما خَلفتْ جَنَا
مِن جابا جدُّو من المَحَسْ .. من هي الصغيرِة محانِنَا
يسقيها بالجُوزْ ما فَترْ .. قَدْر اليَرَجِيها المطرْ .. والليلِة حظَّها طُوفَنا .
شرَّقْ .. بحرْ
غرَّبْ .. بحر
شـمَّل .. بحرْ
جنَّبْ .. بحر
د
نـ
ـقـ
ـرْ .. بـ حـ ـرْ
صنْقَعْ .. بـ ـكـ ـى .
بكَى ما بكَى
بكُّاهُو حِسْ الطائراتْ
بكَّاهُو قُدْرَتُو تنتهِي
يكَّاهُو يرْجَى المعجزاتْ
؟؟؟؟ .. ؟؟؟؟ .. !
وبآخِرْ نَفَسْ .. والحِيلْ كِمِلْ
بِي طُوفُو صدَّ الدنْدَهُوب .. بين الضَبابِينْ والنملْ
نامْ نُومةْ الدِيكْ في الحَبِلْ ....
صحَّاهُو آذان العَصُرْ .. يا الضوْ مَفوِّت كمْ وَكِتْ ؟
نـ ـقْـ ـنَـ ـقْ بَراهُو تِحِتْ تِحِتْ
رقْـ ـرقْ دموعُو بِقَتْ تَحِتْ
صلاَّيْ من القرآن غُنا
صلْ يا حمام قِدَّامي .. أنا .. غرقان لِي فِ أنجاسْ لِي هِنا
ما شال جداولنا البحر
شال مُسْتَراحاتنا وهَبَرْ
طفَّحْ زَفارات كم سنة
مِرحاتنا والكُوشْ القُدامْ ماصِن وَكِتْ ماصَ الهَنا


يتبع ...

ناصرعبدالله
05-18-2010, 12:30 PM
(4)

بـ إيه إغتسِلْ ؟
وإتوضأ بـ إيه ؟
غير الصَبُرْ ... يا ... ربَّنا ؟
بكّاهُو .. خَلَّ البال نَبلْ
قُولة .. عقابَكْ في الجبل ، من زيْ دِي بشْرَبْ يا جَنا ؟
هُونَق دِحِيشُو .. الضوْ بكى
بكى ما بكى
بكَّاهُو رادِي الدندهُوب الغادِي
وأم درمان تَنُونِي .. حبيبتي آه .. وودادي وين .. وحبيبي وُوب
والباقي كلُّو مقابلات ..
والنشرة .. مافي .. ولا خبرْ عن بلدُو .. عن شِدَّة عَناهو .. عن البحر
عن سر نَفي
ودِي الوكْتِ لندن ماب تبين ..
حالاً دَحِين .. زيْ حالُو .. فِي .
يا الضوْ
قَبُلْ غِيبةْ الشمشْ
قَبْل القَعُو .. قبْل البعوض .. قبْل الدَعَتْ
والمُويَة كُل ما لِيك تَزِيد .... والزَاد نَفَدَ
قَبْل الحِصـــار .. يا زُول أخير تَخَتَا البَلَدْ .
يا زُول قُعادكْ شِنْ يفِيدْ ؟?
شِنْ حارسُو شِنْ خائف عَلِيه ؟?
أكترْ من الطين الوقع في الطين شهيد ??؟
صُور التَمُرْ .. يا الضوْ .. أمِشْ
عِينْ الشَمِشْ .. يا الضوْ .. أمش
البُرْتُكان والمنْقَة والنِيمْ .. تِنْطَقِشْ .. يا الضوْ أمِشْ
الدنْدهُوبْ .. يا الضوْ .. أمِشْ
حَدَرن لُو من قوز الرماد .. رَمَن الرِمشْ .. قالن لُو أمش
قبْل الحصار .. يا الضوْ أمِشْ
نَبْيَ الله نُوح .. قال لكْ تَمِشْ
من ضو ترُوح .. يا الضوْ أمِشْ
يا زُول قٌعادكْ شِن بفِيد
شن حارسُو شِن خايف عليهْ ??
دكَّانك الغايةْ العَرِشْ !
دولابك !
العَفَشْ الجديد !
الحافلة !
بيبان الحديد !
تاوَلِيتكْ ! البايرَكسِ !
إيه خايف عليهْ !!
أكتر من الطين الوقع في الطين شهيد ؟?؟
داك الفَرِشْ ..
والعدِّة في السحَّارَة .. خُتْ فُوقَا البِرشْ
ومن ضو أمِشْ .
عارفين قليبك طبعُو حار
وبيَهِمَّك الروح مو القِرِشْ .. لاكين أمشْ
في الفيها ما عندك خِيار .. غـــــير ما تَمِشْ
إنسان معمَّرْ بالحياة
ما ترْمِي نفْسكْ يا حِمِشْ للتهْلُكَة .. خلِّينا أمِشْ
شِنْ حارسُو ؟
شن خايف عليهْ ؟
أكتر من الطين الوقع في الطين شهيد !؟
وملَّـَّـَّـس دِحِيشُو ..
الضوْ بكى .
بكى ما بكى
بكَّاهُو حسْ الطائرات
بكَّاهُو قُدْرَتُو تنْتَهِي
بكَّاهُو يرجَى المعجزات
بكَّاهُو يقْنَع بالرحيل
بكَّاهُو ما كان الشُدَرْ .. ما الطير .. وما كان النخيل
بكَّاهُو كِيفِنْ سَدْ شِبِرْ من مُويا يصْبِحْ مستحيل
بكَّاهُو يَلْوَطْ في البحرْ .. والغِيرُو يشربُو سلسبيل
بكَّا البِينضُمْ في الغَلطْ .. يا قالُو مُلحِد يا عميل
بكَّاهُو .. آه ..
ما هُو .. الإله
؟؟ .. ؟؟ ..


يتبع ...

ناصرعبدالله
05-18-2010, 12:31 PM
(5)

يا دَكَّةْ السُلْطَة
ودُخانا .. وشمْلَتا
وفي شرْعَك الإنسان يموت
إن زادت الموية ويموت من قِلَّتا
لو سامحك في حقُّو .. سِيدي .. العُمدة ..
هُــوي
تبْ ماب تسامحك بِتْ أبوي في شتْلَتا .
يا مَسَمِّي مِحْنَتنا :-
إمتحــــان !
مرَّات قَدَرْ !
حِيناً غضبْ !
!! ؟؟ !!
ناكِرْ جِبِيهاتنا .. وصلاةً صلَّتا .
يوم يمْحَق الصاح الخطا
وين ؟ تمشي من غضب الغلابة اللا بَكتْ لكْ نازِلاتَا .. ولا شَكتْ لكْ عِلَّتَا
لمْلِمْ خُرافاتكْ علِيكْ .
ما حرَّقتنا ضَرِبةْ إيديك .. بسْ روحنا حَقَركْ سلَّتَا
وبِنَجِيبَه ضرْبتْنَا .. وتَصِيب .. في حَزَّتَا
وفي حَزَّتَك .. يا بيتنا كَبْ
ويا بيت أمير المؤمنين إنت اِتْنَـكبْ .
والضوْ شَطَبْ جِيهةْ اليمين ..
حجَّاً ........ إلى ان آمنين
وبي خط خَلاَوِيهُو المَكعْوَجْ والحَرِفْ واضِح تَخِين
بي دمْ .. و .. طِين
الضوْ كتب فوق باب أمير المؤمنين
(ما ضرَّ بيتَ أبي لهبْ لوظلَّ بينَ المسلمينْ
لوْ جاء فينا لِما ذهب يا مؤمنينَ بغير دِينْ)
ومَضَى اِسمُو بين قوسين "غضب"
والمويَة أوْوْوْوْ .. أو كاللظَى
رَمت الدهاليز والأوض .. بسْ فضَّل الباب .. العِظَة ؟.؟
,, و ,, . ,,
.. الضو ..
.. ضِـ
ـحِـ
ـكْ ..
ساعةْ واداعُو .. بِقَت طَرَبْ
غنَّـَّـى وضَرَبْ .. بي طُوقُو عند ساعةْ العِشِي
بانتْ نِوِيرَاتْ العربْ .. حَزْنَانِة غَبْشِة مَدَعَّشِي
حِسْ الصُبَارْ في المُويَة .. والقّعُو .. والمِعُوزْ
طَرَّاهُو للديك العَجُوزْ .
يا الضوْ يجُوزْ ينْجَى .. ويَجُوز
"" الصَبَرَة كَمِيرْ كُوْ كَوْ تِنْعشَّى عَشَاهَا مِنْ ضَوْ
الصَبَرَة حَرَامِيَّة وأشوْ فِ حبال خاذوقة إتْلوْلوْ
لا ترمي دموعك شوْشوْ
قــاوِمْ والمـُرَّة بِتِحْلوْ
ترف إستخباراتُن أوْ صَاجْ الْدَبَّابَة الْ كـَرَرَوْ
ضَنَبْ الطيَّارَة الْفِي الجوْ
الْ ترْمِي قنابل بوْ بوْ
كم يبني بلادك يا الضو أوْ يحمِي وِلادك يا .. لو
الينضُمْ طوَّالِي يسوْ ""
والضوْ بكَى .. فُورَنْ وَشِي
من شُوقُو .. واللاَّ من العذاب الفوقُو ..
ولاَّ من التَعَبْ غالبُو المشِي
وكلْ فرْدِة جَارَّهَا من بَلَدْ .
- : - يا الضوْْْ .. سلامتك .. جِئت مِتِينْ
سِبْتُوهَا وحَّدّا للبعُوضْ .. للطير .. ودبَّايْ البحرْ
نُونِي الضَبابِين .. الكلابْ .. الجِنْدبْ .. الفار .. السَعَرْ
.. للجِنْ .. يَلَبِّشَه .. للدَعَتْ .
يا الضوْ .. بلدنا .. وودَّعَت
راحتْ شتُول ، دُوب فدَّعت
فِطْسَت بيوت ، ما ضاقت الزِينْ والعَدِيل ما اتمتَّعت
ضاعت سعايات إنْسَعت
يا الضو تَليِّسُو بالقُفَاف ، آخر المطاف ، شمْلَةْ كِنِيشْ اِتوسَّعت
حِلْتنَا غِرْقَت ، ومن طَرَفْ
حلتنا غرقت ، وفي شِبِر !!؟
غَرَّقْنَا يا الضو صِح سَرَف ؟؟
العلمتنا العُوم .. تقُوم تَغرَق هِي .. ما تقْدَرْ تعُوم ؟!؟ يا للأسَف .
عزَّ المَصاب ..
البَرَكَة يا الضوْ في الرُقاب
إلاّ الرقاب إنُجهْجَتْ
ما جاتا راحةً من كُتُرْ ما انْجيْهَتْ ، ما دام معلَّقَة في التراب .
صَنَّت ..
شِويْتِين .. نَهْنَهَتْ
خايْفَاك يَهَقِلَكْ السرابْ .. يا الضوْ يَهَقِّلْنا السراب
واِنأوَّهَتْ .
والضوْ صنم ، ما جاب جواب
لا ذاتَه هِي اِسْتَنَّت جواب .


يتبع ...

ناصرعبدالله
05-18-2010, 12:32 PM
(6)

أمُّونَة وِينَا ؟؟ مع العَوِين في المدرسة
أمِّك مَنصَّحَة حالة زين ؟؟ في المدرسة
خالْتِي الزِلال ؟؟ في المدرسة
جِدِّك حسين ؟؟ في المدرسة
السُكْنَة كيف ؟؟ في المدرسة
العِيشِة كيف ؟؟
- تسْعَل سُعال .. يا الضوْ تقول تامْ لَكْ سَنِي
تسعل تقول .. ماك .. من هِني
شِنْ السؤالات ينفعُوا
ما حال غلابة علي غلابة إنْفَرْزَعُوا
فتَحُولُن الغُبُشْ .. القلوب .. قبْل البيوت
قَسَمُوا القِليْلِي معا بَعَضْ .. كم طمَّنُونا وشدَّعُوا
لكِن دَوام الحال محال ..
وعلى العموم .. ما مرَّ يوم .. ما جاب هموم
هَمَلِي ونِقاراً تسْمَعُوا .....
واحدين يقُولُوا لك خلاس .. واحدين مُصِرِّين يرْجَعُوا
وإن جئت بلدنا مُطَمِّنَة
بَسْ .. كيف .. يا أخَيِّي نأمِّنَه - قبل البحر - من ها الفِقَرْ
فِقَراً ضُعُفْنَا مَسَمِّنَا
ال في العروق دا مُو دمِّهُن ..
دمَّك .. يا أخيِّي ..
ودمِّي أنا .
الَنَار تَقِيْد فِى الَكَان سَبَب
يَا الَضّو بِيُوتَنَا يَوقِعُو
اللّه يَجَازِى الَكَان سَبَب .. يَا الَضّو بِيُوْتَنَا يَوَقِعُو
نَهَجِر بَلَدَنَا نَزِح هِنا
كان سُلْطَة ينْسلّط عَلِيها .. أكَّان لِجانَّا يلجِّنا .
وبِي تُوب وَكِت نَزَحَتْ حِرِقْ
قشَّتْ وَشِيها من الأسَى .. ومسَحتْ وَشِي الضو العِرِقْ ..
عَصَرَتْ علِي طَرَف الطَرِيق .. عَقَدَتْ سِفِنْجَتَه بي دِلِقْ
وكُلْ فَرْدِة كانت من بلد ، ويِنْشَافَنْ الإتْنِينْ خَضُرْ ..
اللِيل سُتُرْ ... الليل سُتُرْ .
سَرَحَتْ مع الخاطِر بَعِيد .. عَكْسَ العِرِقْ
شِيمْةَ التَهاوِيم شالَتَا
نِحْنَ وقَدَرْنا قَدُرْ قَدُرْ ..
نَصْبُرْ صَبُرْ
نصبر على البُوخْ الغَريبْ ..
نِسْتحْمَلْ أصوات القَعُو
لامِن نلاقي الهَمْبَرِيبْ ..
والليل غَناوِي نَوَلِّعُو
يا يُمَّة تَفْرَحِي من طَرَفْ .. عاد .. والمسافرين يرجعو
دَه كأنُّو لا دمع إنزَرَف .. لا خيوط قلوب إنقطَّعُوا
لا شتلة لا محْصُول تلَف ..لا ناس بيوتن وقَّعُوا
بحراُ بَلا الخازُوق زَحَف .. نبْنِيلُو قِيف ما يطلَعو
صُدْفَتْنا تبقى آخر الصُدَف .. نمْسِك زَمنَّا نَطوِّعوا
يخَتُونا يمشوا يَوَدِعُوا .. فِقَراً علينا إتْرَبْعُوا
ديل لاب يخافوا من الحساب .. لاب يختشوا ولاب يشبعوا
حقَّاً نحرسو ولاب يجِي .. حقك تلاوِي وتقْلَعو
أمْسِك شُباطين الصراع .. الماب تحصِّلُوا فلِّعُو
ثبِّت لي بالك لا يلين .. أنْقَحْ ترابك وازرعو
عُقْبان أبو الإنسان حنين .. ما شقَّ حَنَكاَ ضيَّعُو
سَرَحت مع الخاطر بعيد ..
عَكْسَ العِرق شِيمةَ التهاويم شالَتَا
دَقَشَتْ طَرَف قوز الرماد إنتَرْ تَعتْ ..
كادَن عيونا يَوِقِّعُوا
رجَفَتْ ..
صِحَت بي حالَتا
صدَّابَا تيَّار البحرْ .. كان أقوى من بالَه النّزَف
وكان فرحةْ الناس === الأسَفْ
الهمبريب === البوخ
غِــنِيوَاتَه === القعو
صنَّت بِنيْةً جَنْفِي هيل بِت السَرَفْ
جمْ كُوم وِلاداً يقْطَعُوا
فوق البحر .. فوق اللجان التاني جاتْ
فوق الفِرَج والبشْتَنَة
الحالة ما دارت بَحِت .. الحالة ظاهْرَة وبيِّنَة
السُلْطَة عن غرق البلاد مسئولة هِي ..
وفوق عِينَا حقَّنا تدْفَعُوا..
- وبلدك حِمايته مُمْكِنَة
_ أصْلُو اِحْنا لازمنا امتداد .. قُبَّال بيوتنا يوقِّعُوا
-كُنَّا بنقوله وتلْكِنَا ..
_ حيكومة دايْرَة تَلَجِنَا .. تدِّينا مشروع نزرعو .. تدِّينا جِيهةً نسْكِنَه
- لوْ وقْفُوا الحرب الحرام الْ الله ذاتُو هُو لاعِنَا
- كان البلاد إنطامَنَت .. كان ألْفِ خزَّان اِنبَنَى
_ يكْفِينا ذِلَّة ومسْكَنَة ,, كانت زمان السرقة دسْ .. الليلِة عِينك مُعْلَنة
_ وفِرجاً قِبيلْ بِنَشوفه عِيب .. عينك عِيان ومَقَنَنَة
- باسْمَ الرَصيف والمارصيف .. كم بيت وصالون اِنبَنَى
_ كانت شعاراتُن وعود صارت مُجرْد عَلْقَنَة
- وبين الدقون والدلْقَنَة .. كل التقول موساك تقوم تلقاهو ربَّ الفرْعَنَة ..
_ والجايِي أعتى من اللِي فات
- الجايِي أعتى من اللي فات
والضو تَنَى ..
عضَّ اصْبَعُو
عضَّابو حِسْ الطائرات
عضَّابُو قُدْرَتُو تنتهي .. عضابو يرجى المعجزات
عضابو صبْرُو وطول رَجَــــــا
.. وَيْْ .. أبونا جـا
.. ويْ .. يال القِمِيرا .. أبونا جَـا
وجرُوا كالفراشات شُفْعُو
جروا منُّو غادي وفلَّعُوا
أدُّوا البحر .. أدُّوا الحجار ..
ساعةَ الحَضانْقُول يجْدَعُوا .. برَّاقْ عيونُن يشْلَعُوا
تالا القميرا يصنْقِعُوا ...
يا الطالع الشجرة جيب ليْ معاك خِيمة
تســتُرْ من المطرة إن كبَّــت الغــــيمة
************
جيب لك معاك قمحات
قمحاتنا في الشيمة
وغنم الحَلِب رايحــــات
ضـلَّمْنــَا ضِـلِّيمة
************
- خيمة الشحودية دَفُو مــاب تَدَفِيكا
ولبن اليهـــودية بلــدك ينسّـــــِيكا
قمحاً من امريكا خاذوق رِكب فيكا
غير خير بواديكا مـافـــــي اليكفِّيكا
************
يا طــالع الشجـــــــرة من خيمتك التوبة
جيب لك فروع خضرا أو جافَّــــــة يادوبة
في الحرَّة في المطـــــــرة في عِزْ بَرِدْ طــــوبة
نمْرُق مـن الوَكَـــــــرة وتبْقالنا .. راكوبة
)))))))))))))))))
يا طالع الشـــجرة قبِّل على الحِلَّة
قول ليها يوم بكرة كُـرْبتْنا تِنْحلَّه
ننزِل نضـــــوِّيكي ضِرْعاتنا مادِلَّة
قادرين نســـوِّيكي عُقْبان عَلِي الله
))))))))))))))))
يا طالع الشجرة
طوْلنا يا والله
أنزل هيا ويلاَّ
إندلَّى نِنْدلَّى
نِنْدلَّى حلتنا
حلتنا مادِلَّة
))))))))))
نندلَّى ما دام الأسف ، والجهجات ماب ينفعُو
ثبِّت يَقِينك ،، يا ولد .. الناس مصيرُن يرجعُو
ما شال عزيمتنا الهوا
والبنْدِقْ المربوط سوَى .. مافي أيِّ ريح بتفرْزِعُو
إنت وأنا ..
نار السعق كان ولَّعت بيناتنا ما تِسْتهْوَنا
الجوْ شرارة تَوَلِعُو
الزول بَحِنْ ..
حِنّ يا ولد ..
حِناً يقَدِمَك أتْبعُو
وتِشْ عينو دجَّال الضلال
قبَّال يَمِدَ لك أصْبَعو
حِنّ .. يا .. ولدْ
والضو يقالد من طَرَفْ .. ناس البلد قبَّال يقالْدُو يَدمِّعو
دمع السواد الانزرف .. لوْ الدموع بِيَرَجِعُو
في عَمَّة .. في بِتْ .. في ولَدْ
شمََّّ البلدْ .
ناضَمْ قبيلتو ووانَسا
هبْهَبْ دموعُن ويبَّسا
نقْنَاق حِبَيْبِين القَسا
طرَّاهُو حِس الطائرات
والضو نِسى
قوز الرماد ، والفوقو ، فوق قوز الأسى
الْفي المدرسة .


يتبع ....

ناصرعبدالله
05-18-2010, 12:33 PM
(7)

- شُفْنَا .. أيِِّّ شِي .. وما شُفْنَا شِي
مِعْزَاتنا كَدَّن للحصى .. شُفَّعنا بيَّتُوا للقَوَى
وجع البطون ..
درن العيون ..
الهلْوَسَة
موية الغنم والدود ، وموية الناس سَوَا
المستراحات === الخَلاَ
الله يجازي الكان سبب . . ما نلْقَى عافِي ولا دَوَا
ما نلْقى غير النسْنَسَة .. وكاوِيقْ كلام شالو الهَوَا
حال .. ماها حال
وقْعَتْنا تبقى على الجبال .
غلُّوا البضاعة .. العِنْدُو سِلعِة عِرفْ لها
غلُّوا القمح
غلُّوا اللحم
غلُّوا الخَدار
حتَّى .. الملح !
دسُّوا اللبن
دسُّوا العَدس والصلصة
دسُّوا الإسبرين ..
دسُّوا المعايش كلَّها
_ حاكومة وين .. واللجنة وين .. في عديلة راكْبَة محلَّها
اللجنة حلَّيتا .. المصيبة الجامْدّة شِنْ بِيَحِلَّها ؟؟
حال .. ماها حال
وقْعَتْنا تبقى على العدو .. الفيها تبقى على الجبال
قَدَرْ الله .. يا بِت الحلال
لع .. يا العَشِي .. قَدَرْ الرجال .. اللابْ تخاف الله وتتوب لابْ تِخْتَشِي
وأنا لجْنَة غرَّقت البلد .. أرجع وأجيك بي يات وشِي ؟؟!!؟؟
_وغلاَّ البضاعة .. الْفِي إيدُو مفتاح البضاعة ..
الأرزقي المايِصْ عَرَقْنا ومِتْحشِي ..
وما ضرَّ غير أبَّان دقون فيها الضلالة معشْعِشِي
وفِقَراً تَغُشْ في الله .. تخُشْ بيتو وتسرْقُوا ورا العِشي
كُرْ .. من ضمير ناس .. هان قَدُرْ .. تجْلِب بِلاده وتِتْرَشِي
كُرْ .. من عَوَارْضِك يا بلدنا .. الناس تَشُوف ومَدَعْمِشِي
تسمع سماع .. ومَطَنِّشِي !!
وحاكْمَانا في اشنو .. وشان شِنُو ؟
حاكُومة ما خابْرالنا شِي ؟!؟
حِسْ أمَّها المَهَرِيِة همْ ، يجي من بعيد
يا أمُّونَة بتِّي شِن الشَكِي
ما حاشُو في الطين الرُخُسْ .. ينحاش فِ أرْضِ مَكَرِكِي
حَرْمان عليكي تقولي لا
مجبورة يا خادْمَ الفَكِي .. مجْبُورة إنتِي على الصلاة
لا تأذِي جرحو تحَكْحِكِي
وجاييك مَلَكْلَك من تِحتْ .. يا أمّونة تاني تَلَكْلِكِي
شيلي الحَرف داك رشْرِشِي
قوم يا عشاي .. قوم للعَشي
قوم .. واِنتَكِي
وقام واِنتَكَى
ويلقى الحسن في صفْحَتو وقِدَّامْ وَشِي
- إن جيت بلدنا إنكسِّرت
_ أيِِّّ .. آ .. الحسن
- كَسَرَا البحر ؟
_ أيِِّّ .. آ .. الحسن
- يابا البحر دا .. بحرْ بلدنا ؟
_ أيِِّّ .. آ .. الحسن
- الزول يكسِّر بلدو ؟؟
والضو .. سكَتْ .. طقْطَق أصابِع ولدو
.... فِسْْ .. إنجِلِسْ
... فِسْْ .. إنجِلِسْ
- يابا المدارس اندمَّرت ؟؟ صاح والجوامع اِنكسَّرت ؟؟
_ أيِِّّ .. آ .. الحسن
- يابا .. الجوامع .. هيل مِنُو ؟
_ هِيل الله .. نُــوم ..
- حتَّى المدارس حقَّتُو ؟؟
_ لا لا الْلتْ الحاكومة .. نوم ..
- هُو الزول يكسِّر حقُّو كيف ؟؟ !!؟؟
والضو يَطَلْوِحْ بُو اِندهاشْ .. ما يلقى قيف
.. لا بان لُو .. بَرْ .
وأمُّونَة صُوتا من البعيد ..
نوم .. يا .. قَشَرْ
- صِحْ يابا في الجامع ، جا تمساح واِنبَطَحْ ؟؟
_ أيِِّّ .. آ .. الحسن
- يابا التماسيح .. مسلمين ؟
_ لا مجرمين
- لابسين دقون .. لافِّين طِرحْ ؟؟
_ ..........
- ما تَضْرَبُوهُن بالسلاحْ ، وتَكَتِلُوهُن .. تاحْ .. تَرَحْ ؟
والضوْ .. سرحْ
وأمُّونة صوته من البعيد .. حَلِقَه إنجَرَحْ
: نوم يا قَشَرْ .. : نوم قبْل أجيك
- يابا البحر دا ولَدْ مِنو ؟
_ ولد المطر
- ويابا المطر ؟
_ بت السحاب
- ويابا السحاب ؟
_ خير للبشر
- ويابا البشر ؟
_ هُول ربَّنا
- ونان ربـ
وأمُّونة تجري من البعيد ..يقطع كلامو وتنْحَسُو
تَجْبِدْ أضانُو وتقْرُصُو
لا تقْلِدُو .. جيب القَشَر دا علي رفاقتو نرَقِدُو
أمُّونة هَزَّتَا تمْغِسُو
- أنا دايْر أنوم في صدر أبوي .. شان البحر
وقام إنحشر .. في صدر أبوهُو وحدَّثُو :-
في مرَّة جُونا .. رجال كبار .. كبآر
غَمَتُولِي في إيدِي .. قروش كتار .. كتآر
أمُّونة شالتا فنَّتا..
الراجِل أبْ دِقناً كبير .. سبَّاله دنْقَر لقَّطَا
وأنا قُم بكيت
أمُّونة فكَّت صُرَّتَا .. وأدتني صندوق بسكَوِيت
_ بعدين ؟
- سكَتّ .. وأمُّونة قامت .. شَوّ .. بَكَت
وتلْفَح نعالَه .. وتَفْلَعُو ..
نوم .. يا .. قَشَرْ
نوم .. قَبْلَ أجيك
- أنا داير أنوم في صدر أبوي .. شان البحر
وقام إنحشَرْ .. في صدرَ أبو
ونام الحسنْ .. في آخر المسا
وصنَّت عيون النوم يجيها بعد تعَبْ ..


يتبع ....

ناصرعبدالله
05-18-2010, 12:34 PM
(8)

سرْسارو داخل المدرسة .
والضو غَمَد
صِحَى .. بِي صياح الأمهات .. وأطفالَه مِنطلْقِين بِكِي
كل فردِة تبكِي على بلد
بكَّاهَا حِسْ الطائرات .
والضو .. ضحك ..
لمَّا البنات قالَن لُو طُقَّهَا بِي حَجَرْ !
يا الضو تَطُقَّهَا بي حجرْ .. في الجو ..
تَرمِّي لنا الخِيام ..
يا قطْرَِةَ التَرَاكُومَا ..
يا سكَّرْ .. دقيق .. ومعلبات .
ومنام .. منام
جات البلد .. تَعَتِبْ .. جراحَه مَسَبَبات
لون القمح ..
طعم التُمُرْ ..
ريحةَ الطَلِحْ ..
ضُل البرندات القُدام
البُرتُكان .. والمنقة .. والليمون
يجوهو .. منام .. منام
طُورِيْتُو .. فِطْنَ الكونْشِبِر .. مرْكُوزة تالا السام
تجيهو .. منام .. منام
المُشْرَع .. البنْطُون معَدِّي .. ودوْشَةَ العمال .. تجيهو .. منام .. منام
الروضة والأطفال .. بنات الإبتدائي .. العام .. تجيهو .. منام .. منام
الشارع الوسطاني .. والزاوية .. الَسَلام والناسْ ..
يجوهو .. منام .. منام
الصَفْقَة .. والطنْبُور .. ووِزَّاً عام .. يجيهو .. منام .. منام
الناس تقاومْ في البحرْ .. مرْيُوقَة .. مِتْماسكِين تمام ..
في القيف يجوهو منام .. منام
الأرْزَقِي أرباب البنوك .. شُلَّةْ حَرامِيْةَ الضلام
المُلُّسْ .. السادة الكرام .. لافِّين عليهُن زيْ غَفَر .. قاشْرِين
يجوهو طُمام .. طُمام
السُوق .. غَلاها .. الشُفَّع الأيتام ..
يجوهو .. دِيوش .. دِيوش ..
وبلا قروش .
اللجنة .. تجَّار الرصيف .. المسْخَرة .. الهدَّام ..
يجوهو .. كروش .. كروش
والضو يدُوش !
أصبح صباحِك .. يا البلد
واللاَّ العَفاريت أصبحت
يصْبِحْ صباحِك يا البلد
تَبْرِي وجرحْ بالك برد ..
والضو يعافِر في الجبل
مرُّوا بُو سابع يوم وِلاد
يا الضو حمارْتكْ .. طفَّحَت
أمِس الكلاب بَعَجَنَّهَا
كلبةْ مدينِة .. وديكا .. عِيك .
دحشك .. معاهُو دحيش غريب
خلِّينا فوق قوز الرماد
أدِّينا عيش وصبيط تَمُرْ .. يبقالو زاد
إسبوع يعيش كان الله اراد
أنا بُكْرَة صادْ .. كان الله راد
والضو خنس .. قنَّب حكَى
حكَى للوِلاد قصَّة تساب كم واربعين
حكَى بي مَغَسْ ..
كيف جِدُّو فات الدنيا .. فاكر الإنجليز ضربُوا البحر بالطائرات
شان يشْرَق المشروع يموت والأمَّة تنْشَتت .. شتات
قال وإنتكَى ..
" الإنجليز أذنابَه في .. وكم وأربعين مويات وجات"
صنَّة و بكى
بكى ما بكى
بكَّاهُو حِسْ الطائرات
بكَّاهُو قُدْرَتُو تنتهي
بكَّاهُو يرْجَى المعجزات .


ـ تمت ـ

نبيل عبدالباقى
05-24-2010, 08:50 AM
يا رائع

يديك العافية

ناصرعبدالله
05-24-2010, 01:09 PM
رسائل ست الدار

(1)
(جواب أول)

باسم الحاضر والمستقبل
ست الدار بت أحمد تكتب:
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
وباقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قتلو نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
اتبسملت.. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
ولا خبيراً للمشروع
علماء آثار .. فضلت في آثار
ما خموها الجونا قبلكن .. شن خلولنا بلا حجار
الله يصرف الخواجات
بينات جعفر والمحجوب .. والمحجوب والخواجات
طقت حجي .. العمدة طفاها
باقي الناس الجات للفرجي ..
قنبو قيلو شبعو لحوم .. والخواجة يصور ساكت
صورو بت الجنفاوية طلعة تكسر في الواقود
شافع الحلب اب ضلعاً بره ايدو تدمم وجارلو عود
والخواجة الكلو لغود وكنا نصور في البوبار
ويا بوبار العمدة وبذخو
ست خرفن وتيس انسلخو
ستة خرفن وتيس ما كفن
ستة خرفن وفي فد يوم
المعدوم أشكال وألوان
أي خدار في اليوم داك في
كملن رف كمين دكان
صاتو السكر شوالين
يا سوق جات من وين
لولا اللعب الفي التموين
والتموين احزان ما كفن
تالتة جدك عالم الله
الا الجاها من الجيران
وبعض الناس درشو الكرملة
الناس الفي الفيها ... قمار بي جيها وطار بي جيها
ومرة يدعن .... ومرة نديها
الدهشان حدر طاقيتو
عشان خواجة اداهو سيجارة
ود الخير ودر يوميتو
وشوق شدتلها ستة جرارة
الناس الفي الفيها ...
وشيخنا محمد قالب حسو
وطه مكفكف وحازم نصو
وحاج عثمان ينقندف وكان اول يوم في عمر الزاوية
انو تقيل دون أذان وانو الناس ما صلوا جماعة
الناس في الفيها .. البيت غنمو القوى يوم داك
السابا سقايتو ... الخلى قرايتو
الرفض الطاعة .... البقى ينكفرن
وكل راس ساعة تخش صينية وراء صينية وراء صينية
أول كفو الخواجات الترجامة وناس اغراب
ديش المجلس والمشروع
بعدو العمدة وصمد الساقية
عقب الطلبة وباقي الناس
حتى الشفع والحروم
ستة خرفن وتيس إنصفن
ستة خرفن و في فد يوم
شختها بختها بت كلتوم
تسكت تخبز طول اليوم
لمن حرقت الكفاي
قنبت المسكينة تدعي
الله يصرف الخواجات
الناس الفي الفيها ...
ومرة يدعن .... ومرة نديها
وموسى الفطقة مودر شبطو
وفطة عكفة مع الخواجة
الخواجة يقوم عكفة يصفق
يرقد بقعد عكفة يصفق طق طق طق
يسكت يرطن عكفة يصفق طق طق طق
قام العمدة وشيهو اتغير حمر فيهو عيونو وطير
الخواجة مرق يتسير صفق عكفة
العمدة اتحير
وغاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
دمع وسب والأمريكان
جنس بدع
زولك ده يحير
ينزع توب فوق توب ويغير
توب الفلهمه تلقى يجرجر
توب الدين شفاف وقصير
تقع الحارة مراكبو تغرب
عند الجد كان أده ينقنق
وقت الفارغة يشيل ويبعزق
وكل الحلة مدودي ملاريا
أي بشر يخدم صايدا
خلق الله طول ليلا تساري
حمى الشارع من تبدأ
من راس داك تلب فوق ده
و المستشفى زيارتك زفة
الاهمال وبعوضة تنقد
رقد خرج ... خرج رقد
خمسة حقن بندول ودرب
وباكر ترج طب .. ما طب
حمى غريبة والاغرب وين
قامت ندوة قبل يومين
وكن يا الزين راي ناس الدين
انو قدر مكتوب ويصيب
قلنا سمح نطرى الله يختانا قريب
قالوا اكلوا زبيب
بيض كبدة حليب
قالوا اكلوا التين اكلوا الزيتون
رشو الحشرات واشربوا عرديب
وكل الحسبوك باكر جلبوك
جابوك من وين ومن وين جابوك
شوف عينا التين شفنا الزيتون
كرتون .. كرتون زي طور سنين
علب البف باف اصناف .. اصناف
والمطعم جيب بيض .. كبدة .. حليب
جنس اساليب جنس الاعيب
وبعدين يا الزين يا الزين لمتين
لي ايلاف قريش تملانا هريتي
بنوك العيش تنفضنا فقر
ندقش شقيش بغادي كتر
وبجاى الديش
معقول ده قدر ؟
معقول ده الدين ؟
صلوا مصلين .. زكوا مزكيين
اصبروا صابرين
قصرنا في ايش ؟ يا الزين معليش
معليش .. معليش
يا الزين انا اقول
قول بت حمدين
يوم لقت القش مسرق حوضين
قالولا قدر يا حاجة اراد
غامتلا حجر هاجت يا ولاد
ايوة الله اراد نعم احن عباد
لكن ده اتر يبقى الله بشر ؟
ما معقول
شايلا لي يمين
لا مع الله في زول
والزول بيبين
بيبين يا الزين
الله حي والعبد حنين
إنذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
ليك سنتين يا الزين اشمعنا
ما لميت في بيت يجمعنا
اختك قالت جاية متين
وكيف اخبار المغتربين
المدة ا الزين طالت مالا
سلم لينا على العزابة
واي انسان النار صالا
من سور كوبر ولي شالا
قولو صحانتك بكرة تفت
أي يا الزين زغرد ما قتلك
بت تام زين جابتلها بت
ست قصاف حتان البت
كيف الناس والحالة عموم ؟
والعزابة الكحيانين
سيد البيت عل ما كشاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار والحاصل البحصل كل صباح
شتلاتك قبضن
الحملان كبرن بالحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين وما ناسين المسئولية
المحجوب ينشد من خبرك
شافعو محسب من يومين
التومات طيبات ونصاح
إلا هباش بلحيل آ الزين
راشد كرر .. شهر اتنين كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
وداعة الله
أوعى البشغل والعربات
والحيكومة السمها فاير.

أم أولادك ست الدار بت أحمد جابر

ناصرعبدالله
05-24-2010, 01:11 PM
(2)

ست الدار بت أحمد كيفك
جاني جوابك مفتوح شارع
جاني جوابك وانا بتذكر
في ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتصور
في المشروع وعمايل جعفر
ولما بكيت .. يا ست الدار
أيوة بكيت .. يا ست الدار
لما قريت علماء آثار
علماء إيه يا بت الناس
سواح إيه .. ما عندك راس ؟
كمره وهيصة وخواجات ؟
جعفر وعمدة وفراجات ؟
ست الدار تتوهدبي ليه
يا ام الناس تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان
أي عوج مبدي ومختوم
صوتنا هناك وهنا مكتوم
ومافي فرق في الوقت الراهن
بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
أنا مأزوم .. مأزوم .. مأزوم
يا خرطوم أزمني الصلبك
فوق الطلحة الأمريكية
يا خرطوم .. أوه خرطوم .. أوه واشنطوم
طن ..طن ..طن لفتك فجراً
يسطع .. يقطع ...رحطك
ست الدار سامعاني كويس ؟؟
مرتي و اخيتي وامم الكل
أنا بندهلك من شارع الله ..
الفوقي هجير والتحتي بقل
سبي معايا الشردو راجلك ..
والحرمونا شوية الضل
سبي الحالة العالة علينا ..
حتى احكيلك بالتفصيل
حاصل الحاصل يا بت أحمد
جاني وفد في المصنع زاير ..
وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا مئتين عامل
مئتي عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين .......
مافي العارض واللا اترجى
العمال من سمعوا احتجوا ...
سيرو موكب صامد وصامت
إتضامنا معاهم سرنا ..
أب عرام دور عربيتو ..
العربية الامريكية....
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة ..
والعمال أصحاب الحق
هي البتقرر والتتولى
هي البتحدد سير المصنع
يد العامل هي العاد تنتج
مو المكنات الأمريكية
زيت العامل ياهو البطلع ..
مو المكنات الأمريكية
وسكن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي ..
وكل وجوه الراسمالية
وأشرف من ..............
داك الحين المصنع هاج
جات عربات اللات بوليس ..
فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتحريض والتخريب والشيوعية
البوليس صاقع شيوعية
وفاكر نفسو بنبذ فينا
آيا بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقم أو تحقيق الأمريكان
اسبوعين عشناهم جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالن شاهد
شوق وسلام الزين ود حامد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولن صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت ..لمت .. كان ما لمت
أنا جاييكم وما ندمان.

ناصرعبدالله
05-24-2010, 01:13 PM
(3)

(بعد الحاصل والإتحصل ست الدار بت أحمد تكتب) :
زيني الزين .. أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميز .. وأقدر أفرز .. أرجع أميز
فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
ينتج كيف؟ شغال بي فونيا؟
عامل ينتج عشرين حتة
تلحقو منها قيمة إتنين
ستة بغطوا المنصرفات
سبعة.. تمانية .. تسعة بغطوا
أدها تسعة المنصرفات
كل الفايض ..بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
خفف مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيط؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليش يا الزين بتوصي عليا
ليش ... ليش ...ليش
بتوصي عليا
وانا بت احمد ست الدار
ام اولادك وهم صغار ..
ام اولادك وهم صغار
ثم اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
وعارف ام راشد والتومات ..
مرتاً دغري وغلباوية
آه يا الزين .. لو كنت معاكم ..
كنت بقيت النوباوية
اسبوعين قضيتن جوه
يبقي غصب زادنك قوة
ما تهتم يا الزين بالحاصل
واصل سعيك .. سعيك واصل
واصل سيرك ............
لو ما كنت الزين ود حامد
كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو ..
فرقو غيما الأمريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو فاتوا الديش
غزّا بكانا اتنين رطانة
صاقع كلو من اسماعين
هو الفسل لهن الشغلانة
ويا اسماعيل
ما كان الديش شقّ مسيمعك بالجبخانة
لو المجلس قبل اوراقك ..
أو في الثانوي لقيت لك خانة
لكن قدرك يا إنسان ..
بلداً هاص هيصة جبانة
طالو الناس التريانين ..
ضلو الله الما ضلانا
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك
وقال جاييك في أول بص
البرسيم طهرنا البارح
نعجة راشد صبحت والدي
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
الواطة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزال السوق
مبعوتالك عشرة جنيه
والأشواق من هنا لا عندك.

ست الدار أحمد جابر

ناصرعبدالله
05-24-2010, 01:14 PM
(4)

تلغرافات :
تلغرفين في وقت واحد :

نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية


الخرطوم .. الخرطوم بحري .. كشك الشعلة .. الزين ود حامد
راشد راقد والواطة جعفر طالق فيها بهايمو
ست الدار بت احمد جابر


نوري السوق المحجوب ود أحمد جابر
كتب الزين .. كل الاوراق .. راشد كيف
النوباوية


الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود حامد
راشد
راشد
راشد


ـ تمت ـ

ناصرعبدالله
05-25-2010, 08:50 PM
حبّات القمح


(1)


والليل ..
خريف ...
وكل السنين
تركن عليهو
عقاب سؤال ؟؟
... ... ...
وكل الرياح
في الساعة ديك
متجهة
لي جهة الشمال
,,, ,,, ,,,
والزين يضرِّي ..
مع القمح
بيضرِّي
أحلام السنين ....
زمنو الخدم ..
ما خلَّى طين .
زمنو العديل ..
ساعة عليهو
العين تعين
ما كان فحل
كان ود قبائل
وكلُّو زين ..
كان من هنا
ولا حدِّي وين ...؟
ينذكر الخرتوم
يتـــــوه
وآلامو تتمدد
برش
النمرة بي عشرين
قرش
ويبني الضراع
ملِّين ونص
وهمّو الأكيد
آخر النهار ..
عبّار مريسة
من المدون ..؟
ويصبح بشر
ما عندو لون
,,, ,,, ,,,
يصبح وجودي
بكل حق
هادي ...
وودود
ما كشَّ من زول
في الوجود
وما إتملق الناس الكبار
عندو الفقير ..
زي الغني
وجنبو الغني ..
الزول الفقير
ماهو الدني
لاهو أدَّني ..؟
... ... ...
ما كان أكيد
يعتزَّ بي قلبو
الأمير
ما كان أصيل
زي حبة القمح
البتتحدى الرياح
وتبْ ماب تغيِّر
إتجاه
على رغم نتحات
الجراح ..
مازال عميق إحساسو
بالحياة مشتعل
وريدو الأكيد
لي بت محمد ..
متصِّل
ملكة زمانه
الفارق الحبّان
عشانه
شِقَا وهمل
... ... ...



يتبع ....

ناصرعبدالله
05-25-2010, 08:52 PM
(2)


كانت بدر
كانت بتدِّي الروح
عُمُر
ساعة تطل
عند العصر
شايلة الصفيح
مندلِّي
ولاّ معَ الفجر
قبل الطيور ..
تخبر محلَّها
فوق جريدات التمر
... ... ...
كانت نعم
كانت سمح
كانت .. نغم
ترياق .. جرح
وكل العريس
الجاها صدَّ
ملح ملح ..!!
... ... ...
ولمّان أخوها
السر كبر
بقى للمصارعة
والجري
حسّت عميق
إحساسه
بالميل للجمال
وبدت تعد
تعزِل ، تحسِّب
في الرجال
شان إبن عمّها
ماهو في
وشان إنُّو عرَّس
في الصعيد
نكروهو
قالوا :-
ولد حرام
... ... ...
وأيامه ديك ..
الزين رجع
وصل البلد ..
بي رأي جديد
سايق رياح تغيير
جديدة
من الصعيد ؟!؟
بي كفة إيد ..
وفي التاني
غامد الشوق
شديد ..
... ... ...
جابو الزمان
الساقو منّها
من زمان ..
"هوي يا البلد ؟
خلِّي الولد ..
زي مايريد
والبت كمان "؟.؟
... ... ...
وإنذكر اليوم
المشاله
وقابله
بي ريدو والشوق
صارحه
ما إتنكرت
ما إندللت ..؟
وبعد التلاتةْ أدوار
جا ساير
وصافحه ..
... ... ...
وهسَّع مقنبي
في التقا
زي كلمة ..
في العمق العميق
لسّع حروفه
من الضمير
ما إتكونت ؟؟!؟
والزين
يـ
ـقـ
ـع
منُّو الطبق
يقعد يـــــزح
يقعد يلم
طرف القمح
عرقك .. عرق
لكين وحات
إسم الله
كلُّو يروح
شمار في مرقة ..
في سوق الشمش
يا زول أمش ؟؟
أحسن تشوف لك
شغلة
في بلداً كُتُر ؟؟
... ... ...
والزين يغِّر
يوم السفر
ويتخيل إنو
ورا البحر
لا مال
ولا راحةْ فكر
ويحلف هو ما يجي
منكسر
والزين يصرْ
الزين يصِر
... ... ...
يطوي ويفِر
إحساس بأنو
هو كلُو شي
ولازم يغيِّر
أيِّ شي
وعلشان يغيَّر
أيِّ شي
لازم يجي
ويرجع
عشان
يلقى البلد
ما إتغيرت
في أيِّ شي
ما إتغيرت
ما إتغيرت
ما إتغيرت
غير إنّو ...
حبّات القمح
خفَّن...
بقى الهواء
يلفحن .

ـ تمت ـ

ناصرعبدالله
05-26-2010, 08:31 PM
مصابيح السما التامن .. طشيش


(1)

يا جايي مارق
من دخول الغيث
شرايين التراب السايفة ..
أوردة الوطن .
قشره اليباب ..
نشره العطش..
كلما سرت
قطرات دِرِبَّ الرحمة
في جوفو ارتعش ..
بال الشجر
حال العصافير
الخياله مع الدغش
مشدوه متل
خاطر طفل
من ضل ضهر راكوبة
فوق حافة حجر
واقع سجر ..
واقف يعد نقط المطر ...
ويتمطق إحساس السحاب
بين لهفة الطين
والشمش
لمَّت ورا طرف الحقاب
آخر رمش
باقيله في عِب الشفق
والليل ملقِّيله الطرف .
شفق المغيب ..
قفا غيم بِهِت
كان نفضة الريشة الأخيرة
حَمَاره .. فوق لُوحةْ الوكت ..
يَا كرْكُدَايْةَ الله
إترشق ناقع عصيره
من إيد ملاك
فوق المغارب بي تحت .
كانت مراكيب حين صلاة
والترعة قِدّامن .. طشِت
ولاّ المراكب من بعيد ..
ودعات على النيل
والنخيل المتكي
دار يقرا البَخِت
قنّب يحِت ..
قلّــع زريزير غفوتو
عضَّ إنطلاقة غنوتو
وقام منحفِت ..
والكمبو ..
ينشاف .. من مسافة ..
قطر بضاعة
العربجية الطيبين ..
سبّابة والمتسببين ..
شعراء ومغنين الأنادي ..
أنصاص لصوص ..
حلب البلد ..
عرب الجبال ..
منسللين من لاتحت .
والريح يشيل
للنيل
مع هرج المغنين
الدعايات
نشرة أخبار الولايات
الوفيات
الملايات
العبايات
المرايات
التصاوير
التعابير
الحكايات
النِكــــِتْ .
عشم البنيات في الضراع
الضاع
وكت حرَّ الكفِت
زاغ الصراع
ذات جمعة
قدَّت من وطن
توب السبت .
نقد الحمام خُرج الوكِت
طارتلو نقطة لحظة
من موية ملح
في حلقو
مرّرت الهديل ..
كَمَد الجرح ..
جبد السكات ...
لكنو فات ...
وأبى يتلفت ؟
بال الطفل ..
يرقل على ضهر الحَمَار
يجمع مصابيح السما التامنة..
ويطش
ينكربش الحلم البعد
قرب يوافينا
ابتعد
لو مدّت ايد
كان إنجبد ..
يا الدنيا
بي ريحة الدعاش
لو تنعرش ...؟
أو تنفرش
تحت الفراشات
بالبَرَد ؟
فوقُو الوعد
صادق يمش ...

ناصرعبدالله
05-26-2010, 08:33 PM
مصابيح السما التامن .. طشيش


(2)

لو يلقى راس رسن الزمان
ديك لحظة
ما كانت تمش
شان يندهش
أو ينبرش
بين نجمة الملكوت
ونسمة رضية
من رب العرش .
يا غادي منك
فوت كلام الشوق
من القلب
الخشم بابو البلد
لو خشَّ هدهد
في رماد ما فيهو
يمرق قانقرد ..
والقانقرد بابُو الحمام
راجيهو لمليم الطيور ..
ضمَّة جناح ..
صمّة عدد ..
إيدين بنيات الفريق
قادرات على
صد الحِدَيْ
جاسرات على
صقر النكد .
إيدين بنيات الفريق
بتهدهد الطفل الرضيع
بتعدي شيخ
دومة الحفير
تشلخ لبق ..
تسقي الخدير
بتعوس
وتفرك للملاح
بتورِّق اللوبي
وتحش
تمسك مراح ..
تحلب ، تخُش
تغسل هموم أيامه
في طشت الحلم
تنفض تشر الشوق
هِدِم
تنشل من البير
أم تلاتين باع
تعتِّل ..
تفزع الطيّانة
لو ما تجدع التبّانة
بتجيّه بيوت ..
تغزل خيوت ..
بتطرز المنديل
تخيِّت لي طواقي العيد ..
صبر ..
بتَتَبِبْ السجاج
مع الفجاج
تقوم
إيدين بنيات الفريق
بتحش تمر ..
تخرت سبيط
بتعتِّق الدكّاي ..
وتخبز للصفاح
بتكفّي عيزومة
وضيوف ..
بتغني قيدومة
وتطوف
بتهني ..
بتودي وتجيب
بتحني ..
بتدلك حبيب
بتولِّد الأمات ..
تربِّي على الصلاح ..
زي ماب تضمِّد للجراح
إيدين بنيات الفريق
إن داهم الحلاّل
خطر
قادرات على شيل السلاح .
يا مناحته
وبلاّله
يا ..
رجع اللي راح
يا ود عيون ..
فِرْحَن .. بكن
تِرْحَن يغطْسِن
في الدموع ..
الدنيا عامرابك تظل
وإن كان رحيلك
فرتكه
أو يا لسان نار الصراع
لهليبه بعدك لو هكَع
مين شالُّو شيلة بلا اتكَّأ ؟
مع إنو صبرك .. ما نفد
برشمت .. أو كبسلت
كيف سعة الوجود في ضيق لحد ...

ناصرعبدالله
05-26-2010, 08:34 PM
مصابيح السما التامن .. طشيش


(3)


باغتنا ريح الفجعة ليل
فرنب في جوفنا مرابنات الصبر
شات سعن الجلد
صادنا الذهول ..
زي التكنو قبل دا
ما فارقنا زول بعد الرسول
واللاّ التقول أول قلوب في الدنيا
يغشاها القدر بعدن تضيع منّو الدروب
تنطمبج الساحات حريق
يدغي الطريق المحتمل
كل الفريق سوقر وراك
يا جرحنا الكيف يندمل
ما بار وراك شهد الغنا
ونحل الحناجر ما همل
صادر خلايا أبو الدبر
صاقر حناياه نمل .. نمل
... .. .... ....
وين ماشي ..
يا نبض الرحيق
سايب المشاعر ريق دقيق
نهب المغنين التِفِل
غنواتن الورطانة
أو لوطانة في الريد المقق
حُترب صفق .. في طين ذبل
أوصاف على جسد الحبيبة
بهق .. بهق
تحت احتماله مرضرضة
زي لعبة ما استهوت طفل
وين داجي يا قمر الهنا
الكرّمنا عند مغرب مرق
سايب لياليك لي نجوم
واقفات وجوم على فد رجِل
وفرع الغُناء الميَّل هنا
على مين وراكَ . . حيتِّكل
والشيل تِقِلْ ؟
قَدْر اليشيلو الشيلة في
لكِن ظروفن هل تفي ؟
تحتاج جماعة من الرجال
الليها كنت براك تقل
دارت قبيلة من الحبال
الكان يقيله فرد حبل ...
الخوف قلوبنا التشتهيك ..
تنشك في ذاته وتنقفل
من بعد ما اتوحدنا فيك
ننفك قبائل وتنكتل
وينشعنفِن مسّار بعد فتل الحبل .
حب يا خيالي الوين وصل
دُر يا لساني وماك فَسِل
أطهر وزيزيناً يعوم
في النيل ، مع الصير منشغل
ولاّ اليقوم يوم بعدِ يوم
يغسل دمومو عديل غسل ..
ولاّ الوطن قال ماب ينوم
إلاّ الفجر يا ليل يهِل
ماسك وضوهو من الغيوم
السالو سيل ساعة محِل ؟؟
كيف الدبارة ؟
و ما العمل ؟
لمّا القبيلة تشيل سيوفه السوق
تبيعه على عجل ..
تغشى الكناتين العويش
عُقُب المغارات الحشيش
تاخد بخور ، ودخان
ولفّافات سطل ؟
ورق المواثيق إنبهل
كاويق جريح
طلوحبو ريح
كيمان مقنبرة للمديح
والطار مجلّد من حشا الفي القبّة
عصب الفي الضريح ؟
حلقات قمار تحت النخل
والخيل مجهزة للرهان
آخر النهار فوق السهل
لما الجدل يبقى الدجل
والأيدولوجيا هي الملاججه
واللواجه بلا عمل
اللخبطة
الخمج
البوليس كتا كتل
ليش البلاد ما تستباح
يوماتي كل ما الليل دخل
اشمعنا يا شوفنا الرحل
ما انصدقت زرقا غناك
ما كان حصل الحصل
والبت نصيرة سنة محل
بَنَت الدهب
بنيانه ما فات الرُكب
حزنت على التِقِي
والتِبِن وين تِبني لِبني
أبى يتلقي ..
والكيل كرب
ساعة الرجال سكنوا التُرَبْ ..
والدنيا موية وسط حريق
تصبح كُرَب تتمسى ضيق
قامت نصيرة تحِت تعب
بِرَت الفريق ..

ناصرعبدالله
05-26-2010, 08:37 PM
مصابيح السما التامن .. طشيش


(4)


يا اخواتي ستات البيوت
ناولني قوت
قبّال أموت
دور والعيال
ما فكُّوا ريق
طبق الدهب
بي مِدْ دقيق
دهب الجبال
صافي البريق
بي مد دقيق
أُن كان مريق
يا أخواتي ستّات البيوت
أدِّني قوت ..
عربون أموت ؟"
مطفية نيران التكول
رغم الدخان
والحلة زي المافي زول
رغم البطان ؟؟
يا اخواتي
ستات البيوت
صافي البريق ...
.. بي مد دقيق ..
أدني قوت ...
عربون أموت ...
عين الشمش زي التقول متشوشة
أو مرشوشة بي حمرة غضب..
زبد الحَمار زي رغبة المالح
بعد خجة غريق ..
والليل دخل كبت الفريق
قنعت نصيرة من البلد
قنعت نصيرة من الدقيق
كشحت على كوشة الدهب
وجات صادِّي بي نفس الطريق
لا رحمة غير الموت قبل
لمّت عياله على عجل
اتشهدت واستغفروا
وقفلت على روحه الجبل .
كانت نصبرة
بتفتكر
جوف الجبال
أولابه من عيشـة الوبال
أولابه من حرس الرجال
ساعة يصيب البال خلل
والحال مو يا ..
كم من نصيرة بلا نصيرة
اتريحت .. وفضَّل براك
رغم الفشل والإستياء
من مسخرة هادي الحياة
بي إيد تدهده للأجل ..
وبي إيد تهدهد .. في الجراح
بي إيدين تفتِّح للدروب
في كبرياء .. ..
والسايقي لابد من تصل .
ضُلْ النهار .. الليل ..
مُو .. يا ..
تبرد غبينتك ولوعتك ..
طول الأزل
ويا روعتك لامن تجادل دمعتك
دائماً تكون فوق العيون
مرحيبة بالداخل عليك من دنيتك
عبّيت مصابيح الصباح
ببياض ضميرك ونيتك
بعرق جبينك وبنيتك
وبالشمشِ ماروق الرجال
وجّت جنائن غنيتك
ما كان رحيلك غير دليل
للجايي ماسك سكتك
يا شدو عصفورنا البسيط
كل الحلوق إتوكتك
إن ماب تبيت فوق السبيط
طوِّل مسافة ركتك
ما صمتك مطراً غتيت
لا ريح لديح .. يوم سكتك
عذراً إذا حال الوطن
بالجاتو ذات ليل بكتك
سايقين بأيادينا الزمان
شادِّين خيوطو الفكتك
يا بئر تكلة الناس عليه
وما قطَّ ..
يي شنو دلو إنهتك ؟...

ناصرعبدالله
05-26-2010, 08:38 PM
مصابيح السما التامن .. طشيش


(5)


يا صاحنا في الزمن الغلط
يا سابلو دمك كالغيوم
لا صرَّ وشك لا عبس
إيش يعني لو سالن نقط
من كل عابر نقطة بس
يصبح شرايين الظلط
تبقى الشوارع أوردة
وجسد البلد عافية عريس
لاف العتامير قرمصيص
لأجمل عروس النيل رحط .
والكون صحابك وإنبسط
فاتحة صحابك ولاّ موج
دا برش فراشك ولاّ شط ؟
سيل الدموع الما انحبَس
في الواطة بيقوِّم تَبَسْ ..؟
شهى المدائن تنتفض
ما تمتعض ..
موكب زفافك للأرض
شهداء الوجود تتلقى ليك
محتفية بيك ... شوقة الربط
مركب شرط .. هوجة البحار
شايل خبار الهاربين
كان البشارة لكل شط .
عِلت إبتسامتك حين هبط
ما من جواز غير راحة إيديك
لا من ربط عملة وشنط
نية رسول ..
إنسان فقط .
ما بينا بيناتك ربط
بي أسمى مبدأ .. وأقوى خط
ما جانا عشقك من فراغ
لا نحنَ غنيناك عبط
جرح الوطن خطالنا خط
ختالنا قول ما منو نط
والليلة يا موت يا حياة
خاتي البيختار الوسط . ..
ويا بلد فوق اللِمِيلِس
لا تَهِمْ
لاب تميد الأرض تحتك
لا مغنيك بتردِم
مادلك نغمو اليكاجر للبتاجر بالنضم
يشطب الشخمت مشاعرك
ويرسم الإحساس رسم
في الزمانات الكتم
غنوة تدخل .. زي نسيمة
زي شعاع قمرة ونجيمة
لا خشم باب لا تدق ..
لا في إمضاء رقيب غريب ..
لا تراويس لا ختم .
غنوة من بق المغني
وفي القلوب بالفال تبق
تحرق السقط التدني
وبي تأني ..
واثقة تفتح في الدروب
المارقة منك وداخلة منِّي
المارقة فيك وداخلة فيِّ
الداخلة فيكَ ومارقة منِّي
وشايلة حنِّي ..
ضريرة .. حُق
سيرة ..
دلوكة وتدُق
وتنطلق من بُق لِبُقْ
تنهرد دارات تغنِّي
رابَّة حس درويش مفرتك
صانّة زي شيخي التبنِّي .
ومن بعد دا ولا يهِم
المغنِّي مع قضيتو
يقضوا ليلات القِسِم ؟
كلما تنبح كلاب
كلما اِنكشَّح عذاب
كلما طفّح سِباب
كلما عانى الجسم
كلما غرّوهو سِم
كلما كان المغني
كما المعاتيه يبتسم
على التجني كأنو جِنِّي
سديد بصيرة وملتزم .
ويا ...
المغني الما نِدِم
يوجد غنوتو وينعدم
خاتم المغنين الوفاء
سي يا خَتِم ..
سلِّم على الشهداء وكفى
وإنجم من بعد السلام
يا ال … مصطفى
طابت عينيك
والحب عليك
يبراك وسِم
يكسيك هدم ..
أرقد .. قَفَا
ويكفيك إسم
الشتلة طالت ..
والسبيقة
بعد دا لاشنو
التنهدم ؟
قول للبلاد ..
الطلوحت عينيها
في دمع السواد
قول الله فِي .
قول ليها ما غنَّى الأسف
تتأسفي
لا حضَّ نمُّو على الحداد
تتكتفي
عد عود ما ودّع شهيد إنقريفي
في السكة يوت
في شهيد جديد
لأيام جداد
هيّا أنزفي
لمَّا الشوارع تكتفي
وينهض جواده المنكفي
وتتكيفي
قول للعباد
الطلوحت عينيها
في دمع السواد
ذات مرَّة .. ما خِبر السأم
لما البلاد صاده الوخم
صار المضاد الما اتلخم
دغم النغم في حرفو
وانفرطق لغم
ينسف مطاميس الألم
بي سن قلم
كل القواميس الوهم
جرفه المداد
لمّا الأماسي بقن رماد
خرم الزمان بي غادي قاد
وإندقّه في الخازوق سهم ...

ناصرعبدالله
05-26-2010, 08:40 PM
مصابيح السما التامن .. طشيش


(6)


دُودر نويرات الفريق
قِربَن بعد كانن بعاد
كورك لنا ..
وما كُنَّا في
بعنا السيوف في السوق
أخدنابه السطل
هايصين كُتُر والخيل حِفِي
كورك لنا ..
( قبل المصابيح تنطفي
وينزل سواد
إنفقدوا الخيل والعتاد
إتمعنوا الدرب العديل
إتضحوا بالصبر الجميل
زمن الخساسات الخفي
إن زالف الشوق في الرقاد
قدح المواعيد بنكفي
في الضلمة برد الليل مخيف
قاسي إحتمالو مع التعب
والجوف خفيف
صعب إحتمالو على الضعيف
فِطْنَ النويرات الرغيف
فِطن الرغيف لِب الدِفي
فطن الدِفي إحساس الصباح
فِطن الصباح كل العصافير تحتفي
بي روعة الكون والعباد..
فطِن العباد جية البعاد
فطن البعاد الماهو في)
رجّع صداهو أعاد .. وعاد
زي أيِّ درويش إندغم
في نقرة النوبة الأرض
بين باطو يا دوبك شتم
أو قوق حمامة مولِّفِي
فوق راس بيوت سبلوقه دم
"إياكي تشربي يا طيور
في الترعة موية الترعة سَم
إياكي تقربي لي بذور
فوق القبور تحتن لغم
إياكي تضهبي والصقور
بيشموا شم
قوقت حمامة إلى الديار بعد السلام متقريفي
قوقت فجر
قوقت ضهر
قوقت عصر
بعد العشاتين
كيْكَت ..
سفهوها قالوا
مخرِّفِي ؟؟
كورك وراها
وكنَّا في
صانين زهاجي
كما التراب
حين كل غيمة
مطرِّفِي ..
على قَدْرِ ما اتحزم
يلملم فينا من نتش السموم
الدنيا تصحى مخرِّفِي
يجي ريح يسوق غيمو
المعوَّق ويختفي .
غلبو التعب
كوَّع على جرحو اليسار
وسكت .. سكت
قيرة الكمنجات إتكت
فوقو وبكت
أنشودة الفوت الوفي
أغرودة
أو زغرودة الموت الحفِي .
فيا مَن تحيَّر في سرُّو الفنا_
إذا الهاربين الجدد
خيَّروك يا تفوت
يا تخون البيوت
تكون من أنا ؟
إذا الغالبين في أحُد
أجبروك يا تموت
يا تعضِّي السكوت
فكيف الغنا ؟
وكت ما الشفوت
بصوتك تصوت
تعلِّق بكرتو على الميضنة
تحرِّم عليك مناجاة ولوفك
ملاقاة طيوفك وراء المشجنة
تغمد تشوفك
تتبِّن حروفك
قبُل توزنه
تقلبن كلامك
تعد إحتلامك
بباكر زنا ...

ناصرعبدالله
05-26-2010, 08:41 PM
مصابيح السما التامن .. طشيش


(7)

فنم لا تهم
لامن السلطنة
تكشُر الألسنة
يسري قول الشعوب
من مسام دندنة
مش يسد الدروب
المطر بالهبوب
والخبوب والخنا
وماب تعوذ الخلوق
من طريق ممكنة
مُش في هادي الدنا
من قشيش الجبال
التطاهو النعال
باقي نال الرجال
في بعض يفتنه
بين فرقة النبال
والقميري الوبال
والحياة المحزنة
الجنات الجهال
والبنات أم حجال
ضو بيوت الحلال
من هنا ولي هِنا
فجُّوا فورة الفنا
البقيرة أم ضروع
نقَّعن دم .. دموع
شمموها الجنا
والشديرة أم فروع
ركَّعن في خشوع
شعبُّوها القنا
طيَّبوها التلال
من خبوب الكتال
بي حبوب السنا
سوُّوا قيرة ومطيرة
أرووا شوق الرمال
غنُّوا .. يا هودَنَا
"لعبة قديمة عندنا
كان شبعت يا جنا
ما شبعت قول لنا
بت العسكر
تمشي وتسكر
بت النوبة
تغني طروبة
من الحنِّية
مع عرُّوبَه
تقلب الهوبة
في الراكوبة
على اللالوبة
تشر لي توبة
ترسِّي الغربة
تنسِّي التربة
مآسى حروبة
تكسر الحربة
بعود الحربة
تدق النوبة "
ربُّوا .. يا سودنة ...
بقَّروا الطير رجع
والبلد كع كرَع
ركَّ في الميضنة
دكَّ للميضنة
الهِي ما مئذنة
كانت الميضنة
الهِي ما مئذنة
ضاربة في نصنا
حقنة لي مصَّنا
مدخنة حربنا
مدمنة سبَّنا
وإحنا ما ذنبنا
بي طريق ربنا
جينا لي ها البلد
وإنولد حبنا
ليها لي شعبنا
والله عالم بنا
وعارف الميضنة
الهي ما ميضنة
ساسه مما إنبنى
ماها لي ربنا
ميضنة بشتنة
والرسول كجنة
ميضنة كشتنة
والله قد لجَّنا
من مياضن الدمار
الله هوي نجَّنا
وأبني فينا الوقار
لي جنا الكم جنا
إنت فارج الكروب
للبطولبو العنا
يا مخارج الدروب
من متاه الضنا
حكمتك في القلوب
بس ندور نتْبِنَا
إنت ياك طبَّنا
وياك خلاص قلبنا
من دواس شعبنا
سو رصاص حربنا
فاس لقى وعبَّنا
بالصلاح رضّنا
لي فلاح أرضنا
نبني للميضنة
التبر فرضنا
التصون عرضنا
وما تضر بعضنا "
إنها السودنة
منّها الهودنة
ويبقى يا حاكمين
كلمة العالمين
مافي من يلكنة
وحكمة الآدمين
مافي من يسجنة
ولاَّ ماب ننكتم
ننهزم .. ننهزم
إلاَّ ماب ينحكم
بالضلال شعبنا
فنم لا تهم
كشكشة كوزنة
والبغُش الغبش
ماب يغش ربنا
حزب من كذب
ماب يقوِّم بناء
وبناء منخرب
ماب يعمِّر بنا
فهِدَّ الرديف
العليه حقّنا
وأبن لك صريف
من عضاك أو قنا ..

ناصرعبدالله
05-26-2010, 08:43 PM
مصابيح السما التامن .. طشيش


(8)

وطن قول وطن
وطن يا جنا
وطن من تِبن
ولاّ قمحة هَناوطن
ثم من
وطن
ثم من
وطن
لا ثمن
باعك الزنزنة
وطن واحتمل
وطن واحتلم
برجع الحبيب
من متاه الضنى
في ناساً عزاز
مشتهنك رزاز
في ناس الرزاز
مشتهيهن هِنا
يغيض الحراز
حين يفيض البحر
عشان يذدهر
طول فصول السنة
قوانين تجوز
حتى في الأزمنة
هو الضد يكون
سكون في الغضب
غضب في السكون
هو المستقيم
هو المستدير
هو اللولبي
هو المنحنى
هي الكائنات
في الطيور مسكنة
وتستخف بالصقور
والحِدَيْ إن دنا
بالصراخ بالضفور
بالجناح اليفور
حين تفقِّع جنا
نِم .. حين تهِم
هِم وإدلهم
عليك الصدام
سرَّة المأمنة
عليك الكلام الجديد
الحديد
عليك النشيد
يا شهيد الغناء
تموت ماب تفوت
تموت أو تفوت ...
الشفوت العنا ...
ويظل الوطن
سيِّد الأمكنة
ريِّس الأزمنة
وأروح يات بكان
ألاقيك ..
معمِّر ..
مقيل أمهاتنا
أماسي أبهاتنا
ونهار البطان
يصنُّوا الجنات
يغنُّوا البنات
بذات المعاشم
يحاكوا الكمان
تصدِّق لقيتك
في شافع في خلوة
صباحاتو حلوة
مدنقِّر في لوحو
ينقِّر ..يدندن ..
بصوتو الملان
غناكَ المسخِّن
يبرِّد جروحو
ويدفِّي الكيان ..
وكت تمرق آهة
تصنقِّع تراها
يصنقِّع تراها
يشوف الدخان
تجمَّع سحابة
تكوس في الغلابة
وترابه الزمان ...
لقيتك في قهوة
ودا شيْ عادي كان
بس الماهو عادي
خلا ويا بلادي
صحارى وبوادي
جروحو الحجارة
التقرِّب تحارب
قبُل ما تعادي
دخلة المغارب
تبردب .. تقارب
كهارب.. كهارب
ترازي وتزازي
صواقع ترجف
بروقاً …توقِّف
قلوب الروادي ..
ورواديك معادي
غنا الإعتيادي
شريطك حدودي
حجارتك وسادي
مسجِّل صحاك
المنام الزيادي .
بس الماهو عادى
دا من وادى حلفا
ودا من كاجو كاجى
ودا من ريره غادى
ودا من كردفان
ودا من كل حته ...
عقاباتو شتّى
وجميعن يغنّوا
يغنّوا ... ويصنّوا
يصنّوا ... ويحنّوا
يذات الكيان
لذات الكيان
ناس ولا انشافوا
عنوه يتعارفوا
فلان ود فلان
ودفلان
قلنا سرك تعدى
الزمان والمكان
هبشتك ,.. نقشتك
مغمِّد حدرتك
منو المن شدرتك
طعم كم لسان ؟؟
أظل فيكَ حائر
كما العش في طائر
يا سِر الرحيق
كما البرتكان
شنو أصلك
غمائم ؟
حمائم ؟
هديله ؟
نسائم ؟
جنان ؟
طبول القبيلة
سيوفه وحصان
اليقيف فوق قتيله
لغاية الأمان
محل نمشي فينا
مهقد عديلة
وبشائر تجينا
شنو أصلك أذان ؟
جرس من كنيسة
إذا رنَّ عيسى
يصِن في الكهان ؟
ألوص فيِّ حافي
أكوس في اللي مافي
أظل فيكَ مدرك
لخافي البيان ...

ناصرعبدالله
05-26-2010, 08:45 PM
مصابيح السما التامن .. طشيش


(9)

وتظل نبع المياه والضو
قمحنا ..
كسانا ..
عافي ..
سكن .
وين ما نسكتك .. نسمع
عصيفير الحكاوي رطن
متين ما نفقدك نلقاك
تحانِن بالغناوي وطن ..
مع إنو حباكَ ميتة الغربة
وإستكتر عليكَ كفن .
قدُر وطنك مع الأوطان
إذا ما كان سحايبو أبن
يمرقن قش من الوديان
عشان تدِّي السعية لبن
قدُر وطنك ..
إذا هلكان
قدِر ينقذ قرف دركان
قدِر يقسى ويخيِّب ظن
حِبَيْبُو .. الطيِّب .. الإنسان
يطفِّر ريحو .. روح الفن .
وطن .. ؟
لكنو ..
ما هولك
ولا الزول القبيل بي خيرو
بات زولك ..
وطن محتل
بشوف مختل
رؤى ووجدان
خيال مكسور
وشن جابرو
ينوم والجنّة في خاطرو
صُرُف غلمان
بنيات حور
خمور وقصور
يشِب من تل بخور تيمان
بلا رحمة وبلا رحمن
يقع يابس على دابرو
يرجِّع شهوتو الشيطان
إلى الدنيا ويقوم مبتل .
وطن من هولو ما هولك
ولاك الهولو من هُولك
فما معنى الأرض
بالضبطِ ..
أو بالربط ..؟
شن قولك
وكت تكدح
تكد حولك
تباصر الموية بالسرقة
غرامة
ودردرة
وعلقة ..
ويصادر الوالي محصولك ؟
يلز ضل المقيل تعبك
ينصِّل منجلك قصبك
يهز لك راسو قندولك
ولادة التابى ماب تابى
تحت باطك تجر الريح
بدل مسدار وورتابة ؟؟
وطن ما ليكَ فيهو وطن
بحر لي جرفو يتغابى
لو ما ترمي فطنو حجر
كركجايي .. دُرَّابة
لو ما هبَّ ريح الشيم
وريح الشيمة هبّابة
تقول مرسوم ؟
أو أنو الغيم
ملقّى عليهو
رقّابة ؟؟
بحر يا أخيْ
خسارة .. أفي
عوارضو الجَنْ
يحندك فينا بالمي الني
يملِّينا الشراب ألجن !؟
نصاقر لامتين الصيْ
والعالم صحاري سِقن
إشن عبّاك وقالك غن
أو غبَّاك وقالك عن ؟!؟
وطن خلوهو للأقدار فِتَن
ما خلُّوا فيهو خدار
خلاف الطرفي طرفِ أغن
وطن ما خلُّوا فيهو وطن
معلَّق بين لهات عربيهو
والزول الحويلو رطن
... ... ...
ولكنك تغنِّي وطن
بعد دا ,,,
وطن
بي دا ,,,
وطن
يي دا وطن
لاكلَّت مزاميرك
ولا ضرب الربابة وهن
عشان تتفتح الأبواب
تغنِّي حقيقة مو هوّاب
تغني صواب
تغني وشن
فيا دخلت هِبَيْب الرحمة
يا مرق الحِبَيِّب إذن
تغني طليق كما الطالق
تغنِّي .. تغني ما اتيقن
تبشِّر في التقانتو بكن
يكون المدفع الخاذوق
مكانو مكن
بدل ها الدم من الأمّات
رضيعاتنا اللبن مكّن
ومن بعد المناحة الضيق
زغاريد الفرج طقَّن
نقاقيرو اليسوِّن ... دُن
تطمِّن في المرق وحِّيدو
لا خوفاً عليك لا حزن
تغني من التعب لامَن
كلاك دمَّن
ولا شكراً رجيت
لا مَن .
فهل يعني النهاية الموت
وينبعزق غناكَ سدىً
أم أن الغيم حينسابق
على الأرض العزيزة فدىً ؟؟
؟؟؟ ؟؟ ... ؟؟ ؟؟؟
وطنّا حبيبنا رغم البين
هي الأشواق
حنينا إليكَ زين ..
يا زين يظل دفّاق
... ...
ما حوجتنا وندِّيك
وغيمنا عليك دوَم ساساق
يلاقي البينا بين واديك
أناقي غزيرة ماها أفراق
نحبّك من طرف من جم
برغم قطائع الإملاق
ماب تنذم .. علاقة دم
وفاء وتاريخ على الإطلاق
إذا ما الغربة لمتنا
على ذات الخلق وأخلاق
وطن وين كان في ذمتنا
فكيف يبقى الزمن فرّاق
هي الأشواق ..
وما بين السماء والأرض
مد أشواق
وما طال المطر بيصب
طبيعي إنو البحر .. ما راق
كما إنو العكار من طين
كمان من طين
يجي الروّاق
صحيح إنو المطر رائق
ولكن السحاب قد ضاق
خبارو الريح بأشِن سائق
وكت كبد التراب مشتاق
إذا ما العشق منسابق
ومنطابق على الأعماق
كذلك حضرة العشاق
مع غيبوبة الأشواق
....

ناصرعبدالله
05-26-2010, 08:46 PM
مصابيح السما التامن .. طشيش


(10)

يا مسكون هيام وقيام
مع ليل الحنين الطاق
قسمتك من شتا الأيام
تضوق زي الوطن ما ضاق
... ... ...
وطن ساكت وطن نضّام
وطن ما فيهو أي كلام
وطن صابر
وطن علاّم
وطن آخر
وطن قدّام
وطن ساهل
ولاب ينحام
وطن ماهل
وطن قوّام
فرد واحد
عديد أقوام
وطن خالد
على الأيام
وطن ساكت
وطنّا وبس
في جوفنا إندس
ألف
ميم
لام
.......
متين ينبث
يلم قدّام ..
رمز لي مجدو صانو تمام
نحوت العزة ماها أصنام
مسيحيتو وسماحة إسلام
تقول للفوق حويتو سلام
بطن بطراني يا مريام
ويا مريوم هي الأرحام
ويا أدروب وتيّة أمام
وطنّا ونيتو بيضا تمام
إذا إنهبشت هويتو حرام
عندها بندقيتو كلام
وطن لا جوع .. وطن آمن
تبس في الصحراء لا ألغام
مصابيح السما التامن
تغيب في الغابة غيم وأنغام
دقر يا عين
وطنا الزين
ولا تنضرا
لا ننعاق
نظل في حبلك الواحد
حبيببين مافي بينا فراق
وهيط شايلنا
شيلة السيبي
سعن الباشِّي
والمعلاق عشيوة الداج
أواخر الليل
كهاربو ضي النجم
بوّاغ
يسد لبق الأسى
الشايل بلد فاتحلو
غلبو بلاغ !؟
جروحو .. جروح
ويا النبي نوح
شقييان والدهر لدّاغ
.. .. ..
متينك يا غربة الجن
نسكِّت صنِّك النقناق
بلد جية المطور للطين
نجيها وتصدق الأشواق
لا زنزانة تترجانا
حي الشعب يا إشلاق
بلد وأحضانة تتلقانا
جنة الجدول الرقراق
... ... ...
نطلق همبريب الحن
على لفح النوى الحرّاق
وفي وش الطراوة دحين
منو اليطبل سماك بأطواق
.............
يا وطن النفوس البكرة
يا وادي الحشا البرّاق
إذا ما الريح جرح لليح
وصيفاً حتحت الأوراق
حطبنا نصيح
أتبني الساق
أمان يا غيمة
مو البتّاق
..........
يا وطناً قريب للحي
وسرّك للبعيد لحّاق
حلُّو حلاوة ماب تنضاق
ومراً كلُو كلُو إن ضاق
..............
من كنّاك ما خنّاك
لا فينا الضلالي العاق
ويا حاسب سكاتنا رضاك
أماني بطونّا ماها غُراق
.... .... ....
صدورنا على البعادي زقاق
ضهورنا إلى المنادي رقاق
رضينا بلا قرن ننساق
وحين نحرن جبل يا ساق
... ... ...
الجرَّب يطير ماب يمشي
لو حرّت عليه الأشواق
ومن قولب لهيب الشمشِ
ما كوَّش من الرقراق ؟.
... ... ....
وطن لو رزّه .. يكسر الرزّة
... ... ...
وإنت المالي عيونو معزّة
وين متراوح سايب عزة
ودابه اشتغلت فيها الغنيه
دابو ضمير الدنيا اهتز
وبدا في القدح الكوني يتبّن
شوقه يضوق للعالم لذه
وين متراوح .. وين يا طالي
باب النيل بحنين الوزة
وعمرك كلو تغني عليها
وتترجاها تعالي ... تعالي
أول ما هي بدت عينيها
نهمة غيمة مشيت طوّالي
كوركنا لك
كوركنا لك
كوركنا لك
يا ...
الله ...
سبعة أيام في سبعة ليالي
رجع الصوت الطالع ... آه ...
سرسار جدول رادُّو العالي
... .... ....
كنّا غلابة وليل وربابة
متلمين فوق قوز ونغني
قلنا الصحراء تشهِّل غابة
حلم قريِّب ماهو تمني
... تنسف فجأة الشوق دبّابة
وفينا غنانا يصن فد صَنِّي
اتنقطت سحابة سحابة
وبدا يتلقط طير الجنِّي
نفس الريح الحرق الغابة
قطَّم فرحك ليلة الحِنِّي ؟!؟
....

ناصرعبدالله
05-26-2010, 08:48 PM
مصابيح السما التامن .. طشيش

(11)

رغم بهاظة وعظمة فقدك
إلا إنو الحياة ما وقفت
إلا إنو في ناس بيغنو
عشان تخضر الأرض النشفت
ناس من بعدك
بعضها بعضك
أرضها أرضك
وناس لا عرفت
ليك
لا سمعت
بيك
وتكنُّو غناك الليهُن
ماشي عليهُن
تتلافاهو الريح
وتفنُّوا .........
ورا الأحلام
الجفّت ورهفت
رهفت وخفّت
خفّت وطارت
طارت ورفّت
روحك فوق
الغنية إتلفت
بي بشكير الصبرِ إندفت
وإنشتت
كواني
كواني
قلنا الله بيخون الخائن
لملمناك والعين بتعاين
مدَّ النيل الوافي ضراعو
سوِّيناك باجور .. وجنائن
شيدنابك دور ومدائن
حندكنابك حز الريح
حركنابك شوقنا الكامن
أو قلنابك ..
ظل مطّامن
إنو حيشرق فجر العالم
بي بني آدم
طيِّب ... وآمن
ونفضل نطلق
نار الغنية
تالا الذمم الخاتي نظامن
تنسف ونجرف
دبش الدنيا
وغَش الفجر الكاذب
لامِن
تبرق
ويمرق
شخب الباكر
وتضوي سماك
يا يومه التامن .
..........
لما وطاك
ما خِبِر البوت
برفع قدرك للملكوت ؟!
مافي القِدْرَك حتى الموت
حيَّر قَدَرَك
هادي الصوت
حيّر صوتك
هادي الروح
حيّر روحك
عشق الناس
الوين ما تروحك
تأبى تفوت
من يتأمل فيك
يتجمل
من يتجمل
بيك يتكمل

إنو الحق مبسوط مبسوط
يا الخلِّيت الزمن الأطرق
زمن الموت
مضبوط
مظبوط

...

ناصرعبدالله
05-26-2010, 08:49 PM
مصابيح السما التامن .. طشيش

(12)

يا زول يا حبيب
يا الأروع مافي الدنيا
الغيب
إتجمع بيك
إتوزع فيك
ومرقت في رقّة
شوارع
أزقة
ونفاجات
أبواب السر
بتودِّي تجيب
وتندِّي الأرض
تلاقي قلوب الناس بي بعض
بلا ترتيب
إنتاوق فينا
ولا تثريب
على خوفنا عليك
بتلاقي الحب
في عيون كدّاح
للشغلة تخب
تنباخت بيك
مع كل صباح
يا زول يا كيك
لو راح الحب
لو ضاع في القاع
الدنيا دي راح تنقرقر جُب
قدّام عينينك
مرّت قافلة
وكانت غافلة
يا يوسف في الدنيا القافلة
منو اليترجل ينزل ليك
أو يتروجل ينشل بيك
النجمة .. الحب
عوّد عينيك
في الضلمة تشوف
حفِّر بي إيديك
عتبات للجب
سمُّو .. أنسف جوف
صنّات الخوف
الشوف الرعب
يا ألزم فيك درّابة الصبر
أنا دربي عليك
جاييك
جاييك
... ...
فسراع .. فسراع
قلَّعت أشميق الشوق
ملتاع ..
أنتل وأفتل
فضَّل فد باع
والحبلِ يتم
كمل الأشميق
ما تحتي نِكِت
تنْقِت .. تنْقِت
فوق أرض حجر
لفِّيت .. لفِّيت
دُخْ بالسيسيق
يا جاو وسجر
يا نخلِ طوال
وأنا رجلي عضير
أنا نفسي قصير
من شرب القامشة
الشيشة ... البنقو
ومضغ القات
سف التمباك
لف الحبشاي في ورق قصتير
شم البنزين
الجن .. الطين
برد الأحراش
حر الزنازين
من يسقط وعاش
أضرُب بي إيديْ
قرَّبت أطير .
في الوضع الكير
تبَّنتَ عضاي
حين شفت الريح
ينتق في دلق
من لكدة جير
ما احترتَ كتير
....

ناصرعبدالله
05-26-2010, 08:51 PM
مصابيح السما التامن .. طشيش

(13)

الرب فزّاع
يا الفطْن القاع
شرَّطت هدومي
وتمَّ الباع
برطع .. برطاع
صدِّيت البير
أمسك .. يا ..
يوسف ... هاك أمسك
يوسف سامعني .. وماب يمسك
طمِّني عليك
لو ماك مارق
أمرق حسَّك
يوسف قول خير
أربط نصَّك ..
وأمسك في الحبلِ
وما تنتق ..
يا انقطع الحبلِ
ويا إنشقلَبفي الفيها معاك
لاحظ يا يوسف
إنِّي ضعيف
والحبلِ أضعف
من حيل موقف
سيل ريق الفِقَر العربية
قدّام اللقمة الغربية
خلِّيك حريف ..
بالذات أحرف
من عِرق الغضبة الشعبية
الهبَّة النار المطرية ...
كل إيد في جدار
شمشِم وإتحسس بأقدامك كل الأجحار
ما عِدم الجب قبل إعدامك
من عكن أحجار ..
الحفر الجب زول قدّامك
مو قبيلة فار ..؟
ولابدَّ أكيد ساعة تمَّ
لابدَّ طلع من دربٍ ما
تبِّن بي إيديك كوس الجحّار ...
لابُدْ .. لابُدْ
يوسف سامعني
ومابي يرُدْ
يا سيِّد ..
حرِّ الشمش شديد
وأنا بين حجرين
واقف ويحيد
نازف ... حفيان
رادف غلبين
وراجف ...عريان ...
سايف ...
عطشان ...
وآبار الأرض العربية
آباره جميعِن ..
قد قطَّن
والنهر جريح ..
وبعيد جداً
ده درب مقطوع ..
حداً .. حداً
بي فوقو قوافل ما عدّن
من صلبِ يسوع
الإنعرْبَن ..
حِرْدَن .. وصدَّنْ
من عهد محمد
ما جابن
جيهاتو الأربعة
ما ودَّن ..؟
من عهد صلاح الدين
وجمال ..
كل الينابيع طينن قطَّن
والغيم الزنجي دقس لندن
والمطر العربي مشى أمريكا
وبأمريكا .. إنجنس .. وإستوطن
القال يتمدين
جا مديَّن
والكان إنديَّن
جا مطيَّن ؟!
أأطلع عينيكَ توريكا

وين وصِل الحال الإنقطع
مع إنك يكفيك الفيكَ
أمريكا..
وأنصاص أمريكا
مارشات الناتو
مزازيكا
البوسنة
الهرسك
وصربيكَا
... ...
الله يرضاكَ ويرضيك
يا يوسف أخوي
أطلع .. نطلع
يا يوسف هوي
ما عاد يسمع
أنا حافي وساحت كرعيّا
فوق زفتِ الأرض العربية
عسمت كلماتي مع الرقبة
وداخت يا ساكت عينيّا
شاخت أيامي الشمسية
وباخت أحلامي القمرية
أطلع .. ياخي أطلع ..
ياخي أطلع
لا إنعلق يوسف في حبلي
لا إنفكَّ الصبرِ من إيديّا
يا
يوسف
يوسف
يا
يوسف
يؤسفني ما ردَّ عليّا .
.... ... ....

ناصرعبدالله
05-26-2010, 08:52 PM
مصابيح السما التامن .. طشيش


(14)

من نخلة على أختها متكيّة
أومت لي نسيمة العصرية
قيّلت إنصنّت وإنكربش
كدرومي الحالة بعينيّا
إنكرفس فيْ ضل النخلة
وإنكفت اللحظة المبكية
قمرية تراحم قمرية
وتحكيله بحرقة وراثية
قمرية من القمري الشاهِد
على خطو الميتة الدغرية
تحكيله وعينيها تناهد
عن كيف إنشرمت أغنيّة
وإنترمت أحرف من كلمة
إنسهكت روحه المقرية
حين سابه مغنّيها براها
في سفرة بعيدة وأبدية
كيف شمط الوتر الموّال
وإنفلت النم من صقريةوإنشابط في لمينة الآهة
بي غم الفجعة الكونية
المرِق السانِد والشال
طقطقبو الدمع الهطّال
إنشقق حائط كان ساتر
وإترقرق سقف الآمال
الكان بيبشِّر بالفال
والبسمة عيون الأطفال
الكان بيوزِّع في العتمة
للضو على كل الحلاّل
الكان بيفرِّق في الزحمة
عن كيف تتلمه العمّال
في الكتمة يرطِّب بي كلمة
عرق المسهوك الشغّال
طوّالي يصبِّر في العالم
مو الصبر الفاوة الهقّال
الصبر المنو البني آدم
يعدل للزالف في الحال
ظل صابر قالت أميّة
دفنت لها كمِّين تربال
كم بِت شيّالة علانية
الريج جزّاها كما النال
قالت والخاطر جوّال
استغفر يا وتر الباكر
والدنيا قديمة يا موّال
قمرية تقاطع الأميّة
خلِّيهن يرتاحوا شوية
ما الفجع الواقع غلاّب
والدمع يريِّح .. يا أخيَّة
انفتق المرتِق بي صفحة
الزافرة الجات دافرة قويّة
ضلعاً ممنوعة من الفرحة
من حقَّها تبكي بحريَّة
البينا وبينو من الإلفة
ما بين الأرضِ وطورية
إحساس روّاسي لقى الضفَّة
عاذب في الجنَّة وحورية
ما حيلة العمر إن ما كفَّى
نفساً مطّامنة ومرضية
ترجع لي ربّها والمنفى
لي شعبها ماب ينسى قضية
الغُصّة تشرق القمرية
وتنعشرق في حلوق الخِلَّة
وين غائب .. سائب ليلاتك
يا شهر أحلامه بلا هلَّة
ولسَّع في مطاليق من غادي
بيجارطوا بنيات الحلِّة
في ربابيط تقطع في الوادي
للبطلع لأهلو ويندلَّى
عكازك مرمي وسيف صادي
وخيلك .. من غلبها .. لا حولة
لسّع في فوارق ..في طوابق
تتعلاَّ ..
ولازم تتعلاَّ
ما طال الرزق اليجي مارق
للناس تنصلبطُوا باسم الله
...

ناصرعبدالله
05-26-2010, 08:54 PM
مصابيح السما التامن .. طشيش


(15)

وين غائب سائب للعالم
يا تامن أيامو بلا طلَّة
ولسّع في جزائر مخجوجة
وفي خلائج لائجة على ملَّة
في عراق والرؤية المختلة
يا معاين في الغبن البائن
يطعن في أخيُّو وما يضلَّه
معنى القومية العربية
ما دلاَّ .. الضلَّ .. وما دلّه
1
أن تقلب للسلطة ...
بالدعم الأجنبي والخطّة
2
تنسلط في شعبك بالشرطة
المقصلة والبلطة ..
بالحمم الشعبية
3
تمرق من ورطة
عشان تدخل
بالأمّة وبلدك في ورطة
وبي دينه .. تدِينه ..
وماب تفرِق
4
أن تحرق بي نارك
قطِّية جارك ,, إيديَّة
5
وتنسلبط لي طينو ..
لي مويتو .. سماهو المهرية
تحت الشرعية الثورية
6
وكان أسمح .. لو تفتّح
نفّاج ما بينك وما بينو
عوّانك وعوّانو يشبوا
عاصرين على بعضِ
ويتربوا ..
من شطرٍ عربيٍ واحد
راضعين ..
في الأول ينحبوا
وفي الآخر .. راح يرموا الحيطة
وعلى بعضِ قلوبن ينكبَّوا
على صدر الأرض العربية
بالنور الأخضر ينعبُّوا
جنيات السلمِ مباديها
الموية البينا تعدِّيها
لا شرطة ...
لا نقطة ..
تلاقيها
كل إجراءاته الرسمية
أن تشرح ويفصح ما فيها
من عشق محبّة وحنِّية
لي كل الأرض العربية
بالشوق بتلوِّح أياديها
على نخلة قديمة على الشاطئ
في طيبة تتذكر أساميها
والحيطة التقفل ترميها
بي ريح الوجد القومية
عقبان الحيطة البعديها
والحيطة البعد البعديها
لي آخر الحيَط الوهمية
على خدر حبيبتي العربية
بتَّاً حبُّوبة ودغرية
لا رحطاً يقطعوا
همباتي ..
لا رحماً فضُّوا حرامية ..
7
وماب ننسى المتلبد
اليانكي
المشكي على الله
متسبب كايس لي علَّة
يدخل بها في الربع الخالي
ولا حاشا تحوشو
ولا كلاَّ ..
ولسّع في فلسطين محتلّة
وفي فلسطينات دار تُحتلّه
؟؟؟ ؟؟؟ ؟؟ ؟؟؟
وين غائب ..سائب
للعالم يا شايل همُّو بلا كلُّة
ولسّع في إفريقيا المحنانة
نشفانة سهوله المبتلّة
آسيا الكحيانة ..
وصبيانه
تنفرج على رمي الجلَّة !؟
لسّع في أوربا الغنيانة
فقرانة روح دار تنسلّه
لسّع في بعايض في العالم
بي دم الآدمي تنسلّى
ولسّع في هوائل
في بلدي
بي إسمي .. وإسمك
واسم الله ؟!؟؟
....

ناصرعبدالله
05-26-2010, 08:55 PM
مصابيح السما التامن .. طشيش


(16)

كيفنك يا وطني المافي
عوافي يا ارضي المحتلة
ولسّع ..
يا المِن خيتك بنسع
سنّارة الصبرِ ..
في جبّادة عشم الأيام
اللي هسّع ...
لا نتَّق كورا
ولا داير من بحر الحاصل
أفوت أقنع
لسّع دم فاير
في وطني
ولسِّع هم تائر
فيْ يلسع
لسّع حكاية عزة زاد
عن خيل رهاب متشرفه
مرق المغني يجيب مطر
لي نخلة روحه مشحتفة
هبش السحابة ..
أبت تصُب
صبّت عليهو العاصفة
فنّت من إيديهو الوتر
والغنوة خرّت نازفة
في حلقو ينعارض حجر
ساد الغناوي العازفة
وهج النجيمة الشايفة
بي ليلو ينطاير شرر
فوق راس نخلتو الناشفة
النار عديل .. النار قَبَل
حرق العطش ..
ما كان كفى
قِدر المغني ..
على دموعو يوقفة ..
قضَف الحجر والعاصفة ...
حين لمَّه في عضم المطر
بعد الصراعات والحَفا ..
النخلة كانت في الكُبُت ..
جمراية ترفِس واقِفة ..
خالفاله شتلة عمر شهر
محنة مغني ..
وعاصفة .
غلبت عليهو العاطفة
ضرّع على الشتلة أم سهر
وفي لُجَّة النار إختفى ..
داخل على حوش المطر
والشتلة بينو ملفلفة
الباقي من ساق نخلتو
فوق كتفو بىْ جمرو انكفَى
يا أمّة ..
فرسانك تموت
مغدورة ..
دائماً من قفا
يا أمّة ..
تقّابة .. وفا
وخانة مشاعر مرهفة
يا مدن شوارعه تستعيض ..
بي أغنياتو
عن النضال ..
ضد الظروف المجحفة
بعضاً على بعض الدروب
قاشرابو .. موضة وقندفة
لو تستعيد نفس أمنياتو
عَلى الطريق
مَافىِ الْعَوارضو توقفه
يا كمبوهات بتّ الحلال
بالطيبة والرحمة المحاننة
مترفة
يا الفارشين الأرصفة
يا الحلمهن حلم الطيور
عيشةً شريفة وأرغفة
في بلد حِنيْنة ... موالفة
يا المن أصابعين الوطن
حتى القيامة ...ولا الزمن ..
لا كُبَّة حامي بتنتفه
يا كلكن في العاصفة
دون عاطفة
مَن كان ..
بيسمع ...
مصطفى ..
صــــــــــنّه
ووهج صوتو انطفى
ومن كان بيسمع ..
ما اصطفى ..
حيْ ..
بي قضيتو ..
وبس ..
كفى .

ـ تمت ـ

حسن الكدوس
05-26-2010, 09:22 PM
روائع والله يا حميد

نبيل عبدالباقى
05-27-2010, 09:14 AM
طشيش طشيش ...................................؟؟؟؟

كدى قول لى السماء الثامنة دى وين؟؟؟؟؟

ناصرعبدالله
08-25-2010, 10:16 PM
تجدها هنا (نحن من باب الشجي والزخرف الرمزي والالغاز والمغزي ..)

السر حليب
03-18-2014, 10:52 AM
نادوس

الحال وراك كيفن تسر باقيلك انتي بلاك في زين
ما تهشم ابريق الرضا خنست نسيمات السمح
والبسمه زي حبه قمح
لفحا وطفر طيرآ كتر
أورث غصافيري الضنى يبس غناها مع الفجر
هطل على الشجر الهموم وشاشات نهارات العنا
عانيت وراك جنس عنا
بوغ سهادي كرو النجوم
خطو المواويل ارتعش
حرس عصاتي بنات نعش
دومست فوق حجر البتول
هلوست بي صلب المسيح
دروش شردت من الضريح
شويمت بي ظلم الحسين
أومت على كم ميضنه
وما بين عيونك والمغول
ساهد بي قافله الحروف
وايقاع ظنابير الزمن
انصربع ايقاع الفصول
هبطت غمامه ورا الجبل
راحت من الليل الجروف
شهقت شعاب انساني خوف منك عليك على أي زول
وك نياق شوقا الضنا سرح عصا التسيار قبل
درب الحياه المرمول فنا
يا وقعة الواقفين هنال يا وقفه الواقعين هنا
يا آفة الوطن الجريح اشمعنى لا وصلك دنا
لا آفه الزمن المشيح قدرت رويحتي تيقنا
من جيتك المرقت بسيم الدهدهك روحت وين
يا زين مرقت مشيتي وين
غربل عليك ليل المدائن الكان زمانك حالا زين
ناشدتها وفتش نهارات القرى المتكيه فوق شعب الصبر
ساندتها علم بطانا الشيطنه
غنيت معاهم سودانا يا سودانا….
للمتهم والدنيا ليل والقمره بت فاتا القطر
وصف لهم حتة شليل
ردد حروفهم ردتها
وقف سحابي مع الدغش شهدتها
شهدت معايا على العذاب الهد أضلاع الغبش راعفتها
تكلت خدودا على بكاي لا قيت سجون جاهد بها
بي جيهة الجذب القديم دخلت مكندك بالشباب خنت التراب راودتها
فوق ها التراب واعدتها
لا انتي جيتي ولا هي آه روحت وين
يا وين مرقت مشيتي وين
كل البنات جو من المللى
هشت بكت شدت حكت وأزيارنا والمرحات خلي
يا انتي يا مرت العدل ماك في صعيدا تترجي
روحت وين قوليلنا بس من الغلبان تجي

لو فينا أطلعي مننا أو بره أدخلى … أدخلى
غنيتك البارح براي انصلبتو التانيين غناي
والليل بتواتاك شعر دونو انعتاقك أو فناي
هيا يا مغنين الشعر..ضد ها الزمان وطبنجتو
شعر الشعر…شعر أيوه يلا علينا جاي
ونكر المغني كمنجتو
نادوس يا فجر القصائد اندلق
ما حك جلدك مثل ظفرك فأنطلق
انا شرحنا لك صدرك أو شرخنا فأنعتق
يا أنت يا كل الذين لأجل خاطرهم طهوت غداه عقم زهور كلم لتنفتق
غضبآ يؤرق موقديه كورته
رجمآ لكل من تنازل أو تخاذل
أو تشاعر أو تداعر
أو تهاون أو تخاون أو تعاون ضد فتحك أو أتاني ليسترق
تربت يداك…تبت يدا كل الذين تغامزوا
وتهامزو وتلامزو وتقززو وتلذذو
من فيه جرحك يا وطن
نادوس أه … نادوس يا………
أمسينا يا نادوس وأصبحنا بيك يا أم
يا سوسه ضد السوس قلبآ بلاك يضم
ليل الضياع مهووس يحلم هواك يؤم
بعض الحصاد الروس عالم نداهو بعم
ختيت هواك فانوس بقالي شلتو وحم
جيت المدن باخوس لاقيتو جالب السم
راشح هجير البوس وكل الوجود دم دم
كوركت يا نادوس أم الغبش يا أم
يا نخل يا أبنوس يا سامبا يا تم تم
يالبيك غناي محروس دخري الغلابه هلم
دهمني كم مجروس وعكمت تاني وقم
حمرت في السحب المكبرته
يا دخان يا ريحه يا قواده للبحر المخنس والعساكر والملمس..ما تختشى
بيوضه يا ماخده الخريف ما طمبرت عربانا شي
مستني في الزمن النزيف القال بجي وفات بي وشي
رشت النهار بالصبر أبت المغارب تترشي
دقست سواقي المتعبين كايسالا فيها عقاب عشي
بيوضه آه أواه لو الكلمات حصى
قالت لي الله أقرب فرج
أواه لو الكلمات لهب نرجم به وش زمن القسا
قالت في اطن الليل وهج هدام أمان الناس نسي
دنقرت للأرض السربله بالسراب فرغت بي غلبي العوج
فقدت أيادي العصا شديت حزامات الجلد تالا ضرا الواطه
كوركت صد أرجع يا ولد
طوريه أبوك تراها دي عاند كواريك مشيت طوريه أبويا نراها ديك
لفحوها لمن قام يصلي خطاب بكارات الغمام مغرب صباح ليله دخلتو على البلد
حرق عرق الفي الكلام عطشان سقيت عرق الشديره من المطيره الفي كان حس
العساكر لا ورا قالت لي أجر شدره غنايا جريك ضرايا جريك ضرا قبل العساكر ما
تصل قبل الدرادر ما تبين وكانوا العساكر في وشي قت أقول وقع طينه الجداول
ما ها زي طينه جسارتك يا بلد والكل طين
يا نبوت دقه تفوت و لا حلم يموت
النندق نندق نندق ويفضل باقي لهيب الحق
حق الناس ينزل في الحلق
او ينعارض شوكه حوت
يا كهنوت اليجي كابروت
يا جبوت اليجي كابروت
يا كابروت يا كابروت يا كابروت
كابروت عشم وطن الغلابا الحال بلاك تب ما يسر
ما بان صباح أو عسعست قدامنا ليله تزيدنا ضر
أوتارنا يا آخر الغنا حردان عشياتا النغم
فرغت مجالسنا البلاك عنكب على أبوابنا السأم
أنزح كفانا كضب رياح وبكاء رعود وضحك برق
العشب مالي حشا الأراضي جواهو لمن العش حرق
الشعب حي بس كيفت تصد يملابك المليون عرق
كدبنا في الثرى في رجالك ما فينا زولآ ما عرق
ساوين عصا الأشواق مرق
عربان ونوبا نهاتي بيك والزنج تتمناك عتق
ورا يا وجع هيا يا طلق
صد لي ملامحك يا حراز ريح العوارض غربت
فرتق ضفايرك في الرذاذ جية العصافير قربت
لاقيتا في غابه مدينتي وسط شتيلة حبحبت
على عش صغارا الدوب حبت
ما وقف الليل ولا الهجير كم جفت ريقآ وورتبت
لاقت من العنت الكتير ملت الفيافي أحد أحد
فايده جناحى بلا أطير الموت ولا العيشه النكد
با نيل مدد
يا غيث مدد
ندى دمر نادوس ونشوغا
وخلى الناس الصبحت يوم من حيات الخور ملدوغه
خلى الصوت الكبتو الجوع يلقى براحو يضوع ويضوع
الصوت العالي يا صوت الناس التحت الواطى ما مسموع

السر حليب
03-18-2014, 11:15 AM
يا متخبية خلف وضوحك


يا متخبية ...
خلف وضوحك
أمرقي داخُل ..
تلقي الغيم الطاش
إتلقط
لمّه وربَّط ..
ربَّط ونقّط
نقّط ورشّى
الغبن إتفشّى
القابض طينك
وطاب في دوحك

يصحى الشجر اليابس
أخضر
يضحى الأخضر
زائد وأنضر
يرجع طيراً
غِصب إتهجر
وشوش ..
عشعش ..
وعمَّر روحك .

يترى الحلم
الفينا إتحجّر
وندرأ نزوحك
تالا المدن ..
المصّت دمِّك
ودسَّت فوحك
قسّت همِّك
وقصَّت موحك ..

يا متخبية ...
وأنا مفضوحك
رنّة فرحك ..
صنّة ترحك ..
وين ما أقبِّل
ياني بروحك
أي مرتكب الصاح
ونصوحك ..

كَجَر الصمتِ
وكت داهمني
كنت متلبِّس ...
بي غنواتاً ليك
إتكرمن
من سر بوحك
للأطفال
بالزمن الجايي
الزمن الطيِّب
زمن الخير
الجالبة فتوحك
يقفل حرباً ..
باحتة جروحك
وطوفان جدباً
محّن نوحك ..

كبّر طفلك
ونشّن حجرو
قام الصمتِ وكجرو ..
إنكجروا ..؟
إنعدِّيتي ..
وشبّت أزمة

بين فرقات
الضو والعتمة
شقَّ نسيم
لي عِرْق الكتمة
خالَ النخل
العاول طوّل
قال وإستشهد
بي عمَنَوَّل
"المنحوس ..
هجّر تربالك
والمجروس ...
يا الردم الجدول
ودكَّ أطفالك
تحت الردمة

وقامت طلقة ..
تجاه النسمة ..
الساكنة النخل
العالي الأسمى ..
حاض الطير الحامل ..
هجمة
طرح الغيم الشايل ..
صدمة
داخ النحل العامل ..
صُرمة

رجمة ورجمة
في حلقَ الليل
إنشرقت نجمة
رقد النيل هبّود
بالوجمة
نفدت شيمة
بقدرة قادر
طارت غيمة
وصارت باكر
باكر رحمة
مدّت
وندّت
وشدّت
خيل الحيل
بالبسمة
نخل الغبش
الدغش إتلمَّا
الأبنوس الجاسر
يمّة ....؟
هبَّ تبلدي
تحدي وهمّة
وبحر المالح
كبّر وسمَّا
"الأديان
في القلب
يا أمّة
والإنسان
في الدربِ
أهمَّ"

البلد إتحول
بي مسموحك
ناس بتكاتل
لأجل سفوحك
ما يسقيهن
غير فد جدول
جدول
خيرو الخاوي
نضوحك
لا أشواك
تحميك تتجوّل
لا أسلاك
تنصلبط سوحك

يا ممتلية
كجوفي فجيعة
وآخرك أوّل
أو معتلية
كطمي الشوق
القلب الماحل
راحل طوّل
زي دعوات
الناس الظُلَّم
لمّا عليها الغول
إنغوّل

حلمي مدردح
دخري فقارى
إرثو ...
ضكارة
جسارة
بصارة
بإيد كرّاسو
وبي إيد فأسو
لو لا إحساسو
بعزّة ناسو
كان تكَى راسو
زمان وإتسوّل
زولاً طبعو
يفجِّر نبعو
بدّع زرعو
وماسك الأول

سوَّى حضارة
وشرَّف لوحك
شرحو ..
شروحك
مسحو ..
مسوحك
يفقد عطفك
ويأبى ينوحك
غامل يوم
راح ترجعي فيهو
ومجد بنيهو يلاقي
صروحك

جهراً ترجعي
ياوضّاحة
يا مرفوع للقوّة
صمودك
صبر الناس
اليوت كدّاحة
لنضرة عودك

المارقين
الذمّة هجائر
الساكتين
فوق رأي
وبصائر
مطر الحق
بالحيل سحّاحة
ناراً بق
لليل صحّاحة
شالت وجع الحال
في أصفاحه
وتنزف شان
ما تبرى جروحك
وتعبك راحة

شدِّي النيل الأبيض
فرسك
وفيض الأزرق
فينا جموحك
مقداف فألك
ومرسى طموحك
الإنسان اليسمع
بالك
يعرف مالك
يفتح خِزَنو
و يستر حالك
يلفح إجنو
ويقلع نالك
يكتل حزنو
ويروي قموحك
رافع رسنو
وراتعة أمبوحك

تنمسيبو
هديراً طيِّب
وتصحي
خرير الفجر
صبوحك

عشتي آواضحة
وراء مخباكي
ويا متخبية
خلف وضوحك
عشتي أصيلة
كأرضك ونيله
ومرتع واحد
لألفِ قبيلة

يا ال لبنايتِك ..
من غنمايتِك
يوم ما إنطفت النار
في لدايتِك
غيَّر زيرك
ولاّ ملوحك

قدمك قاشر
قطع الفاشر
سمسم باكر
باهي مسوحك

سترة بدنك
قطنة وطنك
طينك سكنك
نبضك مكنك
عرفك فطَنك
تبري جروحك
يا الطوفانك
صدراً ماهل
وشرف العزّة
الأحمر
نوحك
من دعتاية الزمن
الكافر
ينصر دينك
وتسلم روحك

تسلمي واضحة
وراء مخباكي
أو متخبية
خلفِ وضوحك ؟

السر حليب
03-18-2014, 11:18 AM
صياعة مع الغفاري وأهل الله في زمن غلط



تستغرب يا رسول الله
يا أول وتاني الخلفاء
تستغرب يا أبذر لو جيت
في هذا الزمن الجهجاه
لو فيكم حد يا حنفاء
إتجاسر وقال ما معناه:
(في الدين الطيب لا إكراه)
وبني آدم أدرى بدنياه
أو أن العالم شركاء
في الكلاء ..النار ... وفي الماء
أو حاول ينصح وينطاول
لي حاكم ظالم وقال لا
يا لاقى جهنم مأواه
فتحولو ترابيس شالا
يا راجع نفسه أقلاه
السيف فوق رأسو مخاواة
بالذات الزيك يا أب ذر
بالذات الزيك لو جاء
راكب دغريتو العرجاء
دايماً غلباوي وغالاط
لخباط للعيشة الخمجاء
بالذات الزيك لو جاء
في زمن الزيف المنشر
والتشريعات العوجاء
يا إنباع يا راجي الراجا
يا واقف فوق عمق الدين
يا شايف لي آخر دنياه
يا طيب ... يا إبن الغبراء
الشركة يسارك يا أب ذر
من إسمك واللا من الذر
الكسحت ديكا كريسيدا
داك سيدا أب دقنا شمطاء
وجيب إيدك يلا النيلين
لو درت تشوف العنقاء
يا صاحب النفس الأمارة
بالوعي الديني المحتارة
دا الدين ... المقلعة ده الدين
والمزرعة من فضل الله
سال سيفك داقش شقيش
قدامك عاين كم ديش
الزمن إندقش دقيش
الأمن .. محاكم التفتيش
في كل المدن العربية
حا تلاقي شدرتك مسبية
يا إنتحرت بي بترودين
وعصفورك منزوع الريش
أجلاف كنزوها بلايين
والناس بي الله ويا آمين
بتحلحل دين الكنتين
تنلفت كايس لي مين
الأمن ... محاكم التفتيش
وأصحابك جوة زنازين
وأسيافن صقروا ما فيش
ما إنبعنا وباعتنا قريش
ولأمريكا وبي حبة عيش
والحاكم قبض البقشيش
سال سيفك داقش شقيش
الأمن ... محاكم التفتيش
جنسيتك...بظبورتك...الفيش
في كل المدن العربية
حا تلاقي النفس العربية
في مصحة أمراض عصبية
بين الحجبات والأرتيل
تنململ شاحبة وصفراء
وقافلاها متاريس الديش
والكضبة عمايل الأمراء
سال سيفك داقش شقيش
إتراجع يا أبن الغبراء
يا صاحب النفس الأمارة
بالثورة القادرة الجبارة
إتراجع وأنسى الفقرا
أمثال العسكر غدارة
زراعك تنفد تتنفض
عمالك منك تتجارى
وكل الكادحين الشرفاء
وراح تفضل وحدك في الدارة
راح تفضل وحدك في البر
لا زوجة لا قطة ولا غطاء
لا تكتل نفس يا أب ذر
سيب خونة مكة وتجارا
إتراجع يا إبن الغبراء
في لجة انكسرت بي السارة
زلقتني عجالة الشعراء
فلقتني من الربذة حجارة
سرقتني بدمي الصحراء
أب ذر لا سمعني ولا تبعني
طبطب على همي بيسراه
وكان دمي إنماذج بدماه
بي دم الغبش الشهداء
من اول وتاني الخلفاء
إتجمع في رسول الله
زي نهر بيحفر مجراه
مصلوب فوق عتب الفيحاء
مجلوب في السوق السوداء
وما صرخت بنت أبي بكر
وا إسلاماه ... وا إسلاماه
كانت هي الأخرى وراء القصر
تنململ بين الدهماء
تجار الدين الساقطين
الجنرالات الجبناء
مكتوفة الأرجل والأيدي
مكفوفة الأعين عمياء

السر حليب
03-18-2014, 11:22 AM
مناقيش العدالة

مني متعشم طلوعك ..
كلي مستنيك تعودي ..
ويغسل الساحات رجوعك
في حشي أحراش الليالي
منتظر بقة شموعك
تشتلي الضو في الضهابة ..
ترخي للجايعين ضروعك
يرجع الطير المهاجر ..
يملأ في الفجاج ربوعك
***
في كلام الناس بفتش ..
بين عوينات المدارس
في صدي آذان المساجد ..
ورنة أجراس الكنائس
في اندهاشات العذاري ..
في ارتعاشات الموامس
في بحر فرحان يبشر ..
موجو لي جيه النوارس
الرواويس طمبروك ..
وهزّ بيك في الدارة فارس
***
بين سكات القرية أفتش
بين هضاريب المدائن
يا نسيماتا تكربت ..
شايلة أشواق الجناين
لي جديول الحلقو ناشف ..
أو عرق تربال يكادن
في وش الأفراح بفتش ..
بين قفا اللحظات أعاين
بين سواقير الفقاري ..
الجاية من تالا المدافن
مرة طال الليل علي ..
ووصلت الآهات مداها
وقلت لي النجمات موجايي ؟؟؟ ..
قالت الأيام تراها
يا ضيا القمرا القبالي ..
شوكة الظلم الخيالي
عسمت فوقنا الليالي
خبي في سراعك تعالي
يا مناقيش العدالة
بتنا فوق الصبر عالة
يا تعاويزنا وعزانا ..
خلي نور الفرحة يطفر
من عوينات الحزاني
صخرة الأحزان تقيلة ..
وإحنا ما بنملك سوانا
قولي هيلا هوب معانا ..
من علي الشارع نشيلا
سكة العمر الطويلة ..
ترتي في الجايين ورانا
صرنا ذي رحالة عنك ..
فتش الكون تبني لبني
وراح سأل طيانة تبني ..
وقالوا جاية
بالعوينات البقو من بدري
شايلات القراية
في تلوت الليل تبوغ ..
سارقة للدنيا السقاية
ولما تورد ..بنسلينا
الجردقة .. القرض .. المحاية
جاية من ضهر المسافة ..
البين بناء الطين والسرايا
طالما في الدنيا ناساً ..
فاتو للجايين فداية
وناس علي جلانا تكتب بالثبات ..
والنيل دواية
جاية .. جاية
دفة التاريخ في ايدا ..
دم عروق اما بتنده
راجية نص الليل وحيدا
بيتت في القلة مويتو ….
وزادو في المعلاق عصيدة
جاها في جواب يسلِّم …
للبلد دانى وبعيدا
يمة يا نفس الوصية …
الكل ما شرقت نعيدا
يانا يا شخب القضية …
الصافي في قدح القصيدة
مانا قنعانين تملى ….
مانا قنعانين تملي ..
من دواية الصبر نكتب
فينا والإصرار يملي
تنعدم موية وضونا ..
بيها نتيمم نصلي
الزمن ينقض وضونا ..
تاني نتوضأ ونصلي
ونمشي فوق دربك نباصر ..
في الزمان والشوك نحاصر
بي شعاع بكرة المسافة ..
وسطوة الليل والعساكر ؟؟
تنهزم ريح العوارض ..
والمواريث التعوقك
ومن شقايا الحال تبقي ..
وتقدح التاريخ بروقك
وكلما مرقت غبينة ..
تمشي لي داخل عروقك

السر حليب
03-18-2014, 11:25 AM
عـــروس الطيــــن

بيني وبين النهر ضحايا وكمّين قتلة ونصّابين
وقدر الغيم اللمّا سمايا .... شالوا الريح وبي حُمرة عين
حبل البئر ودلوها منتّف ... وحارسنها دابيين
ريقي دقيق والخطوِ مكتّف ما بين كهنة وربّاطين
وانا ناذرلك كان أسقيك وترجعي طيبة عروس الطين
ويرجع عصب العشم الفيك ... وزي ما كان من قبل سنين
يا ترقوة الحلم الزانك ما أقواك على السكّين
لما غِشَاكِ الصيف الحارق حتحتيهو الصفق الأصفرْ
والنوّار اليا دوب مارِق علمتيهو تمام ينضرضرْ
فرعك عز الزمن الزانق عاهد ليفك وابى من يكبْر
عشان ما يبقى حُراب ومشانق واللاّ مطارق في ايد العسكرْ
وشان الساق الناجرو الخالق ساترو لحاهو يفضل أخضرْ
روّضتيها جذورك ترحل تالا الموية التحت الأرضْ
وفوق الزمن الريحي الأمحل كيف تتشايل وتسند بعضْ
ما كان عرضِك الا الطُّول .. لا كان طولِك غير العرضْ
وين بالساهلة يفرِّط زولِك واللاّ يفوت المال والعِرْضْ
قال طيراً نفد بي حِنّو ... لى جملة عَقابو يغنوا :
يا أكباد الرفاق لا تئنو
طرِّقوا لى المناقير سِنّو
شن طعم العرق والدم واحنا عوجنا ما عدلنو
هِبّن آ طيور من جم .... رخمتين فوق صقر كتلنو
حلماً زانو ليك كابوس ... وراجنبو الليالي يصِنّو
والوعد المشتت روس ..... وكاويق شن بترجن منو
وما بتنغشّن ... حاشا وحاشا
وما بتنكسرن أي والله وما بتنزلّن لي حباية ودود معقود في شبك الباشا
وكم هبّرتن شركو وطِرتَن لي قندولكِن في الحواشة
وقلتِن شارق فجراً حارق وكل الوخم الزيف يتلاشى
تنفض طيبة غبارا العالق وتقبض نسمة خير ودعاشة
وبيني وبين النهر ضحايا وكمين قتلة ونصابين
وكل الغيم اللمّا سمايا .. شالو الريح وبي حمرة عين

السر حليب
03-18-2014, 11:27 AM
حميد يا كمّين بشر
صحى الموت سلام ... ما يغشاك شر
صحى الموت سلام ... ما يغشاك شر
صحى الموت سلام ... ما يغشاك شر

حسن الكدوس
03-18-2014, 03:39 PM
حميد يا كمّين بشر
صحى الموت سلام ... ما يغشاك شر
صحى الموت سلام ... ما يغشاك شر
صحى الموت سلام ... ما يغشاك شر


له الرحمة والمغفرة
حميد كان زمن براهو بكل تفاصيلو .....